‘Paul a bi ti Djob mayéga, ñem u let nye’

Ngéda likoda li Rôma li bi nok le Paul a bé lama lo, ntôñ u lôk kéé u bi ke liké jam kiki bo (64 km) inyu tehe nye. Kii Paul a bi nôdga ngéda a bi tehe bisesema ba bi boñ ni gwéha? “A tehe bañ bo a yéga Nyambe, ñem u let nye.” (Minson 28:15) To hala kiki Paul a bé yiba kiki mut nu a nlédés makoda ngéda a bé yuuga mo, lisañ lini kiki a bé mut mok, nyen a bi kôhna makénd.​—2 Korintô 13:10.

I len ini, bagwélél ba makiiña ba nke makoda inyu lédés bilôk bikéé bi bôlôm ni bi bôda. Kiki bagwélél ba Djob bobasôna, ngim mangéda ba yé ba tomb, ba nimis ki makénd map mu kiki ba yé ba bana nduña. Lisañ lipe, ngéda ngwélél makiiña bo nwaa ba ga yuuga likoda joñ, kii u nla boñ inyu hôla bo i bana ñem ngui, inyu boñ le ‘hiki wada a lédés hémle i nuu’?​—Rôma 1:11, 12.

• 

  Nit makoda ma nson. Ngéda batéé likalô ba mboñ bisesema inyu nit sonde i tôbôtôbô, hala a nti ngwélél makiiña makénd. (1 Tésalônika 1:2, 3; 2:20) U nla ba nsañal nu pes ngéda mu sôñ i. Baa u nla sal ni nye tole ni nwaa likalô, tole u kena wada wap i tégbaha ngim yigil i Bibel? Ba yé maséé i sal ni batéé likalô bobasôna, hala wee, batéé likalô ba mondo ni bet ba nginda niglak makeñge ma likalô.

• 

  Leege bo. Baa u nla ti bo homa linañle tole u kôôbana bo yom i je? Hala a unda ngwélél makiiña bona nwaa le u ngwés bo. Ba mbem bé le u leege bo i nya i nhélhana.​—Lukas 10:38-42.

• 

  Emble u bii ki maéba mé i bisélél. Ni gwéha, ngwélél makiiña a nhôla bés i tehe lelaa di nla hôlôs makeñge més mu nson wés inyu Yéhôva. Ngim mangéda, a nla ti bés maéba malam. (1 Korintô 5:1-5) A yé maséé ngéda di yé manôgla ni suhulnyuu.​—Lôk Héber 13:17.

• 

  Unda le u nkon maséé. Kal ngwélél makiiña ni nwaa inyuki biliya gwap bi nlédés we. Baa u nla boñ hala ni bak bé bo ba, tole u nla tilna nye léta.​—Kôlôsé 3:15.