PES 12

Kii i nla hôla we i kena yigil yoñ Bibel ni bisu?

Kiki kaat i mapep

I nigil Bibel i yé jam li mahee, ndi hala a ntomb bé i boñ. Ngim mangéda u nla badba too w’a la ke ni bisu i nigil Bibel. Inyuki i yé nseñ i ke ni bisu i boñ biliya i nigil Bibel? Kii i nla hôla we i téñbe to ibale u mboma mandutu?

1. Inyuki i nigil Bibel i yé mahee?

“Bañga i Nyambe i yé yômi, i gwé ki ngui.” (Lôk Héber 4:12) Bibel i yé mahee inyule i nyelel mahoñol ma Djob ni i yom a nôgda inyu yés. I nhôla ndik bé we i bana bañga yi, ndi i nhôla yak we i bana pék ni botñem. Ndi i jam li nlôôha ba nseñ li yé le Bibel i nhôla we i yila liwanda li Yéhôva. Ngéda u nigil Bibel, u nti yo pôla i lémés niñ yoñ.

2. Inyuki i yé nseñ i diihe maliga ma yé ikété Bibel?

Maliga di nléba ikété Bibel ma gwé mahee. Inyu hala nyen Bibel i nti bés makénd i ngéda i nkal le: “Somb maliga ndi u nuñlak bañ mo.” (Bingéngén 23:23) Ibale di ndiihe maliga ma yé ikété Bibel, hala a nhôla bés i ke ni bisu i nigil yo to ibale di mboma mandutu.—Añ Bingéngén 2:4, 5.

3. Lelaa Yéhôva a nla hôla we i ke ni bisu i nigil Bibel?

Nhek woñ ni liwanda joñ le Yéhôva a ngwés le u yi njee a yé. A nla ti we “ngôñ lôñni ngui i boñ mam.” (Añ Filipi 2:13.) Jon, ibale u gwé ngôñ ni makénd i nigil ni i bii i mam u nigil bisélél, a nla hôla we. Ibale u gwé ngôñ le a ti we ngui inyu yémbél ngolba tole manoodana, a nla ti we yo. Hiki ngéda, bat Yéhôva mahôla ikété masoohe inyu ke ni bisu i nigil Bibel.—1 Tésalônika 5:17.

KÔNDE TÉM

Béñge lelaa u nla kena yigil yoñ Bibel ni bisu to ibale u pégi tole bôt ba nkolba we. I mbus tehe lelaa Yéhôva a nla hôla we i téñbe.

4. Diihe yigil yoñ i Bibel

Ngim mangéda di gwé ngandak mam i i mpégdaha bés, kayéle di gwé ha bé ngéda inyu nigil Bibel. Kii i nla hôla bés? Añ Filipi 1:10, i mbus ni kwélél mambadga mana:

U nhoñol le mambe “mam ma nlôôha ba nseñ” ikété niñ?
Lelaa u nla boñ kayéle yigil yoñ i Bibel i yila jam li bisu i niñ yoñ?

A. Bititii: Titii i i ñéba nlôñge a gwé lisege ni ngok. 1. Nwind lisege ni mbôm ngok. 2. Nlôñge nyônôk ni lisege. 3. Mbôm ngok i kéhi i ngii lisege ikété nlôñge.

B. Bititii: 1. Nlélém nwind u lisege u yé ipañ mbôm ngok. 2. Nlélém nlôñge u yé nyônôk ni mbôm ngok. 3. Lisege ni ngok bi yé ikété nlôñge, gwobiba bi nyônôs nlôñge. Ndék lisege i nyégle isi.

Ibale u gwé nlôñge ndi u bôk u ha lisege, ngok y’a jôp ha bé ngandak.
Ndi ibale u nyoñ nlélém nlôñge u ha ndugi ngok, lisege li ga jôp bebee le jolisôna. Nlélém i niñ yoñ, ibale u mboñ ndugi “i mam ma nlôôha ba nseñ” w’a bana ngéda inyu mana mam mape

I nigil Bibel i nyônôs ngôñ di gwé i yi Djob ni i bégés nye. Añ Matéô 5:3, i mbus ni kwélél mbadga ini:

Ibale u ndiihe yigil yoñ i Bibel, umbe nseñ u nla kôhna mu?

5. Téñbe i bisu bi ngolba

Bôt bape ba ga noode tômbôs we le u kena bañ yigil yoñ i Bibel ni bisu. Béñge hihéga hi Francesco. Tuk VIDÉÔ, i mbus ni kwélél mambadga mana.

VIDÉÔ: Njee a’ tiimba yuuga bôt kii bés? (5:22)

Bititii bi vidéô le ‘Njee a’ tiimba yuuga bôt kii bés.’ Francesco a nkal mawanda mé le a ga hiôm ha bé ni bo, a yé ke.

Kii mawanda ma Francesco ni lihaa jé ba bi boñ ngéda a bi bôdôl añle bo i mam a bé nigil?
Bimbe bisai ndéñbe yé i bi lona nye?

Añ 2 Timôtéô 2:24, 25, i mbus ni kwélél mambadga mana:

Kii mawanda moñ ni lihaa joñ ba nhoñol inyu yigil yoñ i Bibel?
Inoñnaga ni minlôñ mini, lelaa u nla timbhe i mut nu a ta bé maséé inyule u nigil Bibel? Inyuki?

6. Bat Yéhôva mahôla

Kiki di mba di nkôôge Yéhôva bebee, d’a bana ngôñ i kônde lémél nye. I nla bane bés ndutu i boñ ngim mahéñha inyu niñ inoñnaga ni matiñ ma Yéhôva. Ibale hala nyen u nôgda, u tomb bañ. Yéhôva a ga hôla we. Tuk VIDÉÔ, i mbus ni kwélél mambadga mana.

VIDÉÔ: Yéhôva a nhôla bés i lona mahéñha i niñ yés (3:56)

Mu vidéô, mambe mahéñha Jim a bi boñ inyu lémél Yéhôva?
Kii i nlémél we mu hihéga hié?

Añ Lôk Héber 11:6, i mbus ni kwélél mambadga mana:

Kii Yéhôva a ga boñ inyu bet ba mboñ “biliya bi ngui” inyu yi nye ni i lémél nye?
Yéhôva a ntehe biliya u mboñ inyu yi nye, kii hala a niiga we inyu yé?

BÔT BAPE BA NLA BAT LE: “Inyuki u nigil Bibel?”