Kii i yé nson u bagwélél ba makiiña?

Bitilna bipubi bi hop Grikia bi nlôôha pôdôl ñôma Paul bo Barnaba. Ba bé bagwélél ba makiiña, ba yuugaga makoda ma hiai bisu. Inyuki ba bé boñ hala? Ba bééna ngandak nduña inyu mbôô i lôktata i mbuu. Paul a kal le, a bééna ngôñ i témb i “yuuga lôktata” yap inyu tehe kiki ba yii. A bé bebee i ke ntandaa liké inyu lédés bo. (Minson mi baôma 15:36) Mahoñol ma mon bagwélél ba makiiña ba gwé i len ini.

Ba nlo inyu ti bés makénd. Hiki ngwélél makiiña a nyuuga bebee le 20 ma makoda, a tégbahaga sonde yada ikété hiki likoda. A nlo ngélé iba hiki ñwii. Di nla ôt ngandak pék i mayuuga ma mankéé nu bo nwaa, ibale a yé mbiibaga. Bagwélél ni baa bap ba mboñ bilia inyu yi hiki wada i likoda, boñge kiki mimañ mi bôt. Ba yé ki maséé i ba lôñni bés i likalô ni i éga gwigil bi Bibel. Bagwélél ba, ba nke ni mimañ inyu yuuga lôktata ni ti bo makénd. Ba nti ki minkwel i Ndap Ane ni i makoda makeñi inyu lédés bés.​—Minson mi baôma 15:35.

Ba ntôñ ni bôt bobasôna. Bagwélél ba makiiña ba ntôñ ngandak ni mbôô u makoda i pes mbuu. Bo, ni mimañ, ni bahôla nson, ba mbéna kodba inyu kwélél mahol ma mbôña i likoda. Ba nti ki bo maéba inyu tibil gwel nson wap. Ba nhôla basañal i bumbul matam malam mu nson wap. Bagwélél ba yé maséé i hôla bet ba ntip bôdôl lo makoda, ni kôhna mañwin ma mahol map. Hiki ngwélél a nti nyemede kiki “ngwelnson lôñ yada” ni bés inyu loñge yés. (2 Korintô 8:23) Di nlama kôna hémle yap ni lelaa ba nsiñge Nyambe ñem.​—Lôk Héber 13:7.

• Inyuki bagwélél ba makiiña ba nyuuga makoda?

• Umbe nseñ u nla kôs i mayuuga ma bagwélél?