Nkol u u bi nôgôl Djob

Yôsep a bé ikété bon ba Yakôb ba nsôk. Bilôk bisañ bi mañ bi bi tehe le isañ wap a bé a ngwés Yôsep ngandak. Baa u nhoñol le kii ba bi nôgda? Ba bi kil Yôsep njôñ, ba oo ki nye. Kel yada, Yôsep a bi emel bieem bi hélha. Ngéda a bi añle gwo lôkisañ, i hoñol le bieem bi, bi nkobla le i ga umul nye maboñ. Ha nyen ba bi kônde ki oo nye!

Kel yada, lôkisañ i Yôsep i bé jés mintômba bebee ni tison Sikem. Yakôb a om Yôsep i béñge too ba yé mbôô. Kiki ba ntehe Yôsep a yé lo haa, ba soogana le: ‘Ñemel bieem nuu a yé lo, di nol nye!’ Ba gwel nye, ba leñ nye ikété bee i yé isi ngandak. Ndi Yuda, wada ikété lôkisañ, a kal le: ‘Di nol bañ nye! Nseñ di nuñul nye kiki nkol.’ Jon ba bi nuñul nye inyu 20 ma bipes bi silba yak bôt ba nyuñga ba Lôk Midian ba ba bé ke i Égiptô.

I mbus jam li, lôkisañ i Yôsep i pat mbot yé, i yube yo ikété matjél ma kembee. Ba kena i mbot i yak isañ wap, ba kal nye le: ‘Baa mbot i man woñ bé ini?’ Yakôb a hoñol le nuga bikai i nol Yôsep. Hala a sôghe nye ñem ngandak. Yakôb a bi ee maeya ngandak. Mut nye ki nye a bi la bé mômôs nye.

I Égiptô, ba bi nuñul Yôsep kiki nkol yak mut ngomin wada le Pôtifar. Ndi to hala, Yéhôva a bé ni Yôsep. Pôtifar a bi yimbe le Yôsep a yé mut a mboñ bôlô ilam, a bak ki mut ba nla bôdôl ñem. Hala a bi nom bé, Pôtifar a téé nye i ngii lingwañ jé jolisôna.

Nwaa Pôtifar a bi tehe le Yôsep a bé nlam munlôm, a ban-ga ki ngui. Hiki kel a bé bat Yôsep le a lalna nye. Inyu yoñ, kii Yôsep a bé le a boñ? A bi tjél, a kal le: ‘To! Béba jam i. Nwet wem a mbôdôl me ñem, u yé nwaa wé. Ibale me nlalna we, wee me mboñ béba bisu bi Djob!’

Kel yada, nwaa Pôtifar a bi noode gwel Yôsep ni ngui le ba lal. A gwel nye mbot yé, ndi Yôsep a bi ôt ngwéé. Ngéda Pôtifar a bi huu, nwaa a kal nye le Yôsep a sômblak lalna nye. Ndi a bé tembee. Pôtifar a unup ngandak, a gwel Yôsep, a leñ nye ndap mok. Ndi Yéhôva a bi hôya bé Yôsep.