Djob a bi hek ngii ni hisi

Yéhôva Djob a yé Nhek wés. Nyen a bi hek mam momasôna, ma di nla tehe ni ma di nla bé tehe. Ilole a nhek i mam di nla tehe, a bi hek ngandak biañgel. Baa u nyi bonjee ba nsébél le biañgel? Biañgel bi yé bihégél bi Yéhôva a bi hek ni nyuu i mbuu kiki nye. Di nla bé tehe gwo, kiki di nla bé tehe Djob. Añgel i bisu Yéhôva a bi hek yon i bi yila nhôla wé. I añgel i, i bi hôla Yéhôva ngéda a bi hek tjôdôt di mbai, ni di di mbai bé, ni gwom bipe ki. Mukété tjôdôt di di mbai bé, di nla sima hisi, hi hi yé loñge yés liyééne.

Mbus, Yéhôva a kôôba hisi inyu boñ le binuga ni bôt ba binam ba niñ mu. A boñ le mapubi ma hiañgaa ma mbéyél hisi. A hek dikôa, batuye, ni balom.

Kii i bi bôña i mbus? Yéhôva a bi kal le: ‘Me ga boñ le bikai, ni bie bi oo.’ Ngandak mintén mi ditatam, mi bikai ba nje, ni mi mbônji mi bôdôl o. Mbus ha, Yéhôva a hek binuga gwobisôna​—binuga bi bi mpuue, bi bi nhok, bi bi ñôdba isi, ni bi bi ñond isi. A hek ki disii di binuga, kiki bo diséé, ni mbôm binuga, kiki bo njok. Imbe nuga u ngwés ngandak?

Ni Yéhôva a kal añgel i bisu le: “Di hek mut.” Bôt ba binam ba bé lama ba mahéñha ni binuga. Ba bé lama bana ngap i bot mam malam. Ba ban-ga ki ngap i pot, i nol hiol, ni i soohe. Ba bé lama bôñgôl hisi ni tat binuga. Baa u nyi njee a bé mut binam nu bisu? Di ga tehe i jam li i yigil i noñ ha.