Himala hi nyônôs jôm

Môsi a bi bôn Faraô le a ntelep ha bé ki nye bisu. Ndi ilole a nke, a kal Faraô le: ‘I kosi juu, hiki man nu mañ i loñ Égiptô a nwo, ibôdôl man nu Faraô ikepam i bon ba minkol.’

Yéhôva a bi bat Israel le ba je bijek bi tôbôtôbô. A bi kal le: ‘Ni nol man ntômba tole man kembee nu nwii wada, ni hoo matjél mé ngii makôga ma mandap manan. Ni bôm minsôn nwé, ni je ki nwo ni bret bi ngi-séñha. Ni haba mambot, ni haba ki bisilbas binan, ni ba ki bebee i ke. I u unu, me nkobol bé.’ Baa u nla hégda maséé bon ba Israel ba bi nôgda?

I kosi juu, añgel Yéhôva i tagbe i mandap momasôna ma loñ Égiptô. Mandap ma bééna bé matjél ngii makôga, man nu mañ a bé wo. Ndi añgel i bé pind mandap ma ma bééna matjél. Hiki lihaa li Égiptô, ngwañ to hiyeyeba, li bi nimis man. Ndi man to wada a bi wo bé ikété bon ba Israel.

Yak man Faraô a bi wo. Faraô a waa. Kunda yada, a kal Môsi bo Arôn le: ‘Telbana. Nyodna hana. Ni kenek, ni bégés Djob linan. Yoña bilém binan, ken-gana!’

I si mapubi ma sôñ i i bi yon libôñ, bon ba Israel ba nyodi i loñ Égiptô, ikété oda. Hiki mut a bé ke ni lihaa jé, lôñni litén jé. Ba bé 600 000 i bôlôm, ibabé i soñgol boñge to bôda. Yak ngandak bôt ipe i bi kiha ni bo inyu boñ le yak bo ba bégés Yéhôva. Ñ, Bon ba Israel ba bi sôk ba kôs kunde!

Inyu boñ le ba hôya bañ lelaa Yéhôva a bi tohol bo, ba bé lama je minlélém mi bijek bi tôbôtôbô ngélé yada hiki nwii. Ba bé sébél je u le Pasa.