Ngéda mut u ngwés a nwo

“Nyuu i bi sundi me ngéda mankéé nu munlôm nu mañ a bi wo mpuhge nyemb. To mbus ngandak sôñ, me ngi hoñlak nye, ñem u nsiida me, i pôônaga kiki bo le u mpédi. Mangéda mape, me yé me unup, me badbaga le: Inyuki mankéé a bi wo? Me yé me tam le me bi tégbaha bé ngandak ngéda lôñni nye.” —Vanessa, Ôstrélia.

IBALE nyemb i nyoñ we mut u ngwés, bebeg le yak we u ma tagbene i mam kiki bo: njôghe, i modop, ndi u sôk ki nôgda le ngui i yé mal we. bebeg ki le u yé u unup ngandak, u ômbaga nsohi, u konok ki woñi. Bebeg u ma badba ki too niñ i ngi gwé mahee.

Yi le i ee mut i ta bé bibomb. Hala a ñunda ndigi maada ni bééna. Ndi to hala, baa di nla kôhna ndék hogbe?

LELAA BAPE BA BI PAM I HÔNBA

To ibale i mpôôna le njôghe yoñ i mal bé, maéba ma ma noñ ha, ma nla hôgbaha we:

YOÑ NGÉDA NI NDUTU YOÑ

Bôt bobasôna ba nok bé njôghe nya yada; i njôghe i, i nom bé ki to nlélém ngéda. Ndi to hala, i ee mut woñ i nla hôla we i hônba. Vanessa, nu di ntip sima a nkal le: “Me bé gwés ndigi ee; me bééna ngôñ i hôgbaha ndutu yem.” Yak Sôfia nu manyañ nu muda a bi wo mpuhge nyemb a nkal le: “I neebe i mam me bé nôgda i bé me ndutu ngandak, i bé kiki bo i neebe njôghe i matibla ma poo. Njôghe i yé ikeñi ndi i nhôla i mbuubaha poo.”

KAL BAPE I YOM U NÔGDA

I pot maliga, ngim mangéda u nla bana ngôñ i ba wetama. Ndi njôghe i yé ngim mbegee i i nyét inyu boñ le u begee yo wetama. Yared, nu a gwé jôm li nwii ni misaambok a nhoñol ngéda a bi nimis pua yé. A ntoñol le: “Me bi toñle bôt bape kii me bé nôgda. Me nhoñol bé le ba bé nok yom me bé kal bo, ndi hala a bééne me loñge jam le me bi pot.” Janis, nu di bi pôdôl i yigil i bibôdle a nkal loñge jam ipe le: “I kwel ni bôt bape i bi hôgbaha me ngandak. Me bé nôgda le ba bé nok me, ni le me ta bé metama.”

NEEBE MAHÔLA

Dokta yada i bi kal le: “Mut nu a gwé maéya, ndi a nwas le mawanda mé ni lihaa jé ba hôla nye ngéda maéya ma ntip kwo, a gwé ngui i hônba njôghe i nyemb i mut wé.” Kal mawanda moñ i yom ba nla bôñôl we; bebeg le ba gwé ngôñ i hôla we, ndi ba nyi bé kii ba nla boñ.—Bingéngén 17:17.

KÔÔGE NYAMBE BEBEE

Tina a nkal le: “Ngéda kon pos u bi nol nlô wem, me bé bé ki le me kwel ni nye, jon me bé kal Djob mam mem momasôna! Hiki kel i bé ye, me bé bat nye le a hôla me i tégbaha hilo hi. Nyambe a bi hôla me iloo kiki me bé hoñol.” Tarsha nu a bi nimis m’ma yé a ban-ga 22 nwii, a nkal le: “I añ Bibel hiki kel i bé hôgbaha me ngandak. Hala a bé ti me ngui i ke ni bisu.”

BOK MAHOÑOL MOÑ NGII BITUGNE

Tina a nke ni bisu i kal le: “I bibôdle, botñem i bitugne i bi hôgbaha bé me inyule me bééna ngôñ ni nlô wem, i nlélém ngéda yak bon bem ba bôlôm ba bééna ngôñ ni isañ wap. Ndi, nwii mina i mbus ngéda, botñem yem inyu bitugne i bi let kayéle yon i nsôñ me le me yin bañ ikété njôghe. Me nhoñol ngéda me ga tiimba tehe nye, hala a ga lona me nsañ ni maséé!”

Bebeg u nok bé to ndék hogbe mu njôghe yoñ. Ndi hihéga hi Vanessa hi nla ti we ngui, a nkal le: “U nla hoñol le u ga pamba bé to kel, ndi ki le dilo dilam tjon di mbem we.”

U hôya bañ le, to ibale njôghe u nôgda i mal bé, niñ i ngi gwé mahee. Ni mahôla ma Nyambe, u nla bana mawanda malam, niñ yoñ ki i nla bana loñge njômbi. Ndék ngéda yaga ndigi, Djob a ga tugul bawoga. Sômbôl yé i yé le u témb u ba ni bet u bi nimis. Ha nyen i njôghe i yosôna u bé nôgda i ga mal i mba ni mba!

Minlôñ mi Bibel mi mi nla hôla we

Djob a ntehe gwiiha gwoñ ni njiiha yoñ.

Ntila Bibel wada a bi kal Djob le: “Ha gwiiha gwem ikété hibôi hioñ hi kôp. Baa bi ta bé ikété kaat yoñ?”—Tjémbi 56:9.

U nla toñle Djob mam momasôna u nôgda.

“Me nkôp njelel yem bisu [bi Djob] . . . Me bi lôndôl we, a Yéhôva.”a —Tjémbi 142:3, 6.

U nla bana botñem.

“Bitugne gw’a ba.”—Minson mi baôma 24:15.

Nyambe a mbôn le a ga tugul ngandak bôt i i gwé bé nsoñgi, a gwé ki ngôñ i boñ hala.b—Hiôb 14:14, 15.

a Yéhôva a yé jôl li Nyambe nu a mpôda ikété Bibel.

b Inyu kôhna biniigana bipe inyu bitugne, beñge pes 7 i kaat ini le Kii Bibel i niiga bés? Mbôgi Yéhôva yon i bi pémés yo, u nla ki yoñ yo ibabé i saa i www.pr2711.com.