Lelaa di nla gwélél dihéga di minkwel

Bilôk bikéé bi nsal ni ngui inyu bôñha bés dihéga di minkwel, ngandak batéé likalô i nkal le, dihéga di minkwel di nhôla bo ngandak i nson wap likalô. Ndi, kiki mam ma ta bé nlélém i nkoñ ’isi wonsôna, i ngéda ba ntéé likalô, lôk kéé i nla héñha majubul map ma nkwel inoñnaga ni i yom i nlémél bôt ba libôga jap. Ndi to hala, i ngéda hônd i tôbôtôbô i yé, bésbobasôna di nlama noñ minlélém mi biniigana. Njômbi yés i yé le, bésbobasôna di nôgôl oda Yésu Kristô a bi ti bés, le di añal ñañ nlam u Ane.—Matéô 24:14.

I ngéda batéé likalô ba ntégbaha nkwel i likoda li ñem sonde, ba nlama gwélél ño nkwel ba nti bo mu dihéga di minkwel di Kaat i niñ yés ni nson wés u bikristen. Handugi biniigana bipe, batéé likalô ba gwé kunde i mpohol mbadga ipe, nlôñ kaat umpe, mbadga inyu lipeple, tole ntén likalô umpe u num matam i libôga jap. Biniigana bini, bi yé maselna ndék ni biniigana bi bi pam i Kaat likoda li ñem sonde i sôñ Hilônde nwii 2020 i lipep 8.