Muda i bee malép

Ngand Pasa i mal bañ tagbe, Yésu ni banigil bé ba tagbene i Samaria inyu témb i Galiléa. Bebee ni tison Sikar, Yésu a telep i homa ba nsébél le Lingen li Yakôb inyu noi; banigil bé ba ke yéñ bijek.

Muda wada a lo i ap malép. Yésu a kal nye le: “Ti me, me nyo.” Muda a timbhe nye le: ‘Inyuki u yé pôdôs me? Me yé muda Samaria. Lôk Yuda ni bôt ba Samaria ba mpôdha bé.’ Ndi Yésu a kal nye le: ‘Ibale u yik njee me yé, ki wen u mbat me malép, ndi me, me ti we malép ma niñ.’ Muda a bat nye le: ‘Kii hala a nkobla? U gwé bé to nlôñga malép.’ Ndi Yésu nye le: ‘Nu ni nu a nyo malép me nti nye, nyus y’a gwel ha bé nye.’ Muda a soohe: ‘A sañgô, ti me malép ma.’

Yésu a kônde kal nye le: ‘Ke lona nlô woñ hana bee.’ Muda a timbhe le: ‘Me gwé bé me nlôm.’ Yésu nye le: ‘U mpot maliga. U bi biiba ngélé itan, hanano u niñ ni mut nu a ta bé mbiibaga ni we.’ Muda nye le: ‘Me ntehe le u yé mpôdôl. Bôt ba loñ yem ba nhémle le di nla bégés Djob munu hikôa hini, ndi bé Lôk Yuda ni kal le ndik i Yérusalem nyen di nlama béghene. Me nhoñol le ngéda Mésia a ga lo, a ga niiga bés lelaa di bégés.’ Ndi Yésu a kal nye jam a mah yeelene bé mut numpe: ‘Men me yé Mésia.’

Muda a hoo ke i tison i kal bôt ba Samaria le: ‘Me nhoñol le me nléba Mésia. A nyi mam momasôna ma niñ yem. Loga, ni tehe bébomede!’ Ba noñ nye letee ni bee malép inyu emble biniigana bi Yésu.

Bôt ba Samaria ba naña Yésu i yén i tison yap. A tégbaha dilo diba i niiga bo, ngandak yap i hémle ki nye. Ba kal muda Samaria le: ‘Nano kiki di ñemble i mut munu, di nyi le a yé toi ntohol nkoñ isi.’