I téé likalô i libôga li gwé ngandak dilémb

Ngim mangéda, bôt ba mpala emble ñañ u Ane ngéda ba nok wo ni hop wap u ligwéé. Bebek inyu njom i nyen i ngand Pentékôt i nwii 33 N.Y., Yéhôva a bi yoñ bitelbene inyu boñ le ‘Lôk Yuda i i bé siñge Nyambe ñem i lôlak biloñ bi nkoñ isi wonsôna’ i emble ñañ nlam ikété ‘hop wap bomede,’ to hala kiki ba bé lama pot hilémb bôt bobasôna ba bé gwélél, kiki bo hop Lôk Héber tole hop Lôk Grikia. (Minson mi baôma 2:5, 8) I mabôga het ba mpot ngandak dilémb i len ini, makoda ma ma gwé dilémb di di yé maselna, ma nla bana nlélém libôga li likalô. Lelaa batéé likalô ba, ba nla sal inyu tihba bôt bobasôna mu libôga li, ibabé le biliya gwap bi unbaha bôt?

• 

  I nôgla (Bingéngén 15:22): Mimañ mi mi ñéga nson u likalô mi nlama nôgla, mi tjek mam kayéle hiki likoda li yi lelaa ba nla téé likalô i nya i kôli. Ibale libôga jap li yé titigi, bebek makoda ma ntéé likalô ni dilémb dipe, ma ga gwés le makoda mape ma tihba bañ mandap het ba mpot dilémb tjap. Ndi, ibale makoda ma ma mbéna bé tihba libôga jap jolisô inyule li yé likeñi, bebek ma ga gwés le ni tihba mandap momasôna, ndi ngéda ni mboma mut nu a mpot hilémb hiap ni nu a gwé ki ngôñ ni maliga, ni yis bo hala. (od 93 § 37) Tole ba nla bat likoda lipe mahôla inyu léba bôt ba mpot hilémb hi likoda jap, ba yis ki bo hee ba nyééne. (km 12/7 5, minkéñék mi matila) Tééda mahoñol le ngim mangéda ba nla pot ngandak dilémb ikété nlélém ndap. Bitelbene inyu tihba libôga jolisô bi nlama kiha ni mambén ngomin i ntéé inyu sôñ bôt.

• 

  Ni sal lôñ yada (Éfésô 4:16): Ni tibil noñ biniigana gwobisôna mañ u ñéga likalô a nti. Baa u gwé nnigil Bibel nu a ngwés nigil ni hilémb hi hi mpôda bé i likoda joñ? Nnigil Bibel a nla pala hol i pes mbuu ibale u ntégbaha yigil yé i likoda tole i juu li li mpot hilémb hié.

• 

  Kôôba (Bingéngén 15:28; 16:1): Ibale u yé téé likalô i mandap ni mandap, ndi mut a pam, a podok hilémb hipe, boñ biliya i añle nye ñañ nlam. I bisu bi ngéda, u nla kôôba i boma bôt ba ba mpot dilémb dipe, u nla yoñ ngim ngobol i Bibel ni bividéô ikété dilémb di. U nla ki gwélél ini sélél le JW Language inyu yi lelaa ba nyéga bôt ikété dilémb di.