Béba kiñe muda i nkôhna kogse

I winda i ndap yé, i tison Yézréel, Kiñe Ahab a bé le a tehe wom u minkôô mi wai u mut ba nsébél le Nabôt. Ahab a bééna ngôñ ni wom u; a bi noode somb wo yak Nabôt. Ndi Nabôt a bi tjél nuñlene nye wo, inyule Mbén Yéhôva i bé kal le hisi mut a nkôdôl bum, a nlama bé nuñul hio. Ndi baa Ahab a bi ti Nabôt lipém inyu lini jam li téé, li Nabôt a bi boñ? To. Ahab a bi unup ngandak. A bi yodop kayéle a bana bé ngoñ i pam i tuñ yé, a tjél yak je.

Nwaa Ahab, béba kiñe muda le Yézabel, a kal nye le: ‘U yé kiñe Israel. U nla bana kii yosôna u ngwés. M’a ti we wom u.’ A tilna mimañ mi nkoñ bikaat, bi bi bé kal le, ba ôm Nabôt nsohi le a ntiihe Nyambe, ba ôm ki nye ngok letee a wo. Mimañ mi nôgôl Yézabel, ni Yézabel a kal Ahab le: ‘Nabôt a nwo. Wom u minkôô mi wai u yé woñ.’

Nabôt a bé bé nyetama kiki loñge mut, le Yézabel a bi nol. A bi nol ngandak bôt ipe, i i bé gwés Yéhôva. A bé bégés bisat, a boñok mam mabe mape. Yéhôva a bé tehe mam mabe momasôna Yézabel a bé boñ. Kii Yéhôva a bé le a boñ nye?

I mbus nyemb Ahab, man wé Yôram a yila kiñe. Yéhôva a bi ep mut wada le Yéhu inyu kogse Yézabel ni lihaa jé.

Yéhu a bet i ngii kak yé, a ke i Yézréel het Yézabel a bé. Yak Yôram a bet i ngii kak yé i boma Yéhu, a bat nye le: ‘Baa nsañ u yé ipôla yés?’ Yéhu a timbhe le: ‘Umbe nsañ u nla ba ntel nyuñ Yézabel a mboñ bibéba bi mam kiyaga.’ Yôram a hiel hosi yé, a noode ke ngwéé. Ndi Yéhu a yoñ mpihlôngô wé, a ôm nye likoñ, Yôram a wo.

Yéhu a ke i yale Yézabel. Kiki Yézabel a nok bañ le Yéhu a yé njel, a pén su wé, a eñg ño wé, a kahal peble i winda. Kiki Yéhu a mbol, Yézabel a yéga nye ni diyana. Yéhu a pot makeñi, a kal bagwélél ba Yézabel le: “Leña nye isi!” Ba pémhene nye i winda, a kwo isi, a wo.

Mbus hala, Yéhu a nol 70 ma bon bôlôm ba Ahab, a mélés base i Baal. Baa u ntehe bé le Yéhôva a nyi mam momasôna, a yik ki imbe ngéda a nlona kogse inyu bet ba mboñ béba?