Ndik inyu man hiol!

Hélen a téé bebee ni kak i bikaat a yé i nwemla. Bôda iba ba yé i tagbe ha.

BOÑGE bôda iba ba bé hiôm i Bagiô, tison yada i Filipin, ba bi tehe kak bikaat yada, ndi ba bi ke bé nyoo. Sita Hélen, nu a bé a téé ha bebee ni kak bikaat, a bi nôlôs bo. I bôda ba ba bi tagbe, ndi hiol hi Hélen hi bi hélés bo.

Mbus, ngéda ba bé huu i mbai yap ni bus, ba tehe matila makeñi mana le jw.org libap li ndap Ane yada. Ba bigda le minlélém mi bibañga mi nwon ba ntehe i kak bikaat. Bo iba ba sôs i bus, ba béñge ntjega u makoda ha lijubul li ndap Ane.

Minlélém mi bôda nwo iba mi nôlôs Hélen i ngéda mi ntehe nye i ndap Ane.

I bôda ba bo iba ba ke likoda li bé noñ ha. Njee ba bi tehe ngéda ba bi jôp ndap Ane? Hélen! Ba pala yimbe le nyen a bi nôlôs bo i kak bikaat. Hélen a nkal le: “Ngéda ba bi kôôge me ipañ, me bôdôl kon woñi. Me hoñol le me mboñ ngim jam i téé bé.” Ndi i bôda iba ba, ba bi toñle Hélen i jam li bi boñ le ba loo likoda.

I boñge bôda ba bo iba ba bi tégbaha likoda lilam, ba nôgda wengoñle ba mpam i mbai yap. Ngéda ba bi tehe lôk kéé i yé hol ndap Ane mbus likoda, yak bo ba bat too ba nla ti mahôla. Wada ikété bôda ba bo iba a ta ha bé i Filipin, ndi nuu numpe a ngi lok makoda, a bi bôdôl yak yigil Bibel. I mam ma momasôna, ndik inyu man hiol!