“Nson u yé ngandak”

LIKODA likeñi li yé tagbe i Yérusalem. Kiñe David a nkot bon bé, baane ba mintôñ nwé, lôñni mimpémba nwé mi bôt. Bana bôt bobasôna ba yé maséé i nok nlegla u tôbôtôbô. Yéhôva a nti Salômô, man David, bôlô i oñ ndap i tôbôtôbô inyu bégés Djob li maliga. Yéhôva a bi toñle David lelaa a nlama oñ i ndap i, yak David a ntoñle Salômô kii i nlama bôña. David a nkal le: “Nson u yé ngandak; inyule témpel i, i ta bé inyu mut binam ndi inyu Yéhôva Nyambe.”—1 Miñañ 28:1, 2, 6, 11, 12; 29:1.

I mbus, David a mbat ini mbadga le: “Njee ni a nti likébla jé ni ngôñ ñem . . . inyu Yéhôva i len ini?” (1 Miñañ 29:5) Ibale u bé ha, ki u bi boñ lelaa? Baa ñem woñ u bé le u tinde we i nit nson nkeñi unu? Bon ba Israél ba bi bana ñem likap. I pot maliga, ba “bi hak, inyule ba ti makébla ni ngôñ yap ñem, lakii ba ti Yéhôva ni ñem wap ngim.”—1 Miñañ 29:9.

Mbôgôl i ñwii i mbus ha, Yéhôva a bi téé soso jam li li bé lôôha lel maoñ ma témpel. Yéhôva a bi téé soso témpel i mbuu, hala wee bitelbene bi bi nhôla bôt ba binam i kôôge nye bebee inyu bégés nye ni njel sesema i niñ i Yésu. (Lôk Héber 9:11, 12) I len ini, lelaa Yéhôva a nhôla bôt i sañgla ni nye? Ni njel nson u yilha bôt banigil. (Matéô 28:19, 20) Mahol ma nson unu ma mboñ le hiki ñwii, ba ntégbaha didun di gwibil bi Bibel, dikôô di banigil di nsôblana, yak mbôgôl ni mbôgôl makoda ma mondo ma ngwéé.

Nya mahol i i mbat le di pémés ngandak bikaat bi bi mpôdôl Bibel, le di oñ mandap ma Ane, di bôñgôl ki mo, ni le di somb ki bahoma inyu tégbaha makoda makeñi, ni makoda ma ndôn. Baa yak we u neebe le bôlô yés i añle bôt miñañ minlam mi Ane, i yé nson nkeñi, i bak ki nson u nlona bés bisai?—Matéô 24:14.

Gwéha inyu Djob, inyu bôt ba libôga jés, ni inyu gwel nson i añle bôt ñañ nlam bihôô bihôô, u ntinde bagwélél ba Djob i ‘ti Yéhôva makébla ni ngôñ ñem,’ ba boñok hala ni ñem wap wonsôna. Kinje jam lilam i ‘ti Yéhôva lipém ni nkus wés,’ ni i tehe lelaa nkol u maliga ni u pék u ngwélél bigwel moo gwés inyu yônôs nson u nlôôha ba nseñ ikété niñ i bôt ba binam! —Bingéngén 3:9.

Manjel inyu nit nson ni nkoñ isi wonsôna

Ngandak i len ini i ‘mbii’ ndék jam i pañ inyu boñ le, ngéda ba nke i makoda, ba la ha ndék moni ikété hikukuu het ba ntila le “Nson ni nkoñ isi wonsôna.” (1 Korintô 16:2) Hiki sôñ, makoda ma ñep moni nwap i hikuu hi Mbôgi Yéhôva hi loñ yap. Hiki hikuu hi loñ hi Mbôgi Yéhôva hi ngwélél ngim jôl ngomin a nyi. U nla gwélél i jôl li, inyu eplikébla joñ ngélé yada i hikuu hi loñ yoñ. Ndi inyu yi i jôl li, soho sébél hikuu hi loñ yoñ. U nla ki léba jo ni njel site internet yés le www. jw.org. Mintén mi makébla u nla ti, nwo mini le:

MAKÉBLA

U nla gwélél bisélél bi mondo inyu ep makébla moñ, kiki bo téléfôn, tablet, ni bisélél bipe kiki bi. I dikuu dipe, ba nla yak ep makébla ni njel site yés internet jw.org tole site internet ipe ba mpohol.
U nla ki ti gwom kiki bo moni, tik ngok, bienk bi nyañga, tole jam lipe li li yé joñ. I yé loñge le u tila man kaat inyu toñol le moni, tole i yom u ñep, i yé likébla.

I PÔÔS MONI

U nla ki pôôs ntôñ moni, u yik le u nla yoñ nwo ibale u gwé ngôñ i gwélél nwo.
I yé loñge le u tila man kaat inyu toñol le u yé i pôôs i moni mi.

MANJEL MAPE INYU TI MAKÉBLA

U héa moni, tole makébla mut a nla ti, manjel mape ma yé inyu ti makébla ma ma nit nson u Ane ni nkoñ isi wonsôna. Mon ma yé ntilga hana isi. To ibale u nyéñ gwélél njel yada mu, soho sébél ndugi hikuu hi loñ yoñ, inyu yi mambe manjel u nla gwélél. Kiki tas ni mambén ma nhéñha inoñnaga ni loñ, i yé ki nseñ ngandak le u kwel ni bañga mut mbén ilole u mpohol njel i nlôôha ba loñge inyu ti likébla joñ.

‘Assurance’ ni ‘pension’: Lini likébla li nti Mbôgi Yéhôva kunde i gwélél moni nwoñ mi ‘assurance vie,’ tole mi ‘pension.’

Moni u ntééda i bank: Lini likébla li nti Mbôgi Yéhôva kunde i gwélél moni u ntééda i bank, tole i yoñ nwo ibale u nwo, inoñnaga ni bitelbene bank i nyoñ.

Bigwel moo (Actions et obligations): Lini likébla li nti Mbôgi Yéhôva kunde i gwélél bigwel moo gwoñ, tole u nla sane man kaat nu a nti bo kunde i yoñ gwo i mbus nyemb yoñ.

Hisi tole ndap: Lini likébla li nti Mbôgi Yéhôva kunde i gwélél hisi hioñ tole ndap yoñ. U nla ki pohol i ti likébla lini, to ibale u nkit le w’a kônde gwélél homa woñ ntel u yé i niñ.

I suhus tas: Lini likébla li nla boñ le Mbôgi Yéhôva i ti we mapep ma ma mboñ le ngomin a suhus tas u nsaa i nyeni.

Lilagle (Testament): Lini likébla li nti Mbôgi Yéhôva kunde i gwélél ligwañ joñ tole gwom gwoñ i mbus nyemb yoñ. Ngomin a nlama yi sômbôl yoñ, a nlama yak sane yo. Bebeg le ba nla suhus tas yoñ ibale u ngwélél njel ini.

Ini buk le “makébla” i nkobla le, inyu gwélél manjel mana, u nlama ndugi yén, u tjek mam moñ loñge. Inyu hôla bôt ba ba nyéñ nit nson ni nkoñ isi wonsôna ni njel makébla map, man kaat ni hop Ngisi le Charitable Planning to Benefit Kingdom Service Worldwide, i bi kôôbana inyu tibil toñol manjel bôt ba nla gwélél inyu ti makébla nano, tole i mbus ngéda. I man kaat nunu a yé yak ni hop Panya. Bebeg le mam momasôna ma yé ikété man kaat nunu ma mbéñge bé we, inyule mambén ma loñ yoñ ma yé mahéñha. Ndi, i ngéda ba ngwélél manjel ma inyu ti makébla map, ngandak i bi nit minson nwés mi bibégés ni mahôla di nti bôt ni nkoñ isi wonsôna ibabé le tas i yuune bo. Ibale man kaat nunu a ngwélana mu loñ yoñ, bat mañ u likoda nu a yé mut matila, le a ti we yo.

Inyu kôhna biniigana bipe, ke i homa ba ntila le “I ti likébla inyu nit nson wés ikété nkoñ isi wonsôna,” a yé isi lipep li maleege li site internet yés le jw.org, tole sébél hikuu hi loñ.