Yésu a ntuge

I mbus nyemb Yésu, ngwañ mut wada le Yôsep, u bat Pilatô kunde i héa mim u Yésu i ngii kék. Yôsep a hoo mim binunumba, a lép ki wo ni loñge mboñ, a niñi wo ikété soñ i mondo. A yip lijubul li soñ ni soso ngok. Baéga biprisi ba kal Pilatô le: ‘Di nkon woñi le, ngim banigil i Yésu i ga nip mim wé, ndi ba kahal añal homa nyensôna le Yésu a ntémb i niñ.’ Jon Pilatô a timbhe bo le: ‘Kena, ni hémb ngok i lijubul, ni tat ki soñ.’

Dilo daa di tagbe bañ, bikegla tutu, ngim bôda i ke i soñ, i koba yo i néhi, ba ma nyuge ngok ipañ. Mukété soñ, añgel yada i añle bôda le: ‘Ni kon bañ woñi. Yésu a ntuglana. Ke kala banigil bé le ba kee i boma nye i Galiléa.’

Maria Magdaléna a pala ke i koba Pétrô bo Yôhanes. A añle bo le: ‘Mut a mbada mim u Yésu!’ Pétrô bo Yôhanes ba témb ngwéé i soñ. Kiki ba bi tehe yo hôlô, ba huu mambai map.

Maria a témb bañ, a tehe biañgel biba ikété soñ, a kal bo le: ‘Me nyi bé me hee homa ba mbiine Nwet wem.’ Ha nyen a bi tehe mut wada, a hoñol le ntat wom nu, a kal nye le: ‘A sañgô, soho kal me hee homa u mbiine nye.’ I ngéda mut nu a bi kal le: “A Maria!” kunda yada Maria a yi le Yésu nu. A lond: “A Let!” ndi a kabda nye. Yésu a kal nye le: ‘Ke kal bilôk bikéé le u ntehe me.’ Maria a pala ôt ngwéé i ke añle banigil le a ntehe Yésu.

Nlélém kel, banigil iba ba bé lôlak i Yérusalem, inyu ke Émaus. Mut wada a ada bo mu njel, a bat bo kii ba yé i kwélél. Ba timbhe nye le: ‘Baa u nok bé jam li ntagbe? Hala a yé dilo daa nano le baéga biprisi ba bi nol Yésu. Ndi ngim bôda i yé añal le a ntémb i niñ!’ Mut nu a bat bo le: ‘Baa ni nhémle bé bapôdôl? Bon ba bi kal le Kristô a bé lama wo, i mbus a tuge.’ I mut nu a kônde toñlene bo Bitilna. Ngéda ba bi pam i Émaus, banigil ba kal mut nu le a yégle ni bo. Ngéda je i kola bañ, mut nu a soohe, ha nyen ba bi yimbe le Yésu nu. Ni nye a nyoi bo mis.

Bana banigil iba ba ôt ngwéé i Yérusalem, i ndap baôma ba bé ba kôdi, ba añle bo kii yosôna i mpémél bo. Nlélém ngéda, kiki ba bé ba kôdi ikété ndap, Yésu a pémél bobasôna. Ndi baôma ba bi pala bé neebe le Yésu nu. Ha nyen a kal bo le: ‘Ni béñge moo mem; ni tihba ki me. I bé ntilga le Kristô a bé lama tuge ikété bawoga.’