Yésu a ntugul Lasarô

Yésu a bééna mawanda maa ma ñem nyuu, ma bé niñ i tison Bétania. Môl map ma bé le Lasarô ni bilôk bi nyañ bi bôda biba, le Marta bo Maria. Kel yada, ngéda Yésu a bé uu nwii Lom Yordan, Marta bo Maria ba ômle nye nwin mbe: ‘Lasarô a nkon, béba ngandak. Soho pala lo!’ Ndi Yésu a bi hoo bé ke, a bi kônde bem dilo diba. Ndi a kal banigil bé le: ‘Bôga bés i Bétania. Lasarô a nke ’ilo, me yé ke nyoo i tôdôl nye.’ Baôma ba kal nye le: ‘Ndi ibale Lasarô a yé ’ilo, wee hala a ga hôla nye i témbna.’ Ha nyen Yésu a bi tibil toñle bo le: ‘Lasarô a nwo.’

I ngéda Yésu a bi bol i Bétania, hala a bé boñ dilo dina le ba bi jô Lasarô. Ngandak bôt i bi lo i lédés Marta bo Maria ñem. Marta a nok bañ le Yésu a nlo, a telep ngwéé ni ngwéé i ke boma nye, a kal nye le: “A Nwet, ibale bo ndi u bak hana, ki mankéé a nwo bé.” Yésu a añle nye le: ‘Manyuñ a ga témb i niñ. A Marta, baa u nhémle hala?’ Ndi a timbhe Yésu le: ‘Ñ, me nyi le a ga lo i kel bitugne.’ Yésu a kônde kal nye le: “Men me yé bitugne, me yé ki niñ.”

I mbus, Marta a ke tehe Maria, a añle nye le: ‘Yésu a yé hana.’ Maria a ôt ngwéé i boma Yésu, bôt ba noñok nye mbus. A kwél nye makôô a eek, ee ni ee. A kal Yésu le: “A Nwet, ibale u bak hana, ki mankéé a nwo bé!” Yésu a bi tehe lelaa i jam li, li bé sôghe Maria, nyemede a bôdôl ee. I ngéda bôt ba bi tehe gwiiha gwé, ba kal le: ‘Ñ, Yésu a gwéhék toi Lasarô.’ Ndi bôt bape ba badbaga le: ‘Inyuki a bi tohol ni bé liwanda jé?’ Nano kii Yésu a ga boñ?

Yésu a ke i soñ, soso ngok i bé yib lijubul. A kal le: ‘Héana ngok ini hana.’ Marta a kal le: ‘Ngo hala a mboñ dilo dina! A mbôdôl numb.’ Ndi ba bi héa ngok, Yésu a kahal soohe le: ‘A Ta, me nyéga mu kii u ñemble me. Me nyi le u ñemble me hiki ngéda, ndi me mpot makeñi inyu boñ le bana bôt ba yi le wen u ñom me.’ I mbus a sébél makeñi, a kal le: “A Lasarô, pam!” Hélha jam i bôña: Lasarô a pam i soñ, nkañak ni mabadô. Ndi Yésu a kal bo le: “Hohlana nye, nwaha nye, a kenek.”

Ngandak i i bi tehe jam li, i hémle Yésu. Ndi bape ba bi ke i añle jo Lôk Farisai. Ibôdôl ha nyen Farisai i bi kahal yéñ njel i nol Lasarô ni Yésu. Wada ikété 12 baôma le Yuda Iskariôt, a ke bisôsôli i boma Farisai, a bat bo le: ‘ N’a ti me tañlaa ibale me nhôla bé i gwel Yésu?’ Ba nôgla inyu 30 ma bipes bi silba, ndi Yuda a bôdôl yéñ manjel inyu boñ le Farisai i gwel Yésu.