Diihe masoohe

1. Lelaa di nlama tehe masoohe?

KINJE bisai di gwé i soohe Yéhôva Nhek ngii ni ’isi. Hoñol ki, di nla soohe Yéhôva hiki ngéda ni mahop momasôna ibabé i bat nye kunde bisu bi ngéda, to di niñi i dokta, to di yé i mok, di nla soohe di yik le a ñemble bés. Di nlama ti nye mayéga inyu jam li.

2. Lelaa Kiñe David a bi éba le masoohe ma yéne nye nseñ?

² Kiñe David a bé gwés masoohe. A bi kal Yéhôva le: “Masoohe mem ma pam bisu gwoñ kiki binjinjiñ.” (Tjémbi 141:1, 2) Ha i ngéda i, biprisi bi bé yoñ ngéda inyu kôôba binjinjiñ bi bi bé gwéélana inyu bégés Yéhôva. (Manyodi 30:34, 35) David a bi yoñ hihéga hi binjinjiñ inyu éba le a bé yoñ ngéda i kôôba ilole a nsoohe Yéhôva. Hala nyen yak bés di nlama boñ. Masoohe més ma nlama lémél Yéhôva.

3. Lelaa di nlama soohe Yéhôva, inyuki?

³ I ngéda di nsoohe Yéhôva di nlama bé pôdôs nye kiki sega yés, di nlama ti nye njôôñ lipém. Di bigda biyiinda Yésaya, Ézékiel, Daniel ni Yôhanes ba bi tehe. Biyiinda bi bi ta bé nlélém, ndi bi mpôna ndék. Gwobisôna bi ñéba le Yéhôva a yé Kiñe ikeñi. Yésaya a “bi tehe Yéhôva a yii i yéne Ane i i ba i nyôgi ni mbédhak i ngingii.” (Yésaya 6:1-3) Ézékiel a bi tehe Yéhôva a yii mu i kak yé nyoo i ngii “mapubi ma bayak . . . kiki binene bi nyum.” (Ézékiel 1:26-28) Daniel nye a bi tehe “Hilôlômbi nu a yôni ni dilo” a hééba mbot i mpôp, hié hi pémlak i yééne yé i ane. (Daniel 7:9, 10) Yak Yôhanes a bi tehe Yéhôva a yii i yééne i ane, a tehe i nyum i bé wengoñle ngok i émérôd u u bé kéña yééne yé i ane bipes gwobisôna. (Masoola 4:2-4) I ngéda di ntehe lelaa Yéhôva a yé mpémba, hala a mbigdaha bés le di gwé bisai bikeñi i soohe ni le di nlama ti nye lipém i ngéda di nsoohe nye. Ndi lelaa di nlama soohe?

“JON HAANA NYEN NI NLAMA SOOHE”

4. Bibuk bi bisu bi kaat Matéô 6:9, 10 bi niiga kii bés?

⁴ Añ Matéô 6:9, 10. I Nkwel wé i ngii hikôa, Yésu a bi niiga banigil bé lelaa ba nla soohe i nya i nlémél Yéhôva. I ngéda Yésu a bi kal bo le “jon haana nyen ni nlama soohe,” a bi bok ndugi a éba bo mam ma gwé maada ni sômbôl i Yéhôva. A bi kal bo le ba soohe le jôl li Yéhôva li tééba lipubi; Ane yé i i ga tjé baoo bé bobasôna i loo. A pôdôl yak bisai bôt ba binam bobasôna ba ga kôs. I ngéda di nsoohe inyu i mam mana, di ñéba le sômbôl i Yéhôva i yéne bés nseñ.

5. Baa di kôli soohe inyu mam més bésbomede?

⁵ Mu bibañga bi Yésu bi noñ ha, a ñéba le di kôli soohe inyu mam més bésbomede. Di nla bat Yéhôva koga i kel, nwéhél i bibéba gwés, di bat ki nye le a hôla bés i keñgle manoodana, ni le a tohol bés i moo ma mut ibe. (Matéô 6:11-13) I ngéda di mbat Yéhôva i mam mana, di ñéba le di gwé ngôñ le a éga bés ni le a kônôl bés maséé.

6. Baa di nlama ndigi soohe inyu mam Yésu a bi pôdôl mu masoohe a bi niiga banigil bé? Toñol.

⁶ Yésu a bé sômbôl bé kal le di nlama ndik soohe inyu mam a bi pôdôl mu masoohe a bi niiga banigil bé. Masoohe mé mape ma ñéba le a bé a soohe Yéhôva inyu ngim mam ipe i i bé i tééñge nye. (Matéô 26:39, 42; Yôhanes 17:1-26) Jon yak bés di nla soohe inyu mam momasôna ma ntééñga bés. I ngéda di nsômbôl yoñ makidik, di nla bat Yéhôva pék. (Tjémbi 119:33, 34) I ngéda ba mbééga bés nson u u yé ndutu, di nla soohe Yéhôva le a hôla bés i sal wo. (Bingéngén 2:6) Bagwal ba nla soohe inyu bon bap, yak boñge ba nla soohe inyu bagwal bap. Bésbobasôna di nlama soohe inyu bôt di ñañle ñañ nlam yak bôt di niiga Bibel. Ndi di nlama ndik bé soohe Yéhôva inyu mam més.

7. Inyuki di nlama bégés Yéhôva i ngéda di nsoohe?

⁷ I ngéda di nsoohe Yéhôva di nlama bégés nye. Mut to wada a kôli bé ni bibégés kiki nye. A yé “loñge, a nyégi i nwéhél.” A yé Nyambe nu “konangoo ni nu karis, a mpala bé unup, a nyaaba ki ni loñgeñem ni maliga.” (Tjémbi 86:5, 15) Di kôli toi bégés Yéhôva inyu mam momasôna a mboñ.

8. Di nla ti Yéhôva mayéga inyu mambe mam? (Tjémbi 104:12-15, 24)

⁸ Handugi i bégés Yéhôva, di nlama ki ti nye mayéga inyu mam malam a nti bés. Kiki hihéga, di nla ti nye mayéga inyu mbônji ilam, bijek bilam ni mawanda més. Nyambe wés a nti bés i mam mana momasôna inyu boñ le di ba maséé. (Añ Tjémbi 104:12-15, 24.) Di nlôôha ki ti Yéhôva mayéga inyu biniigana bilam di nkôs munu i ntôñ wé, ni mam malam a mbôn bés i dilo di nlo.

9. Kii i nla hôla bés i ti Yéhôva mayéga? (1 Tésalônika 5:17, 18)

⁹ Di yé le di hoo hôya ti Yéhôva mayéga inyu mam a mbôñôl bés. Kii i nla hôla bés le di hôya bañ? U yé le u tila i mam u ma bat Yéhôva, u béñgege hiki ngéda inyu tehe lelaa Yéhôva a bi timbhe masoohe moñ. I mbus soohe Yéhôva inyu ti nye mayéga. (Añ 1 Tésalônika 5:17, 18.) Di bigda le i ngéda mut a nti bés mayéga di yé di kon maséé. Hala nyen yak Yéhôva, i ngéda a ntimbhe masoohe més ndi di ti nye mayéga, a yé a kon maséé. (Kôlôsé 3:15) Di nlama ki ti Yéhôva mayéga inyu limbe jam?

DI TI YÉHÔVA MAYÉGA INYU MAN WÉ

10. Inoñnaga ni kaat 1 Pétrô 2:21, inyuki di nlama ti Yéhôva mayéga inyu Man wé nu a bi ep hana ’isi?

¹⁰ Añ 1 Pétrô 2:21. Di nlama ti Yéhôva mayéga mu kiki a bi om Man wé hana ’isi inyu niiga bés. I ngéda di nigil ñañ u niñ i Yésu, hala a nhôla bés i yi Yéhôva ni i lémél nye. Ibale di nhémle sesema i Kristô, di nla ba mawanda ma Yéhôva.—Rôma 5:1.

11. Inyuki di nsoohe i jôl li Yésu?

¹¹ Di ti Yéhôva mayéga lakii a bi néhne bés njel le di soohe nye ni njel Man wé Yésu. Yéhôva a ntimbhe masoohe més ni njel Yésu. I ngéda di nsoohe Yéhôva i jôl li Yésu, a ñemble bés a timbhege bés. Yésu a bi kal le: “To kinje jam ni mbat i jôl jem, m’a boñ jo, le ndi Tata a kôhna lipém ni njel Man.”—Yôhanes 14:13, 14.

12. Inyu kii ipe di nlama ti Yéhôva mayéga inyu Man wé?

¹² Yéhôva a nwéhél bibéba gwés ni njel sesema i Man wé Yésu. Bibel i nkal le Yésu a yé “Prisi keñi [yés i i yii] i woo walôm u yééne ane Nyambe nunkeñi nyoo i ngii.” (Lôk Héber 8:1) Yésu a yé bés “nhôla yak Tata.” (1 Yôhanes 2:1) Di nti Yéhôva mayéga lakii a bi ti bés i Prisi keñi ini i i nkônôl bés ngoo, i “nyemhege inyu yés”! (Rôma 8:34; Lôk Héber 4:15) Kiki di yé bikwéha bi bôt, ibale sesema i Yésu bé, ki di nla bé soohe Yéhôva. Kekikel di ta bé le di timbhe Yéhôva inyu sesema i Man wé Yésu.

DI SOOHE INYU LÔK KÉÉ YÉS

13. U u nsôk ilole Yésu nwo, lelaa a bi éba banigil bé gwéha?

¹³ U u nsôk ilole Yésu a nwo, a bi soohe ngandak inyu banigil bé, a bat Isañ le a “sôñ bo i moo ma mut ibe.” (Yôhanes 17:15) Kinje gwéha! Nyemb yé i bé bebee, ndi to hala a bé tôñ baôma bé.

14. Lelaa di nla unda le di ngwés lôk kéé yés?

¹⁴ Kiki Yésu, di nlama ndik bé ntôñ bésbotama, di nlama ki soohe hiki ngéda inyu lôk kéé yés. I ngéda di mboñ hala, di nôgôl Yésu nu a bi kal le di nlama gwéhna bés ni bés, di ñéba ki le di ngwés lôk kéé yés ngandak. (Yôhanes 13:34) I ngéda di nsoohe inyu lôk kéé yés di nlep bé ngéda. Bibel i nkal le minyemhe mi “mut a téé sép mi gwé ngui ngandak.”—Yakôbô 5:16.

15. Inyuki di nlama soohe inyu lôk kéé yés?

¹⁵ Di nlama soohe inyu lôk kéé yés inyule i mboma ngandak mandutu. Di nla bat Yéhôva le a hôla lôk kéé i i nkon, i i nkôs bikuu, i i yé i het gwét bi yé, i i mboma ndééñga tole mandutu mape. Di nla yak soohe inyu lôk kéé i bôda tole i bôlôm i i nhôla i bôt ba gwé mandutu. Bebek u nyi ngim bôt i i mboma i nya mandutu i. U nla soohe inyu yap, u sim-ga môl map. I ngéda di nsoohe Yéhôva le a hôla bo, di ñunda bo gwéha.

16. Inyuki di nlama soohe inyu lôk kéé i i ñéga bés?

¹⁶ Lôk kéé i i ñéga bés i yé maséé ngandak i ngéda di nsoohe inyu yap, masoohe ma ma nhôla ki bo. I jam li jon ñôma Paul a bi unda, a bi kal le: “Soohana yak inyu yem, le ndi me kôhna bibuk ngéda me nyibil nyo kayéle me la pot ni makénd i yis bôt jimb lipubi li ñañ nlam.” (Éfésô 6:19) Yak i len ini, ngandak lôk kéé i i ñéga bés i nsal ngandak. Jon i ngéda di nsoohe Yéhôva inyu yap di ñunda bo gwéha.

I NGÉDA DI NSOOHE INYU NGANDAK BÔT

17-18. Imbe ngéda ba yé le ba kal bés le di soohe inyu ngandak bôt, kii di nlama bigda?

¹⁷ Ngim mangéda ba yé le ba kal bés le di soohe inyu ngandak bôt. Kiki hihéga, i ngéda bisita biba bi yé likalô, sita i i gwé yigil i nla kal sita i i nyéga nye le a soohe. Bebek le i sita i i nyéga nye i nyi bé i nwet a nigil Bibel loñge. Jon i yé le i ba loñge le a soohe i ngéda yigil i mal. Hala a ga boñ le a yi i mam a yé le a pôdôl mu masoohe.

¹⁸ Ba yé le ba kal mankéé nu munlôm le a soohe i boma i likalô tole likoda. Lôk kéé i i nti i nya masoohe i, i nlama bigda njômbi i likoda. Ba nti bé bo masoohe le ba ti lôk kéé maéba tole ba legel ngim mam. Ikété ngandak makoda, di gwé ndik manut matan inyu hiémbi ni masoohe. Jon i mankéé ba nti masoohe a nlama bé “bulus bibuk” téntén i bibôdle bi likoda.—Matéô 6:7.

MASOOHE MA NLAMA BA JAM LI BISU I NIÑ YÉS

19. Kii i nla hôla bés i kôôba inyu hilo hi bikééhene hi Yéhôva?

¹⁹ Kiki hilo hi bikééhene hi Yéhôva hi yé bebee, masoohe ma nlama ba jam li bisu i niñ yés. Yésu a bi kal le: “Jon yéna péé, ni yemhege ngéda yosôna le ndi ni pam i pei i mam mana momasôna ma nlama lo.” (Lukas 21:36) Masoohe ma yé nseñ inyule ma ga hôla bés i yén péé inyu boñ le hilo hi Yéhôva hi puhe bañ bés.

20. Kii i nla boñ le masoohe més ma ba kiki binjinjiñ?

²⁰ Kii di ntehe munu i yigil? Di yé maséé ngandak kiki Yéhôva a bi ti bés kunde le di soohe nye. Jam li bisu di nlama bigda i ngéda di nsoohe Yéhôva li yé sômbôl yé. Di nlama ki ti Yéhôva mayéga inyu Man wé ni Ane yé, di soohege inyu lôk kéé yés. Ndi di nla ki soohe inyu mam més bésbomede. I ngéda di nyoñ ngéda i ôt pék ilole di nsoohe, di ñunda le di yé maséé ni likébla li masoohe. Yéhôva a ga tehe masoohe més kiki binjinjiñ, ma ga ‘kônha nye maséé.’—Bingéngén 15:8.