Man e a nloñ hié

Môsi a bi tégbaha 40 ma nwii i Midian. A biiba, a bana ki bon. Kel yada, a bé a ntat mintômba nwé bebee ni Hikôa Sinai, a tehe hélha jam. Man e wada a bi kap hié, ndi a bé lék bé! I ngéda Môsi a bi kôôge bebee inyu yi inyuki man e nu a bé lék bé, a nok kiñ i nlôl ikété lindômbôô li hié li man e, i kalak le: ‘A Môsi, a Môsi! U tiige bañ nyono. Héya bitamb gwoñ inyule i homa u tééne a yé homa mpubhaga.’ Yéhôva nyen a bé pôdôs nye ni njel ngim añgel.

Môsi a bi kon woñi, jon a bi sôô su wé. Kiñ i kal le: ‘Me ntehe ndééñga i bon ba Israel. Me ga sôñ bo i moo ma bôt ba Égiptô, me kena bo i hisi hilam. Wen u ga pémés litén jem i Égiptô.’ Baa u nhoñol bé le hala a bi hélés Môsi?

Môsi a bat le: ‘Kii me ga kal ibale litén li mbat me le njee a ñep me?’ Djob a timbhe le: ‘Kal bo le Yéhôva, Djob li Abraham, Djob li Isak, ni Djob li Yakôb jon li ñep we.’ Ha nyen Môsi a kal le: ‘Kii m’a boñ ibale ba ñemble bé me?’ Yéhôva a ti Môsi yimbne inyu unda le a ga hôla nye. A kal Môsi le a leñ ntoñgo wé isi. Kiki a mboñ hala, ntoñgo u hielba nyoo! Ngéda Môsi a bi gwel nyoo i nwel wé; nyoo i témb i yila ntoñgo. Yéhôva a kal Môsi le: ‘Ngéda u ga boñ i hélha jam ini, ha nyen b’a yi le men me ñep we.’

Môsi a kal le: ‘Soho a Nwet, me nyi bé me hop.’ Yéhôva a bôn nye le: ‘M’a kal we jam u nlama pot, m’a ep ki manyuñ Arôn inyu hôla we.’ Kiki a bi yi le Yéhôva a yé ni nye, Môsi a yoñ nwaa ni bon, ba témb i Égiptô.