Gwélél i homa nunu le Maleege i JW.ORG i likalô

I homa nunu le Maleege i site yés, a gwé miñañ ni bividéô bi bi nlémél bôt ba ba ngwés maliga to ibale ba ta bé Mbôgi Yéhôva. (Minson mi baôma 13:48) I homa nu a mbéna pôdôl i mam ma ntip pam, ma bôt ba nhoñol ni ma bôt ba mpot.

Lelaa u nla gwélél i homa nu i ngéda u ntéé likalô?

• Bana lem i béñge i mam ma ntip pam i site yés. I ngéda u njôp ha i homa nu le maleege, béñge nkwel u bisu, u tehe lelaa u nla gwélél wo i likalô. (Inyu tehe i mam ma ntip pam i homa maleege, kee i homa nunu le “Kônde tehe.”) I ngéda u gwé lem i béñge site yés, u ga yi kii i ntip pam, u ga bana ki miño mi minkwel mi mondo inyu likalô.

• Gwélél minkwel ni bividéô bi bi yé i homa nunu le maleege inyu bôdôl nkwel. Hala a nla hôla bés i yi kii bôt ba libôga jés ba nhoñol.

• Éba bôt i yom i ntip pam i homa nunu le maleege. Éba ngim nkwel u tôbôtôbô, u toñle ki mut lelaa a nla léba minkwel mimpe mu site yés.

• Éble bôt lien. Ngim bôt i ngwés bé i nkwel ni bés, ndi i yé bebee i yuuga site yés. Jon i ngéda u ntehe mut a ngwés maliga, u kon bañ woñi i ômle nye lien i ngim ño nkwel tole i vidéô yada i a nla léba mu site yés.