Tibil pohol mawanda moñ

Bañga mawanda i nkéñbaha maséé més, i bak ki bebee i lédés bés i ngéda di mboma mandutu. Ndi, Bibel i mbéhe le bôt bobasôna bé bon ba yé mawanda malam. Lelaa u nla pohol biloñge bi mawanda? Béñge mambadga ma noñ ha.

1. Inyuki i yé loñge i pohol biloñge bi mawanda?

Di mbéna boñ i mam mawanda més ma mboñ. Di nkôna bilem gwap bilam ni bilem gwap bibe to ibale ni njel internet nyen di ntégbaha ngéda ni bo. Kiki Bibel yomede i nkal le: “I mut a nhiôm ni bôt ba pék a’ bana pék, ndi nu a nkiha ni bijôñ bi bôt [hala wee i bôt ba ngwés bé Yéhôva] a’ nok ndutu.” (Bingéngén 13:20) Ibale u gwé mawanda ma ma ngwés Yéhôva, ma ga hôla we i yoñ makidik malam ni i yén bebee ni Yéhôva. Maselna ni hala, mawanda ma ma ngwélél bé Yéhôva ma nla tinde we i waa gwélél nye. Jon i nlôôha ba nseñ i tibil pohol mawanda moñ! Ibale mawanda més ma ngwés Yéhôva, ma ga tinde bés i bana bilem bilam, hala a ga ba nseñ inyu yés yak inyu yap. Kiki Bibel i nkal, ‘di ga ke ni bisu i tina makénd bés ni bés, ni i lédhana bés ni bés.’—1 Tésalônika 5:11.

2. Kii Yéhôva a nôgda i ngéda a ntehe mintén mi mawanda di mpohol?

Yéhôva a ntibil pohol mawanda mé. “A yé liwanda li bôt ba téé sép.” (Bingéngén 3:32) Kii Yéhôva a nla nôgda ibale a ntehe bés di mpohol mawanda ma ma ngwélél bé nye? Hala a ga tééñga nye ngandak! (Añ Yakôbô 4:4.) Maselna ni hala, a ga ba liwanda jés ibale di ntjél bilôñ bibe, di pohol ki i ba liwanda jé ni li bôt ba ngwés nye.—Tjémbi 15:1-4.

KÔNDE TÉM

3. Yoñ yihe ni bilôñ bibe

I bôt ba ngwés bé Djob ni matiñ mé ba ta bé biloñge bi mawanda inyu kristen. Tuk VIDÉÔ, i mbus ni kwélél mbadga ini:

VIDÉÔ: Nigil i tjôô bilôñ bibe (6:17)

• Lelaa di nla bôdôl bana bilôñ bibe ibabé le di yi hala?

Añ 1 Korintô 15:33, i mbus ni kwélél mambadga mana:

• Kii i nla yis we le mut a yé lôñ ibe inyu yoñ? Inyuki u nkal hala?

Añ Tjémbi 119:63, i mbus ni kwélél mbadga ini:

• Njee u nlama pohol kiki liwanda?

4. Mut nu a yé maselna ni bés a nla ba liwanda jés

Bibel i nti bés loñge ndémbél i bôt ba ba bé mawanda, David bo Yônatan. Ba bé maselna, wada a bé ntat bilém, nuu numpe a bak man kiñe; ba bééna bé to minlélém mi nwii. Añ 1 Samuel 18:1, i mbus ni kwélél i mbadga ini:

• Inyuki mawanda més ma nlama ndigi bé ba bisega gwés, tole ba bana nlélém nkôm niñ kiki bés?

Añ Rôma 1:11, 12, i mbus ni kwélél i mbadga ini:

• Lelaa mawanda ma ma ngwés Yéhôva, ma nla tina makénd wada ni nuu?

Béñge vidéô i i ñéba mañge wanda nu a mbot liwanda ni mankéé nu a nloo nye nwii huum. Tuk VIDÉÔ, i mbus ni kwélél mambadga mana:

VIDÉÔ: I bot liwanda i bahoma u hoñlak bé (5:06)

• Inyuki bagwal ba Akil ba bé gwés bé mawanda mé ma suklu?

• Kii i bi tinde nye i bana mawanda i suklu?

• Kii i bi hôla nye i nôgda le a ta ha bé nyetama?

5. Lelaa u nla bot bañga mawanda?

VIDÉÔ: Njee a yé bañga liwanda? (4:14)

Añ Bingéngén 18:24 ni 27:17, i mbus ni kwélél mambadga mana:

• Lelaa bañga mawanda i nla hôlna?

• Baa yak we u ma bana ntén liwanda u? Ibale to, lelaa yak we u nla boñ inyu bana bañga liwanda?

Añ Filipi 2:4, i mbus ni kwélél i mbadga ini:

• Inyu bana biloñge bi mawanda, wemede u nlama ba loñge liwanda. Lelaa u nla ba loñge liwanda?

I SEM KWEP

Ibale di mpohol biloñge bi mawanda, di ga kônha Yéhôva maséé, di kôhna ki ngandak bisai.

Mambadga ma mbigda

• Inyuki mawanda més ma nlama lémél Yéhôva?

• Mimbe mintén mi mawanda di nlama tjél?

• Lelaa di nla bot biloñge bi mawanda?

KÔNDE YÉÑ

Béñge lelaa bañga mawanda i nla hôla bés i ngéda mandutu.

“Yéñ bañga mawanda kiki lisuk li yé bebee” (Nkum Ntat Maye sép 2019)

Béñge i mam ma nla hôla we i bot biloñge bi mawanda.

“Comment choisir mes amis?” (Les jeunes s’interrogent. Réponses pratiques, Volume 1, chapitre 8)

Kii u nlama yi inyu mawanda ma internet?

Gwélél minkwel i internet ni pék (4:12)

Ñañ u mut wada “J’avais tant besoin d’un père !” u u ñéba lelaa a bi pam i bana makénd i héñha mawanda mé.

“La Bible transforme des vies” (Tour de Garde 1er mai, 2012)