Ni tééda bébomede ikété gwéha nyambe

1, 2. Kii di nla boñ inyu tééda bésbomede ikété gwéha Nyambe?

BÉS bobasôna di gwé ngôñ i ba mbôô ni i bana ngui. Jon di noode je loñge, di ban-ga lem i hianda minsôn, di yoñok ki matibla. Tolakii hala a nlôôha bat biliya, di yé maséé ni nseñ di nkôs i boñ biliya bi, jon di nwaa bé boñ hala. Ndi di gwé yak ngôñ i bana ngui, ni i ba mbôô i njel ipe.

² To ibale di bi bôdôl bana maada malam ni Yéhôva ngéda di bi tip bôdôl nigil i yi nye, di nlama ke ni bisu i lédés maada ma. Ngéda Yuda a bé ti bikristen makénd ni bini bibuk le, ni “tééda bébomede ikété gwéha Nyambe,” a bi unda kii i nla hôla bo i boñ hala. A bi kal bo le: “Lédhana bébomede ikété hémle nan i i nlôôha pubhaga.” (Yuda 20, 21, MN.) Kii ni di nla boñ inyu bana hémle i ngui?

KE NI BISU I HÔLÔS HÉMLE YOÑ

3-5. (a) Lelaa Satan a gwé ngôñ le u tehe matéak ma Yéhôva? (b) Lelaa u ntehe mambén ni matiñ ma Yéhôva?

³ I yé nseñ le wemede mede u ba nkwoog nkaa le mambén ma Yéhôva ma nlôôha ba malam. Satan a gwé ngôñ i yumus we, le u tehe le mambén ma Yéhôva ma nlôôha let, wengoñle u yé mok. A gwé ki ngôñ le u hoñol le u ga ba maséé ibale u nkit wemede kii i yé loñge ni kii i yé béba. Ibôdôl yaga i wom Éden, Satan a nyéñ le bôt ba bana mahoñol ma. (Bibôdle 3:1-6) A ngi kenek ni bisu i boñ hala i len ini.

⁴ Baa Satan a mpot maliga? Baa mambén ma Yéhôva ma nlôôha let? To jam. Inyu tibil nok, hégda le u yé hiôm i loñge wom het ba ntééda binuga. U mpam i ngim homa, u koba le lipénd li ngahi li nkéñ we njel. Bebek u nla kal le: ‘Inyuki lipénd lini li yé njel yem?’ Ndi ha ngéda i, u nok mbondo njéé i nkônd ii pes ipe i lipénd. Nano, lelaa w’a tehe lipénd li? U nkon maséé le lipénd lini li nsôñ we le mbondo njéé i mil bañ we! Matiñ ma Yéhôva ma yé kiki lipénd li, Nsohop a bak kiki mbondo njéé. Bañga i Djob i mbéhe bés le: “Ni ambak manyuu, ni yénak ki péé! Inyule nkolba nan le Nsohop a nhiôm kiki mbondo njéé le i nkônd, a yéñék nwet a mil.”​—1 Pétrô 5:8.

⁵ Yéhôva a gwé ngôñ le di bana niñ lam kiyaga. A gwé bé ngôñ le Satan a lôk bés. Inyu hala nyen a bi ti bés mambén ni matiñ inyu sôñ bés, ni i ba maséé. (Efésô 6:11) Yakôbô a tila le: “Nu a nwan mbén i yôni, ni i kunde, a téñép yaga i boñ hala . . . nyen a’ ba nsaibak inyu liboñok jé.”​—Yakôbô 1:25.

6. Lelaa di nla ba nkwoog nkaa le manjel ma Nyambe ma yé malam kiyaga?

⁶ Ngéda di noñ maéba ma Yéhôva, hala a nlémés niñ yés, a lédhak ki liwanda jés lôñni nye. Kiki hihéga, di ñôt nseñ ngéda di neebe nsébla wé i bana lem i soohe nye. (Matéô 6:5-8; 1 Tésalônika 5:17) Di yé maséé ngéda di noñ maéba mé i kodba inyu bégés nye, i tina makénd bés ni bés, ni i ngéda di nyoñ ngaba i yôni i nson u ñañ nlam ni u niiga bôt. (Matéô 28:19, 20; Galatia 6:2; Lôk Héber 10:24, 25) Ngeñ di nhoñol lelaa mam mana ma nhôla bés i tééda hémle i ngui, hala a nkônde ki kwés bés nkaa le manjel ma Yéhôva ma yé malam kiyaga.

7, 8. Kii i ga hôla bés i keñgle lem i lôôha tôñ inyu manoodana ma ma nla kwél bés dilo di nlo?

⁷ Di nla kon woñi le i dilo di nlo, di ga boma manoodana ma ma ga lôôha ba ndutu inyu yés. Ibale u ma nôgda hala, bigda bibañga bi Yéhôva bini le: “Men me yé Yéhôva Nyambe woñ, Nu a niiga we, le hala a bahle we, Nu ki a nhiômna we njel u kôli kil. Éé, ki u bi léglak to matiñ mem maôô! Ha nyen nsañ woñ u bak le u yila kiki lom, yak telepsép yoñ kiki minoñgo mi tuye.”​—Yésaya 48:17, 18.

⁸ Ngéda di nôgôl Yéhôva, nsañ wés u ga yila kiki lom nu a nsa bé, ni telepsép yés kiki minoñgo mi tuye mi mi nwaa bé bép i mbaa tuye. To kii i mpémél bés, di nla téñbe ni Nyambe. Bibel i mbôn le: “Bééga Yéhôva mbegee yoñ, a’ lédés we. A’ neebe bé kekikel le bôt ba téé sép ba piñgla.”​—Tjémbi 55:23.

BOÑ BILIYA I ‘YILA NHÔÔLAK MUT’

9, 10. I ba nhôôlak i pes mbuu i nkobla le kii?

⁹ Mu kiki di mba di nlédés maada més ni Yéhôva, hala nyen di ga “yila minhôôlak mi bôt.” (Lôk Héber 6:1, MN.) I ba nhôôlak i pes mbuu i nkobla le kii?

¹⁰ Di nyila bé nhôôlak kristen ndik inyule di mañap i pes minsôn. Inyu yila nhôôlak mut i pes mbuu, di nlama boñ le Yéhôva a ba Liwanda jés li ñem nyuu, ni le di tehe mam kiki a ntehe mo. (Yôhanes 4:23) Paul a tila le: “Inyule ba ba yé isi ane minsôn ba ntôñ ndigi ni mam ma minsôn; ndi ba ba yé isi ane mbuu ba ntôñ ni mam ma mbuu.” (Rôma 8:5) Niñ i nhôôlak mut i pes mbuu i niñne bé i ngii mane ma niñ tole i ngii bigwel moo. Ndi, nhôôlak mut u mbok mahoñol mé momasôna i gwélél Yéhôva, u yoñok ki makidik malam i niñ yé. (Bingéngén 27:11; añ Yakôbô 1:2, 3.) Nya mut i, i nwas bé le béba i ane nye. Nhôôlak mut i pes mbuu u nyi i yom i yé loñge, u nyoñ ki makidik i boñ yo.

11, 12. (a) Kii Paul a bi kal inyu ngap bikristen bi nlama bana i “yi bagal jam lilam ni jam libe”? (b) Lelaa i yila nhôôlak kristen i pes mbuu i yé nlélém kiki i yila mut mintuk nu likeñge?

¹¹ Hala a mbat biliya bi ngui inyu yila nhôôlak mut i pes mbuu. Ñôma Paul a tila le: “Bañga bijek i yé inyu binéñha bi bôt, bi bi nhianda [bi nhôlôs ngap yap] ikété mahoñol map le ba yi bagal jam lilam ni jam libe.” (Lôk Héber 5:14) I buk ini le ‘hianda’ i nhôñlaha bés lihianda li minsôn li batuk ba ba nkôôba pémsan.

¹² Ngéda di ntehe mut mintuk a nhianda minsôn, a ban-ga likeñge li ntuk, di nyi ntiik le hala a nyoñ nye ngéda i kôôba, ni biliya inyu hôlôs likeñge jé. A bi gwééna bé likeñge li. Ngéda man a ngwéé, a nyi bé lelaa a tibil gwélél moo mé ni makôô mé. Ndi kiki ngéda i ntagbe, a nigil lelaa ba ngwel gwom ni lelaa ba nke. Mu kii a nhianda minsôn nwé, a nhôlôs ngap yé ndék ni ndék, a nla ni bana likeñge li mintuk. Nlélém jam inyu yés ngéda di nsômbôl yila minhôôlak mi bikristen, hala a mbat bés ngandak ngéda ni ngandak biliya.

13. Kii i ga hôla bés i hoñol kiki Yéhôva a nhoñol?

¹³ Munu kaat ini, di nigil lelaa di nla hoñol kiki Yéhôva a nhoñol, ni tehe mam kiki a ntehe mo. Di nigil ki i diihe ni i gwés mabéhna ma Yéhôva. Ngéda di nyoñ makidik, di nla badba le: ‘Mambe mambén tole matiñ ma Bibel ma ntihba i jam lini? Lelaa me nla bii mo i bisélél? Kii Yéhôva a ngwés le me boñ?’​—Añ Bingéngén 3:5, 6; Yakôbô 1:5.

14. Kii di nlama boñ inyu hôlôs hémle yés?

¹⁴ Di nlama bé waa kéñbaha hémle yés inyu Yéhôva. Kiki i je bijek bilam i nhôla bés i bana ngui minsôn, hala ki nyen i nigil i yi Yéhôva i nhôla bés i lédés hémle yés. Ngéda di bi bôdôl yigil i Bibel, di bi nigil biniigana bi bisu inyu Yéhôva ni manjel mé. Ndi kiki ngéda i ntagbe, di gwé ngôñ i nok ndip biniigana. Gwon Paul a bé pôdôl ngéda a kal le: “Bañga bijek i yé inyu binéñha bi bôt.” Ngéda di mbii mam di nigil i bisélél, di nkôhna bañga pék. Bibel i niiga bés le: ‘Pék i yé jam li nlôôha nseñ.’​—Bingéngén 4:5-7; 1 Pétrô 2:2.

15. Inyuki i yé nseñ i gwés Yéhôva ni lôk kéé yés i bôlôm ni i bôda bañga bañga?

¹⁵ Mut a nla bana ngui, a bak ki mbôô, ndi a nyi le a nlama kônde ke ni bisu i je loñge ni i bôñgôl nyuu yé ibale a ngwés tééda mbôô wé. Nlélém jam i pes mbuu, nhôôlak mut u nyi le u nlama boñ biliya ngandak inyu tééda maada ma bas bas ni Yéhôva. Paul a mbigdaha bés le: “Bébomede, noodana miñem minan, le too hémle nan i yé bañga; wana yaga bébomede.” (2 Korintô 13:5) I mbéda ndik bé bés hémle i ngui. Ndi, yak le gwéha yés inyu Yéhôva ni lôk kéé yés i bôlôm ni i bôda i ke ni bisu i hol. Paul a kal le: ‘Ibale me gwé . . . yi yosôna, to me mbana yaga hémle yosôna, kayéle me heñlak dikôa, ndi me bana bé me gwéha, wee me ta bé me to jam.”​—1 Korintô 13:1-3.

BOK MIS I NGII BOTÑEM YOÑ

16. Satan a gwé ngôñ le di hoñol lelaa?

¹⁶ Satan a ngwés tinde bés i hoñol le di ta bé le di ba loñge i nya i nlémél Yéhôva. A ngwés le di tomb, ni le di hoñol le mandutu més ma nla bé mal. A ngwés bé le di bôdôl lôk kéé yés ñem; a gwé bé to ngôñ le di ba maséé. (Efésô 2:2) Satan a nyi le mahoñol mabe ma, ma nla tééñga bés, ma ôbôs ki maada més ni Nyambe. Ndi Yéhôva a bi ti bés jam li nla hôla bés i yémbél mahoñol mabe. A bi ti bés botñem.

17. Inyuki botñem i yé nseñ?

¹⁷ I kaat 1 Tésalônika 5:8, Bibel i nhégha botñem yés ni mbéla, tole kôñgô i i nsôñ ño u sônda i gwét; i nsébél kôñgô i le: “Botñem i tohi.” Botñem di gwé inyu mimbônga mi Yéhôva i nla tat mahoñol més, i hôla ki bés i yémbél mahoñol mabe.

18, 19. Lelaa botñem i bi ti Yésu ngui i hônba mandutu?

¹⁸ Botñem Yésu a bééna i bé lédés nye. I u u nsôk i niñ yé hana isi, a bi boma ngandak mandutu. Liwanda jé li ñem nyuu li bi liibana nye. Lipe li tañ le li nyi bé nye. Bana bape ba tjôô nye, ba ke ngwéé. Bôt ba litén jé ba tañba nye, ba badak le ba kép nye mbai ikepam i nyemb. Kii i bi hôla nye i hônba mandutu ma? “Inyu maséé ma ba nye i bisu, a bi hônba kék njiiha, a yan wonyuu, a yén ki i woo walôm u yééne ane i Nyambe.”​—Lôk Héber 12:2, MN.

¹⁹ Yésu a bé yi le ibale a nhônba ipam lisuk, hala a bé lama ti Isañ lipém, ni i unda ki le Satan a yé mut bitembee. Botñem i, i bé ti Yésu maséé makeñi. A bé yi ki le, ndék ngéda a ga témb i ngii yak Isañ. Botñem i, i bi hôla nye i hônba. Kiki Yésu, di nlama bok mis i ngii botñem yés. I ga hôla bés i hônba to imbe ndutu di mboma.

20. Kii i nla hôla we i tééda litehge lilam?

²⁰ Yéhôva a ntehe hémle yoñ, a ntehe ki lelaa u nhônba mandutu. (Yésaya 30:18; añ Malaki 3:10.) A mbôn le “a’ ti we mam ma nkon we ngôñ.” (Tjémbi 37:4) Jon, ke ni bisu i bok mahoñol moñ i ngii botñem yoñ. Satan a gwé ngôñ le u nimis botñem, ni le u hoñol le mimbônga mi Yéhôva mi ga yon bé. Ndi, nwas bañ le mahoñol mabe ma, ma tômbôs we! Ibale u nôgda le botñem yoñ i nkahal sôs, bat Yéhôva mahôla. Bigda bibañga bi bi mpémél i kaat Filipi 4:6, 7 bi bi nkal le: “Ni tôñ bañ inyu jam jo ki jo, ndi yiha Nyambe mam ni nsômbôl, ni ti ki nye mayéga manjel momasôna ngéda ni nsoohe nye ni yemhe nye. Ndi nsañ Nyambe u u nloo mahoñol momasôna w’a tat miñem minan ni mahoñol manan i Kristô Yésu.”

21, 22. (a) Kii i yé bitééne bi Yéhôva inyu hisi? (b) Mambe makidik u nyoñ?

²¹ Yoñ ngéda i soñda mu dilo dilam di nkôôge bebee. Ndék ngéda, bôt bobasôna ba ga bégés ndik Yéhôva nyetama. (Masoola 7:9, 14) Hoñol ki niñ lam i ga ba i mbok yondo. Niñ i, i ga lôôha ba lam i nya i u nla bé hégda! Satan, mimbuu nwé mimbe, ni bibéba bi mam gwobisôna, b’a ba ha bé. U ga kon ha bé, u ga wo bé ki to. Ndi, u ga tôde hiki kel nyonok ni ngui, ni maséé i ba i niñ. Bôt bobasôna ba ga sal ntôñ i yilha hisi paradis. Bôt bobasôna ba ga bana bijek bilam, ni homa liyééne i het yom yo ki yo y’a kônha ha bé bo woñi. Bôt b’a gwés ha bé bisañ tole njôô, ndi b’a gwéhna bo ni bo. Ha ngéda i, bôt ba binam ba nkoñ isi wonsôna ba ga ba maséé i “ba ngwélés ikété lipém kiki bon ba Nyambe.”​—Rôma 8:21.

²² Yéhôva a gwé ngôñ le u yoñ nye kiki Liwanda joñ li ñem nyuu. Jon hiki kel, boñ kii yosôna u nla inyu nôgôl Yéhôva ni i kôôge nye bebee. Ñ, bés bobasôna di boñ kii yosôna di nla inyu tééda bésbomede ikété gwéha Nyambe i boga ni boga!​—Yuda 21.