Mankéé Numpe A Nkôndba i Juu Li Bakena Ntôñ

KEGLA i ngwa ngéé, hilo 24 hi sôñ Kondoñ, i nwii 2018, mahaa ma Bétel i Amérika ni i Kanada ma bi nok maséé ni unu nlegla u tôbôtôbô le: Mankéé Kenneth Cook, Jr., a nkôndba i Juu li bakena ntôñ li Mbôgi Yéhôva.

Mankéé Cook a bi gwéé, a nañ ki i ñemkété tison i Pennsylvania, i pes nwelmbok, i Amérika. Solôñ yé i suklu yada yon i bi niiga nye maliga, ndék ngéda ilole a mélés suklu i njohok bôt, a sôblana ki hilo 7 hi sôñ Hilônde, i nwii 1980. A bi bôdôl nson nsañal i ngéda yosôna hilo 1 hi sôñ Dipos, i nwii 1982. Mbus nwii ima mi nson kiki nsañal, ba bi naña nye i ke sal i Bétel, a bi bôdôl i Wallkill, i New York, hilo 12 hi sôñ Biôôm, i nwii 1984.

Mu 25 nwii mi ntagbe, mankéé Cook a nsal i homa ba mpémés bikaat, ni i man juu a nyoñ ndun ni basal i Bétel. A bi biiba ni Jamie i nwii 1996, boba ba bi ke ni bisu i sal i Bétel Wallkill. I sôñ Libuy li nyéé, i nwii 2009, ba bi om mankéé Cook bo nwaa i hikuu hi ntjega bisuklu i Patterson, i New York, i het mankéé Cook a bé lama sal i man juu inyu timbhe mambadga ma Bibel. I sôñ Matôp i nwii 2016, ba bi tiimba om mankéé Cook bo nwaa i Wallkill inyu ndék ngéda, mbus, ba om bo i Brooklyn, i New York. Sôñ itan mbus ngéda, ba sébél bo i Hikuu hikeñi hi Mbôgi Yéhôva i Warwick, i New York. I sôñ Kondoñ 2017, ba bi téé mankéé Cook nhôla i Juu li matila li bakena ntôñ.