Yéhôva a mpohol Yôsua

I mbus ngandak nwii le a bi éga litén li Israel, Môsi a bé bebee ni nyemb. Yéhôva a kal nye le: ‘We bé nyen u ga kena bon ba Israel i Hisi hi Likak. Ndi m’a unda we hisi hi.’ Môsi a bi kal Yéhôva le a pohol ñéga nu mondo inyu tééda litén. Yéhôva a kal nye le: ‘Kee yak Yôsua, kal nye le nyen me mpohol.’

Môsi a legel bon ba Israel le a yé bebee ni wo, a kal ki bo le Yéhôva a mpohol Yôsua inyu jubus bo i Hisi hi Likak. Ndi Môsi a kal Yôsua le: ‘U kon bañ woñi. Yéhôva a ga hôla we.’ I mbus jam li, Môsi a bet ngii Hikôa Nébô, i het Yéhôva a unda nye hisi A bi bôn Abraham, Isak, ni Yakôb. Môsi a bééna 120 nwii i ngéda a bi wo.

Yéhôva a kal Yôsua le: ‘Yap Lom Yordan, u jôp i Kanaan. M’a hôla we ndik kiki me bi hôla Môsi. U nlama añ Mbén yem hiki kel. U kon bañ woñi. Bana makénd. Kenek, u boñ mam me nti we oda le u boñ.’

Yôsua a bi ep bôt ba mbep iba i tison Yérikô. Ikété ñañ u noñ, di ga tehe jam li bi bôña nyoo. I ngéda ba bi mal pôôbe tison, ba kal le loñge ngéda ini inyu jôp i Kanaan. Hilo hi bé noñ ha, Yôsua a kal litén le ba lôñôl mambegee map, ba jôp njel. Mu njel i nkena i Lom Yordan, a bugus biprisi bi bé bééga nkuu malômbla. Lom a bé nyonok ni malép. Ndi kiki biprisi bi njôp ndigi ikété lép, malép ma lom ma sa! Biprisi bi bi ke letee ni ñemkété lom, bi telep ki ha letee litén jolisôna li Israel li pam ii pes ipe. Baa u nhoñol le i hélha jam i, i bi hôñlaha bo jam Yéhôva a boñ i Tuye Nkôibaga?

Sôk i nsôk, i mbus ngandak nwii, bon ba Israel ba pam i Hisi hi Likak. Nano ba bé le ba oñ mandap ni bitison. Ba bé le ba sal nwom, nwom mi minkôô mi wai ni bie bi num matam. Hi bé hisi het milik ni wéi bi nkuli.