Inyuki niñ i GWÉ mahee?

Faizal: Nwii wada i mbus nyemb i nwaa, ba bé lama kan nye inyule a bé kon i ñem. A nkal le: “Ngéda me bi añ kaat i Hiôb, me bi nôgda le yañga bé nyen Yéhôva a bi boñ le i tilba. Ngéda di nléba hihéga hi mut ikété Bibel nu yak nye a bi boma minlélém mi mandutu kiki bés, hala a nhôgbaha bés, a und-ga ki bés le niñ i ngi gwé mahee.”

Tarsa: A bé a ngi yii njohok ngéda nyañ a bi wo. A nkal le: “Niñ i ngi gwé njômbi inyule me nyi Nheg wem, hala a nti me botñem ni maséé to ibale me mboma to imbe ndutu. Yéhôva a gwé ngui i nit bés ni i hôla bés i tégbaha hiki hilo.”

I GWIGIL bi bi ntagbe bi ñunda mintén mi mam mi mi nla boñ le mut a tehe le niñ i gwé bé mahee. Ngéda u bééga mbegee i i nyidil we u nla badba too niñ i ngi gwé mahee tole baa mut a ntôñ we? Ba nkwoog nkaa le Nyambe a ntôñ we ni mandutu moñ. U yé tik i mis mé.

Ntila Hiémbi 86 a bi pahal bôdôl yé ipañ Djob. A kal le: “I kel me ntehe kuu m’a sébél we, inyule w’a timbhe me.” (Tjémbi 86:7) Jon u nla badba le: ‘Lelaa Djob a ga timbhe me “i kel me ntehe kuu”?’

To ibale Nyambe a mélés bé mandutu més nano, Bibel i nti bés botñem le a nla ti bés nsañ u u ga hôla bés i hônba. Bibel yomede i nkal le: “Ni tôñ bañ inyu jam jo ki jo, ndi yiha Nyambe mam ni nsômbôl, ni ti ki nye mayéga manjel momasôna ngéda ni nsoohe nye ni yemhe nye. Ndi nsañ Nyambe u u nloo mahoñol momasôna w’a tat miñem minan ni mahoñol manan.” (Filipi 4:6, 7) Soho béñge lelaa minlôñ mi Bibel mi mi noñ mi nla kwés we nkaa le Djob a ntôñ we.

Nyambe a ntôñ we

“To [hinuni] hiada mu hi nhôiba bé mis ma Nyambe. . . . Ni nloo ngandak diuuna.”—Lukas 12:6, 7.

HOÑOL KI LE: Dinuni ti di mpôôna le di gwé bé nseñ wo kiki wo, di gwé mahee i mis ma Djob. To hiuuna hiada yaga hi nset bé i mis ma Djob; hiki hiada mu hi yé tik hégél. Bôt ba binam ba gwé mahee ngandak iloo diuuna. Mut binam a yé hégél i Djob hana isi i i nhélhana. A bi héga i pôôna yé, a gwé ki ngap i sélés bilem bi Djob ni i unda le a gwé gwo.—Bibôdle 1:26, 27.

“A Yéhôva, u bi wan me, u yi ki me. . . . U ntibil yi mahoñol mem. . . . Wan me, . . . u yi ki mahoñol mem.”—Tjémbi 139:1, 2, 23.

HOÑOL KI LE: Djob a nyi we bañga liyik. A nyi mahoñol moñ ni mandutu moñ. To ibale bôt bape ba ntibil bé nok nduña yoñ, Nyambe nye a ntôñ we, a gwé ki ngôñ i hôla we. I yi mam mana i nhôla we i tehe le niñ i ngi gwé mahee.

Niñ yoñ i gwé mahee

“Emble masoohe mem, a Yéhôva, nlondok wem u mpam weeni. . . . Sédne me ôô; pala kôble me i kel me nsébél. . . . A bi emble masoohe ma ba ba nyend, a yan bé ki to masoohe map.”—Tjémbi 102:2, 3, 18.

HOÑOL KI LE: I mpôôna le i bibôdle bi ndutu i mut binam hana isi, Yéhôva a bééna ngim kôñtô inyu tééda i gwiiha bôt ba ma kôp hana isi. (Tjémbi 56:9) Yak gwiiha gwoñ bi yé mu. Nyambe a mbigda mandutu moñ ni gwiiha gwoñ inyule u yé nye tik.

“U kon bañ woñi . . . inyule men me yé Nyambe woñ. M’a ba me nti we ngui. Hodo, m’a hôla. . . . Inyule memede, Yéhôva Nyambe woñ . . . men m’a kôbda woo woñ walôm, me kal we le: ‘U kon bañ woñi. Men m’a hôla we.’”—Yésaya 41:10, 13.

HOÑOL KI LE: Nyambe a gwé ngôñ i hôla we. Ibale u nkwo, a ga téé we.

Botñem inyu bilôl bilam

“Inyule Nyambe a lôôha gwés nkoñ ’isi, jon a tine pombe yé Man, le tonjee a nhémle nye a’ nimil bé, ndi [a’ bana] niñ boga.”—Yôhanes 3:16.

HOÑOL KI LE: Djob a ngwés we i nya i yé le a bi neebe i sem Man wé Yésu kiki sesema inyu yoñ. I sesema i, i nti we botñem i niñ boga ni i mahee i mba ni mba.a

Tolakii mandutu ma nyuu we, u hoñlak ki le niñ yoñ i gwé ha bé ki mahee, we ke ndigi ni bisu i tibil nigil Bibel, u lédés ki hémle yoñ ni botñem yoñ inyu mimbônga mi Djob. Hala a ga ti we maséé ni bikwo bi nkaa le niñ i ngi gwé mahee.

a Inyu kôhna biniigana bipe inyu sesema i Yésu, béñge vidéô i i gwé ño le Mbigda i nyemb Yésu i www.pr2711.com. Ke i homa le BIKAAT > BIVIDÉÔ > MAKODA MÉS NI NSON WÉS.