Lôk kéé iba i ntip jôp i Juu li bakena ntôñ

I HILO 5 hi sôñ Biôôm, nwii 2024, ba bi legel nwin nlam i likoda li nwii, wo unu le: Mankéé Jody Jedele ni mankéé Jacob Rumph ba njôp i Juu li bakena ntôñ li Mbôgi Yéhôva. Bo iba ba ngwélél Yéhôva ngandak nwii nano.

Mankéé Jedele a bi gwéé i Missouri, nyoo Amérika, bagwal bé ba bé Mbôgi Yéhôva. Ba bé yééne bebee ni nkoñ wada i het Mbôgi Yéhôva i bé bé ngandak. Jon a bi meina ni ngandak lôk kéé i i bé lôl bahoma ni bahoma inyu añal ñañ nlam mu nkoñ u. I ngéda a bi tehe gwéha ni adna ipôla yap, hala a bi tihba nye ngandak. A bi sôblana a bak mañge, hala a bé i hilo 15 hi sôñ Biôôm, nwii 1983. A bé gwés likalô béba ngandak. I ngéda a bi net bacc, a yila nsañal nu ngéda yosôna i sôñ Dipos, nwii 1989.

I ngéda mankéé Jedele a bé mañge, bagwal bé ba bé kena nye ni manyañ nu muda i yuuga Bétel. Hala a bi boñ le ba yoñ makidik le ba ga sal i Bétel. Hala ki nyen ba bi boñ. Mankéé Jedele a bi bol i Bétel i Wallkill, i sôñ Dipos, nwii 1990. A bi sal ndugi ni lôk kéé i i mpubus Bétel. I mbus ngéda, a sal inyu mam ma dokta.

Ha ngéda i, makoda ni hop Panya ma ma bé ha bebee ma bé hol, i bé béda lôk kéé i bôlôm nyoo. Mankéé Jedele a bi ke i likoda jada mu, a bôdôl nigil hop Panya. A bé a yii, a boma sita Damaris, nu a bé nsañal mu nkoñ u. I mbus ngéda, ba biiba, Damaris a ke a koba nye i Bétel.

I nwii 2005, ba bi nyodi i Bétel inyu tééda bagwal bap. Mu ngéda i, ba bé basañal ba ngéda yosôna. Mankéé Jedele a bé niiga i Suklu basañal, a salak i Comité de liaison hospitalier, a salak ki ni lôk kéé i i ñoñ mandap ma ntôñ.

I nwii 2013, ba bi témb ba sébél mankéé Jedele bo nwaa i Bétel inyu maoñ ma Warwick. Ibôdôl ha ngéda i, ba bi sal nyoo, ba sal yak i Patterson ni i Wallkill. Mankéé Jedele a bi sal i LDC ni i Service d’information hospitalier. I sôñ Matumb, nwii 2023, ba bi téé nye nhôla i juu li nson. I ngéda a nhoñol minson nwominsôna a ma sal, a nkal le: “I ngéda ba mbééga we nson, u nla kônha we woñi. Ha nyen u nlama toi bôdôl Yéhôva ñem inyule ndik nyen a nla hôla bés i boñ to kii a nsômbôl le di boñ.”

Mankéé Rumph a bi gwéé i Californie, nyoo Amérika. I ngéda a bé mañge, nyañ a bé a ma sune, ndi to hala a bi niiga nye mam mahogi mu Bañga i Nyambe. Hiki nwii, a bé ke ki yak mbômbô yé nu a bé Mbôgi Yéhôva. Mbômbô yé a bé ti nye makénd. I ngéda a bi bolna 13 nwii, a bat le ba niiga nye Bibel. I hilo 27 hi sôñ Dipos, nwii 1992, a bi sôblana a bak a yii mañge. Nwin nlam umpe u yé le mama yé a bi témb a kahal ke i makoda ni i likalô, yak isañ ni lôkisañ yosôna ba bi hol, ba sôblana ki.

I ngéda mankéé Rumph a bé mañge wanda, a bi tehe lelaa basañal ba bé maséé. Jon i ngéda a bi net bacc, a bôdôl nson u nsañal i sôñ Dipos, nwii 1995. I nwii 2000, a ke i Équateur inyu hôla i het ngôñ i batéé likalô i bé. Nyoo nyen a bi boma Inga, nsañal nu a bé lôl i Kanada. I mbus ngéda, ba biiba. Ha nyen ba bi sal i tison i Équateur yada i het ndék lôk kéé i bé. Nano, soso likoda nyen a yé nyoo.

I mbus ngéda, Mankéé Rumph bona nwaa ba bi yila basañal ba tôbôtôbô, ba bi gwel yak nson u makiiña. I nwii 2011, ba bi sébél bo i Suklu Giléad i yonôs 132. I ngéda ba bi pam i suklu, ba bi sal ngandak bahoma i nkoñ ’isi, ba gwel ki ngandak minson kiki bo nson u Bétel, nson u missionnaire, ni nson u makiiña. Mankéé Rumph a bi niiga yak i Suklu baañal ñañ nlam.

COVID-19 a bi boñ le mankéé Rumph bona nwaa ba témb i Amérika. Ba bi sébél bo i Bétel i Wallkill, nyoo nyen ba bi niiga mankéé Rumph bôlô i département pour le service. I mbus ngéda, ba bi témb ba ep bo i Bétel i Équateur. Nyoo, mankéé Rumph a bé wada mu lôk kéé i i nkena nson i Bétel. I nwii 2023, ba bi ke i Warwick. I sôñ Kondoñ, nwii 2024, mankéé Rumph a bi yila nhôla i juu li nson. I ngéda a nhoñol bahoma a bi sal, a nkal le: “Homa di nsal bé nyen a lôôha nseñ, ndi i bôt ba nsal ni bés bon ba nlôôha nseñ.”

Di nkon maséé inyu bôlô ngui i lôk kéé yés, di ‘nke ki ni bisu i diihe i mintén mi bôt mi.’​—Filipi 2:29.