Baa maéba ma Bibel ma yé mahee i len ini?

BAHOGI BO TO. Mut njôôñ yi wada, a nhégha i gwélél biniigana bi Bibel ni i gwélél nlômbi kaat u bi pam i nwii 1920 inyu niiga ndap suklu i len ini. I ngéda mut a nti bé Bibel lipém, a nla bat le, baa biniigana inyu kei i i bi pam behee bi nla gwélana inyu kei i i ntip pam? Hala wee, inyu yé, Bibel i bi ntagbe ngéda behee.

Kii yo i nla tinde mut i bilen bini, i ngéda bikei bikeñi bi ntôl, i ke yéñ maéba ikété nlômbi kaat? Ndi i bak le, ngandak bisit internet, le mut a nla bé to soñgol, bi nti bés maéba ma mondo hiki linut. Hiki ngéda, nkuu biliñliñge u nyôôs bés ni maéba ma bidokta, ma batila bikaat ni ma bipastô. Jam lipe li yé ki le, bisabe bi bikaat bi yôni ni bikaat bi nti maéba inyu yi lelaa u nla yémbél ngim mandutu ma niñ, bi kwéhak ki bôt bape mingwañ.

Ndi i ba ni le hiki linut di nkôs biniigana hala, umbe nseñ u yé i béñge Bibel​—nlômbi kaat u u bi mal tilba, hala a yé jam kiki bo 2 000 di nwii? Baa bangitophémle Bibel ba mpot bé maliga, i ngéda ba nkal le i gwélél yo inyu dilo tjés i yé wee i gwélél nlômbi kaat suklu u u mal tagbe ngéda, tole i gwélél nlômbi kaat maéba inyu yi gwélél ordinater i i ntip pam? I mahoñol ma, ma téé bé. Siañs ni teknôlôgi bi mpala héñha, ndi baa i mam mut binam a gwé ngôñ ma nhéñha? Bôt ba ngi yéñék inyuki ba niñ, ba nyéñ ki i bana ndék maséé, nwee, loñge niñ i ndap lihaa ni bañga mawanda.

To i ba yaa le Bibel i yé nlômbi kaat, i mpôdôl mam di gwé ngôñ, ni mam mape ki. I nkal ki le i nlôl ni Nhek wés. I nti bés biniigana inyu hiki jam li niñ, i kôôbaga ki bés i jôs to limbe linoodana di nla boma. (2 Timôtéô 3:16, 17) I nkônde ki kal le, maéba mé ma nom i mba ni mba​—mabéhna mé ma ga tagbe bé ngéda to kel yada! Bibel yomede i nkal le: “Bañga i Nyambe i yé yômi.”​—Lôk Héber 4:12.

Baa bipôdôl bi Bibel bi yé toi maliga? Baa i ntagbe ngéda, tole i yé kaat i nlôôha bana mahee ikété bikaat gwobisôna​—i ntiik, baa i yé toi yômi? I nomba Nkum Ntat ini, i yé i bisu ikété nomba ipe i tôbôtôbô i i ga pôdôl nlélém ño nkwel, i ga yéñ i hôla we i léba mandimbhe inyu mambadga mana.