Ruth bo Naômi

I ngéda njal i ba i loñ Israel, ngond Lôk Israel yada le Naômi i bi ke i loñ Môab lôñni nlô wé ni bon bap bôlôm boba. I mbus ngéda, nlôm Naômi a wo. Bilok gwé bi bii bingond bi Lôk Môab, Ruth bo Orpa. Éé! Ngoo inyu Naômi, yak bon bé bôlôm ba bi sôk ba wo.

Naômi a nok bañ le njal i mal i loñ Israel, a yoñ makidik le a ntémb i Lôk yé. Ruth bo Orpa ba ke lôñni nye, ndi i ngéda ba ba i njel, a kal bo le: ‘Ni bak biloñge bi baa inyu bon bem ni biloñge bi bakia inyu yem. Me nsômbôl le bé boba ni témb ni ke mabii. Jon témbgana i Môab.’ Ba timbhe nye le: ‘Di ngwés we! Di gwé bé ngôñ i yék we.’ Ndi Naômi a kôndge ndik kal bo le ba témb. Sôk i nsôk Orpa a huu, ndi Ruth nye a yégle. Naômi a kal Ruth le: ‘Nun-ki, Orpa a ntémb i bôt banan ni i mop manan. Témb ni nye.’ Ndi Ruth a timbhe nye le: ‘M’a yék bé me we. Bôt boñ ba ga ba bôt bem, yak Djob joñ ki Djob jem.’ U nhoñol le kii Naômi a bi nôgda ngéda Ruth a kal nye hala?

Ruth bo Naômi ba bi pam i loñ Israel i bibôdlene bi mabumbul ma kôn. Kel yada, Ruth a ke i bada mis ma kôn i wom i mut wada le Bôas, man Rahab. Bôas a bi nok le Ruth a yé ngond Lôk Môab i i bi téñbe i yégle lôñni Naômi. Jon a bi kal babumbul bé le ba kônde yék ndék mis ma kôn i wom inyu Ruth.

I kôkôa i, Naômi a bat Ruth le: ‘U nsal hee len?’ Ruth a timbhe nye le: ‘I wom i mut wada le Bôas.’ Ndi Naômi a kal le: ‘Ngo Bôas a yé mut lihaa li nlô wem. Salak ndik i wom wé ni dingonda tjé dipe. W’a ba loñge nyoo.’

Ruth a bi ke ni bisu i sal i wom Bôas letee mabumbul ma mal. Bôas a yimbe le Ruth a yé muda bôlô, a bak ki bañga muda. Ha ngéda i, i bé le, ibale munlôm a nwo ngi yék bon bôlôm, mut wé lihaa a nlama bii yik yé. Jon Bôas a bi bii Ruth. Ba gwal man munlôm le Ôbed, sôgôl Kiñe David. Mawanda ma Naômi ma bi kon maséé. Ma kal le: ‘Yéhôva a bi bôk a ti we Ruth, nu a ngwés we ngandak, nano a nti ki we nlal. Yéhôva a kôli ni lipém.’