Añgel i Yéhôva i nsôñ Kiñe Hézékia

Jom li matén ma ane i Israel ma bé i si énél i Lôk Asiria. Ndi nano Sanakérib, kiñe Asiria, a bé sômbôl yoñ yak matén ima ma ane i Yuda. A bi bôdôl yoñ bitison bi Yuda, yada ni yada. Ndi i tison a bé yéñ tôbôtôbô i bé Yérusalem. Jam Sanakérib a bé yi bé, li bé le, Yéhôva a bé tat Yérusalem.

Hézékia, kiñe Yuda, a bi ti Sanakérib ngandak moni inyu boñ le a nwas Yérusalem nwee. To hala kiki Sanakérib a bi yoñ moni, a bi témb a ep ntôñ wé gwét i jôs Yérusalem. Bôt ba tison ba bé kon woñi, inyule Lôk Asiria i bé tiige bebee, tiige ni tiige. Jon Hézékia a kal bo le: ‘Ni kon bañ woñi. Lôk Asiria i gwé ngui, ndi Yéhôva a ga boñ le di bana ngui iloo bo.’

Sanakérib a bi ep nlegel wé manwin le Rabsaké i Yérusalem inyu wéha Lôk Yuda nyuu. Rabsaké a telep i mbus lipénd, a pot makeñi le: ‘Yéhôva a ga hôla bé bé. Ni emble bañ bitembee bi Hézékia. Nyambe to wada a nla bé nsôñ bé i moo més.’

Hézékia a bi bat Yéhôva kii a nlama boñ. Yéhôva a timbhe le: ‘I yom Rabsaké a nkal i kônha bañ bé woñi. Sanakérib a ga yoñ bé Yérusalem.’ I mbus hala, Sanakérib a éble Hézékia bikaat. Bikaat bi, bi bé kal le: ‘Tina moo. Yéhôva a nla bé tohol bé.’ Hézékia a bi soohe le: ‘Soho, a Yéhôva, sôñ bés, inyu boñ le bôt bobasôna ba yi le wetama wen u yé bañga Djob.’ Yehôva a timbhe nye le: ‘Kiñe Asiria i ga jôp bé i Yérusalem. M’a sôñ tison yem.’

Sanakérib a bé nkwook nkaa le ndék ngéda, Yérusalem a ga ba i moo mé. Ndi u wada, Yéhôva a ep añgel yada i het bisônda bi Asiria bi bi oñ libôga jap. Añgel i bi nol 185 000 ma bisônda! Kiñe Sanakérib a nimis mimpémba nwé mi bisônda. A bééna bé njel ipe, ndik le a huu i mbai yé, ba ma yémbél nye. Yéhôva a bi sôñ Hézékia ni Yérusalem, kiki a bi bôn bo. Ibale u ba i Yérusalem ha ngéda i, baa ki u bi bôdôl Yéhôva ñem?