‘Mut likap a’ ba nsaibak’

IBÔDÔL behee, bisesema bi yé jam li mahee ikété bibégés bipubi. Bon ba Israel ba bééna lem i ti bisesema bi binuga, yak bikristen i len ini bi nyiba inyu ‘bisesema gwap bi bibégés’ bi mbéna ti. Ndi, bisesema bipe bi nlémél Djob. (Lôk Héber 13:15, 16) Bisesema bi, bi nlona maséé ni bisai, kiki di ga tehe mu dihéga di noñ ha.

Ngwélél Djob wada nu kôba, le Hana, a bééna ngôñ ikeñi i bana man, ndi a bé la bé gwal. Ikété masoohe, a kégél Yéhôva likak le ibale a ti nye man, a bé lama “ti Yéhôva nye dilo di niñ yé tjodisôna.” (1 Samuel 1:10, 11) Ngéda i bé tagbe bañ, Hana a yoñ jém, a gwal man munlôm nu jôl li bé le Samuel. Mbus a tilis Samuel méé, Hana a kena nye i lap Djob, kiki a bôn Yéhôva. Yéhôva a bi sayap Hana inyule a bé bebee i sem niñ yé inyu Yéhôva. A bi bana nsima i kôhna bon ba-tan bape, ndi Samuel a yila mpôdôl ni ntila Bibel.—1 Samuel 2:21.

Kiki Hana bo Samuel, i len ini, bikristen bi gwé nsima i ti niñ yap nkikip inyu gwélél Nhek wap. Yak Yésu a bôn le biliya gwobisôna di mboñ inyu bégés Yéhôva, bi ga lona bés bisai bi mbuma ñañ.—Markô 10:28-30.

I hiai bisu, muda wada nu a bé kristen, nu ba bé sébél le Dorkas (Tabita), a bé yiba inyu ‘minson nwé minlam ni makébla mé’—hala wee bisesema a bé boñ inyu hôla bôt bape. Ngoo le, a “kwo kon, a wo.” Hala a bi tééñga likoda jolisôna. Ngéda banigil ba bi nok le Pétrô a bé tagbe i libôga jap, ba bi soohe nye i pala lo. Ni hégda maséé ba bi nok ngéda Pétrô a bi lo, ndi a tugul Dorkas—hala a bé ngélé bisu le Bibel i kal le mpôdôl a nlona mut bitugne! (Minson mi baôma 9:36-41) Djob a bi hôya bé bisesema bi Dorkas a boñ. (Lôk Héber 6:10) Ñañ wé u muda likap, u bi téédana ikété Bañga i Djob inyu yés.

Yak ñôma Paul a bi yék ndémbél ilam i mut a bé ti ngéda yé inyu hôla bape. Ngéda a bé tilna lôk kéé yé i Korintô, Paul a kal le: “Me sem yaga ki memede, inyu mimbuu minan.” (2 Korintô 12:15) Mu mam a bi boma i niñ yé, Paul a bi nok le boñ sesema inyu bôt bape i nlona bés maséé—ndi iloo ki ha—i nlémél Yéhôva, i lon-ga bés bisai gwé.—Minson mi baôma 20:24, 35.

Ntiik, Yéhôva a yé maséé ngeñ di ngwélél ngéda yés, ni ngui yés inyu bugus gwéñe bi Ane, ni hôla bilôk bikéé bipe. Baa manjel mape ma yé, ma di nla gwélél inyu nit nson wés likalô? Ñ! U héya nson di nsélél nye ni gwéha, di nla ki ti Djob lipém ni moni di nti ni ngôñ yés. Mi nhôla i nit nson u añal miñañ minlam ni nkoñ isi wonsôna, hala a ntihba yak mahôla ma bagwelnson ba tôbôtôbô, ni basañal ba tôbôtôbô ba ba nsal i loñ ipe. Mi nhôla ki inyu ngôôba, ngobol bikaat ni bividéô, mi nhôla ki i ti lôk kéé mahôla i het bikuu bi nkwo, i oñ Mandap ma Ane ma mondo. Di nla ba nkwoog nkaa le ‘mut likap a’ saibana.’ Jam lipe li yé le, ngéda di nti Yéhôva nkus wés, di nti nye lipém.—Bingéngén 3:9; 22:9.

Manjel Bahogi Ba Mpohol Inyu Nit Nson Ni Nkoñ Isi Wonsôna

I dilo di ñôma Paul, ngandak i bé ‘bii ndék yom ipañ,’ tole i bé tééda ndék moni inyu ha nwo i hikukuu i Ndap Ane, i het ba ntila le “Nson ni nkoñ isi wonsôna.” (1 Korintô 16:2) Hiki sôñ, makoda ma ñep moni nwap i hikuu hi Mbôgi Yéhôva hi loñ yap. Hiki hikuu hi loñ hi Mbôgi Yéhôva hi ngwélél ngim jôl ngomin a nyi. U nla gwélél i jôl li, inyu ep likébla joñ ngélé yada i hikuu hi loñ yoñ. Ndi inyu yi i jôl li, soho sébél hikuu hi loñ yoñ. U nla ki léba jo ni njel site internet yés le www. jw.org. Mintén mi makébla u nla ti, nwo mini le:

MAKÉBLA

U nla gwélél bisélél bi mondo inyu ep makébla moñ, kiki bo téléfôn, tablet, ni bisélél bipe kiki bi. I dikuu dihogi, ba nla yak ep makébla ni njel site yés internet jw.org tole site internet ipe ba mpohol.
U nla ki ti gwom kiki bo moni, tik ngok, tole jam lipe li li yé joñ. I yé loñge le u tila man kaat inyu toñol le moni, tole i yom u ñep, i yé likébla.

I PÔÔS MONI

U nla ki pôôs ntôñ moni, u yik le u nla yoñ nwo ibale u gwé ngôñ i gwélél nwo.
I yé loñge le u tila man kaat inyu toñol le u yé pôôs i moni mi.

MANJEL MAPE INYU TI MAKÉBLA

U héya moni, tole makébla mut a nla ti, manjel mape ma yé inyu ti makébla ma ma nit nson u Ane ni nkoñ isi wonsôna. Mon ma yé ntilga hana isi. To ibale u nyéñ gwélél njel yada mu, soho sébél ndugi hikuu hi loñ yoñ, inyu yi mambe manjel u nla gwélél. Kiki tas ni mambén ma nhéñha inoñnaga ni loñ, i yé ki nseñ ngandak le u kwel ni bañga mut mbén inyu mam ma tas, ilole u mpohol njel i nlôôha ba loñge inyu ti likébla joñ.

Assurance ni Pension: Lini likébla li nti Mbôgi Yéhôva kunde i gwélél moni nwoñ mi assurance vie tole mi pension.

Moni u ntééda i bank: Lini likébla li nti Mbôgi Yéhôva kunde i gwélél moni u ntééda i bank, tole i yoñ nwo ibale u nwo, inoñnaga ni bitelbene bank i nyoñ.

Bigwel moo (Actions et obligations): Lini likébla li nti Mbôgi Yéhôva kunde i gwélél bigwel moo gwoñ, tole u nla sane man kaat nu a nti bo kunde i yoñ gwo i mbus nyemb yoñ.

Hisi tole ndap: Lini likébla li nti Mbôgi Yéhôva kunde i gwélél hisi hioñ tole ndap yoñ. U nla ki pohol i ti likébla lini, to ibale u nkit le w’a kônde gwélél homa woñ ntel u yé i niñ.

Lilagle (Testament): Likébla lini, li nti Mbôgi Yéhôva kunde i gwélél ligwañ joñ tole gwom gwoñ i mbus nyemb yoñ. Ngomin a nlama yi sômbôl yoñ, a nlama yak sane yo. Bebek le ba nla suhus tas yoñ ibale u ngwélél njel ini.

Ini buk le “makébla” i nkobla le, inyu gwélél manjel mana, u nlama ndugi yén, u tjek mam moñ loñge. Inyu hôla bôt ba ba nyéñ nit nson ni nkoñ isi wonsôna ni njel makébla map, man kaat ni hop Ngisi le Charitable Planning to Benefit Kingdom Service Worldwide, i bi kôôbana inyu tibil toñol manjel bôt ba nla gwélél inyu ti makébla nano, tole i mbus ngéda. I man kaat nunu a yé yak ni hop Panya. Bebek le mam momasôna ma yé ikété man kaat nunu ma mbéñge bé we, inyule mambén ma loñ yoñ ma yé mahéñha. Ndi, ngéda ba ngwélél manjel ma inyu ti makébla map, ngandak i bi nit minson nwés mi bibégés ni mahôla di nti bôt ni nkoñ isi wonsôna ibabé le tas i yuune bo. Ibale man kaat nunu a ngwéélana mu loñ yoñ, bat mañ u likoda u u yé mut matila, le a ti we yo.

Inyu kôhna biniigana bipe, ke i homa ba ntila le “I ti likébla inyu nit nson wés ikété nkoñ isi wonsôna,” a yé isi lipep li maleege li site internet yés le jw.org, tole sébél hikuu hi loñ.