Ane i i ga nom mba ni mba

U wada, Kiñe Nébukadnézar a bi emel jam li bi kônha nye woñi. Li bi tééñga nye kayéle hilo hi ke nye ngwéé. A sébél bôt bé ba makañ, a kal bo le: ‘Toñlana me eem yem.’ Ba kal le: ‘A kiñe, ngo kal bés eem yoñ.’ Ndi Nébukadnézar a timbhe bo le: ‘To jam! N’a kal me jam me ñemel, he la bé, me nol bé.’ Ba kônde ki kal nye le: ‘Bôk kal bés jam u ñemel, ndi nano bés di ga la toñol jo.’ A kal le: ‘Bébobasôna ni nyéñ tembee me. Kala me jam me ñemel!’ Ba kal kiñe le: ‘Mut a ta bé hana isi nu a nla boñ jam kiñe i mbat. Jam u mbat li nla bé bôña.’

Nébukadnézar a unup ngandak, kayéle a ti oda le ba nol bôt ba pék bobasôna ba loñ. Daniel, Sadrak, Mésak, ni Abed-négô, ba bé ikété nsoñgi u bôt ba. Daniel a soohe kiñe le i ti nye ndék ngéda. Nye ni mawanda mé, ba yemhe Yéhôva ikété masoohe, ba bat nye mahôla. Baa kii Yéhôva a bi boñ?

Ikété yiinda, Yéhôva a éba Daniel eem i Nébukadnézar, a kal ki nye kii hala a nkobla. Hilo hi bé noñ ha, Daniel a ke bisu bi ngwélél kiñe, a kal nye le: ‘U nol bañ mut pék to wada. Me nla toñol eem i kiñe.’ Ngwélél a jôbna Daniel bisu bi Nébukadnézar. Daniel a kal kiñe le: ‘Nyambe a ñunda we mam ma nke lo. Eem yoñ ini: U bi tehe soso ôñgba ni ño u gôl, tôl ni bitjep ni moo bi bé silba, libum ni mabel bi bé mamuna, makôô ma éña (tole kei), ni mabal ma éña mpôdnaga ni biték. Ha nyen ngok yada i mogla i hikôa, i ôm ôñgba i mabal mé. Ôñgba i bugi ngéñ ngéñ, ni mbebi i kena gwo. Ndi ngok yomede i bi yila hikôa hikeñi, i yônôs ki hisi hiosôna.’

Daniel a kal ni le: ‘Hana nyen eem yoñ i nkobla: Ane yoñ yon i yé ño u gôl. Silba i yé ane i i nlo i mbus yoñ. Ndi mbus, ane ipe y’a ba wengoñle mamuna, y’a énél hisi hiosôna. Ane i i ga noñ ha mbus, y’a ba nledek kiki kei. Ane i nsôk y’a ba mbaglaga, ngim bipes i ledek kiki kei, bipes bipe bi tombok kiki biték. Inyu ngok i bi yila hikôa, Ane Djob i. Y’a bôk biane bini, ndi yomede y’a tééba mba ni mba.’

Nébukadnézar a ôôp, a ôm mbom isi, bisu bi Daniel. Kiñe i kal Daniel le: ‘Nyambe woñ nyen a nsoolene we eem ini. Djob lipe li ta bé kiki nye.’ Iloo le a nol Daniel, Nébukadnézar a téé nye i ngii bôt ba pék bobasôna, ni i ño u pes mbok Babilôn. Baa u ntehe lelaa Yéhôva a bi timbhe masoohe ma Daniel?