Yéhôva a nsômbôl le bôt bobasôna ba hiel miñem

1. I hiel ñem wee kii?

I NGÉDA di mboñ béba, i nlôôha ba nseñ le di tam yo. Inoñnaga ni Bibel, i mut a ntam béba yé a mbôdôl oo liboñok jé libe, a nwas i béba i, a nyoñ ki makidik le a’ boñ ha bé ki yo. Béñge Ndoñi i bibuk bi Bibel, i homa le “I tam bibéba.”​—Matéô 3:8; Minson mi baôma 3:19; 2 Pétrô 3:9.”

2. Inyuki bésbobasôna di nlama yi kii i yé i hiel ñem? (Néhémia 8:​9-11)

² Bôt ba binam bobasôna ba nlama yi kii i yé i hiel ñem. Inyuki? Inyule hiki kel, bésbobasôna di mboñ béba. Kiki di yé bon ba Adam bo Éva, bésbobasôna di mboñ béba di nwo ki. (Rôma 3:23; 5:12) To wada ikété yés a nla bé kal le a mboñ bé béba. Yak bôt ba hémle ikeñi kiki ñôma Paul ba bé jôs béba. (Rôma 7:​21-24) Baa hala a nkobla le di ga nimis maséé més niñ yés yosôna inyule di mboñ béba? Heni, Yéhôva a yé konangoo, a nsômbôl le di ba maséé. Di pôdôl le ndémbél i bon ba Lôk Yuda i ngéda Néhémia. (Añ Néhémia 8:​9-11.) Yéhôva a bé gwés bé le ba kônha ngoo hiki ngéda inyu bibéba ba bi boñ behee, a bé gwés le ba bégés nye ni maséé. Yéhôva a nyi le i ngéda mut a ntam béba yé, a yé maséé. Jon a niiga bés kii i yé i hiel ñem. Ibale di ntam bibéba gwés di nla ba nkwoog nkaa le, Tata wés nu konangoo le Yéhôva a ga nwéhél bés.

3. Kii di ga pôdôl munu i yigil ini?

³ Di kônde pôdôl i hiel ñem. Munu yigil ini, di ga pôdôl mam maa. Pog, lelaa Yéhôva a bi niiga Lôk Israel i hiel ñem. I mbus di ga tehe lelaa Yéhôva a bi hôla baboñbéba i hiel miñem. Sôk i nsôk, di ga tehe kii Yésu a bi niiga banigil bé inyu i hiel ñem.

KII YÉHÔVA A BI NIIGA BON BA ISRAEL INYU I HIEL ÑEM

4. Kii Yéhôva a bi niiga litén li Israel inyu i hiel ñem?

⁴ I ngéda Yéhôva a bi ti bon ba Israel mambén, a bi boñ malômbla ni bo, a kal bo le ibale ba nôgôl mambén mé, a ga tat bo, a sayap ki bo. A kal le: “I mbén me yé ti we i len ini, i nlet bé ngandak inyu yoñ, i ta bé to i homa le u nla bé pam.” (Ndiimba Mbén 30:​11, 16) Ndi ibale ba ndogbene nye, ba ke i gwélél banyambe bape, ki a bi kôm bo mbus, ba kahal nok ndutu. Ndi to hala ba bé ki le ba témbna maada malam ni Nyambe. Ba bé le ba ‘témb yak Yéhôva Nyambe wap, ba emble ki kiñ yé.’ (Ndiimba Mbén 30:​1-3, 17-20) Hala a nkobla le, ba bé le ba hiel ñem. Ibale ba boñ hala, Yéhôva a bé le a kôôge bo bebee, a sayap ki bo.

5. Lelaa Yéhôva a bi hônba bagwélél bé ba ba bi boñ béba? (2 Bikiñe 17:​13, 14)

⁵ Lôk Israel i bé ndogbene Yéhôva i tiimbaga. I bé bégés bisat, i boñok ki mam mabe mape. Jon ba bé nok ndutu. Ndi Yéhôva a bi yôi bé bo. A bi om bapôdôl ngandak ngélé inyu tinde Lôk Israel i hiel ñem, ni i témb i nyeni.​—Añ 2 Bikiñe 17:​13, 14.

6. Lelaa Yéhôva a bi gwélél bapôdôl bé inyu niiga Lôk Israel le i hiel ñem i yé nseñ? (Béñge yak titii.)

⁶ Yéhôva a bé béna om bapôdôl bé inyu béhe ni inyu kodol litén jé. Kiki hihéga, ni njel mpôdôl Yérémia, Yéhôva a kal le: “Témb i meeni, a muda ndéñg nunu le Israel . . . Me ga unbene ha bé ki we, inyule me yé maliga . . . Me ga téédana bé we hiun i boga ni boga. Neebe ndigi bibéba gwoñ, inyule u bi ndogbene Yéhôva.” (Yérémia 3:​12, 13) Ni njel mpôdôl Yôel, Yéhôva a kal le: “Ni témb i meeni ni miñem minan nwominsôna.” (Yôel 2:​12, 13) A bi tinde Yésaya i kal le: “Pubhana bébomede; ni héya maboñok manan mabe i bisu gwem; ni boñ ha bañ béba.” (Yésaya 1:​16-19) A bi ep Ézékiel i kal bo le: “Baa nyemb i béba mut i nkônha me maséé? Baa m’a ba bé maséé le a tjôô maboñok mé mabe inyu boñ le a niñ? Nyemb i mut nye ki nye i nkônha bé me maséé. Jon héñhana maboñok manan, le ndi ni niñ.” (Ézékiel 18:​23, 32) Yéhôva a nkon maséé i tehe baboñbéba ba nhiel miñem, inyule a nsômbôl le ba niñ i boga ni boga! Ndi Yéhôva a mbem bé le baboñbéba ba hiel ñem ndi a loo i hôla bo? Di béñge le ndék dihéga i i mpôdôl i jam li.

7. Lelaa Yéhôva a bi gwélél i ñañ u Hôséa ni nwaa wé inyu niiga Lôk Israel?

⁷ Di tehe lelaa Yéhôva a bi gwélél ndémbél i mpôdôl Hôséa ni nwaa wé Gômer inyu niiga Lôk Israel. Gômer a bi ke i ndéñg, a tjôô nlô wé, a ke i noñ bôlôm bape. Baa Yéhôva a bi kôm nye mbus? Kiki a nyi miñem mi bôt ba binam, a bi kal Hôséa le: “Tiimba gwés muda nu a yé le munlôm numpe a ngwés, muda ndéñg, nlélém kiki Yéhôva a ngwés litén li Israel to hala kiki ba noñ banyambe bape.” (Hôséa 3:1; Bingéngén 16:2) Yimbe le nwaa Hôséa a bé a nginda boñok béba. To hala, Yéhôva a bi kal Hôséa le, a tiige nye bebee, a nwéhél nye, a sañgla ni nye.a Nlélém, to Yéhôva a bi yôi bé bagwélél bé ba ba bi ndogbene nye. Tolakii ba bé ba nginda boñok mam mabe kiyaga, a bé gwés bo a hôlga bo i tam bibéba gwap. Baa hala a nkobla le Yéhôva “[nu] a nwan miñem” mi bôt ba binam, a nla hôla mut nu a nginda boñok béba, a tinde ki nye i hiel ñem? (Bingéngén 17:3) I jam li jon di ga pôdôl hanano.

LELAA YÉHÔVA A NTINDE BABOÑBÉBA I HIEL MIÑEM

8. Lelaa Yéhôva a bi noode tinde Kain i hiel ñem? (Bibôdle 4:​3-7) (Béñge yak titii.)

⁸ Kain a bé man nu bisu nu Adam bo Éva. Kiki bagwal bé ba bé baboñbéba, yak nye a bi gwééna béba. Bibel i nkal ki le: “Minson nwé nwomede mi bé mimbe.” (1 Yôhanes 3:12) Bebek inyu hala nyen i ngéda a bé ti Yéhôva likébla, Yéhôva ‘a bé béñge bé nye to likébla jé ni mis malam.’ Iloole a héñha maboñok mé, Kain a bi unup ngandak, ‘a kañ ki su.’ Kii Yéhôva a bi boñ? A bi béhe Kain. (Añ Bibôdle 4:​3-7.) Yéhôva a bi pôdôs nye ni loñgeñem, a kal nye le a yoñ yihe tiga le a boñ béba. Ngoo le, Kain a bi emble bé. A bi nwas bé le Yéhôva a tinde nye i hiel ñem. Baa maboñok ma Kain ma bi boñ le Yéhôva a tinde bañ bôt bape i hiel ñem? To jam!

9. Lelaa Yéhôva a bi tinde David i hiel ñem?

⁹ Yéhôva a bé gwés Kiñe David ngandak. A bi sébél nye le: “Mut nu a nkônha ñem wem maséé.” (Minson mi baôma 13:22) Ndi David a bi boñ bibéba bikeñi, a bi ke i ndéñg, a nol ki mut. Inoñnaga ni mbén Môsi, David a bé a kôli ni nyemb. (Lôk Lévi 20:10; Ñañga bôt 35:31) Ndi, Yéhôva a bé bebee i hôla nye.b Tolakii David a bé ngi tam béba yé, Yéhôva a bi om mpôdôl Natan i nyeni. Natan a bi gwélél ngim hihéga inyu tinde David i tam béba yé. Hihéga hi hi bi lôôha tihba David, hi tinde nye i hiel ñem. (2 Samuel 12:​1-14) A bi tila hiémbi hiada hi hi bi unda le, a bi tam toi béba yé. (Tjémbi 51, matila i bibôdle bi hiémbi) Ngandak baboñbéba i nyôñôl ngui mu i hiémbi hi, hi tinde ki bo i tam béba yap. Di yé maséé i tehe le Yéhôva a bi tinde ngwélél wé David i tam béba yé.

10. Kii u nôgda i ngéda u ntehe lelaa Yéhôva a nhônba bôt ba binam, a nwéhlak ki bo?

¹⁰ Yéhôva a ñoo béba, mintén nwominsôna. (Tjémbi 5:​4, 5) Ndi kiki a ngwés bés, a yik le di yé baboñbéba, a nhôla bés le béba i yémbél bañ bés. To mut a mboñ béba lelaa, Yéhôva a nyéñ manjel i hôla nye i kôôge nye bebee. Hala a nkônha bés maséé ngandak, i ngéda di ntehe lelaa a nhônba bés, a nwéhlak bés! Hala a ntinde bés i téñbe ni nye ni i tam bibéba gwés. Nano di béñge lelaa Yésu a bi niiga banigil bé i hiel ñem.

LELAA YÉSU A BI NIIGA BANIGIL BÉ I HIEL ÑEM

11-12. Himbe hihéga Yésu a bi gwélél inyu unda le Yéhôva a yé bebee i nwéhél? (Béñge titii i .)

¹¹ Mésia a bi lo i hiai hi bisu i ngéda yés. I yigil i ntagbe, di ntehe le i ngéda Yésu Kristô a bé hana ’isi, Yéhôva a bi gwélél nye ni Yôhanes Nsôble inyu unda bôt le i hiel ñem i yé nseñ ngandak.​—Matéô 3:​1, 2; 4:17.

¹² I ngéda a bé gwel nson wé hana ’isi, Yésu a bi niiga bôt le, Isañ a yé bebee i nwéhél. Yésu a bi gwélél loñge hihéga, hala wee hihéga hi man nnimlaga. I mañge wanda nunu a bi nyodi i ndap isañ, a boñ mam mabe. Ndi i ngéda “nyuu i bi yi nye jam” a témb i ndap. Kii Isañ a bi boñ? Yésu a nkal le: “I ngéda a bé a ngi yii haa, isañ a tehe nye, a kônôl nye ngoo, a ke ngwéé, a sambla nye, a sos nye limañ ni gwéha.” Mañge a bééna ngôñ i ba ndigi mut bôlô wada mu i ndap isañ, ndi isañ a bi sébél nye le “i man wem nunu” a leege nye i ndap. Isañ a kal le: “A bi nimil, ndi a ntémb.” (Lukas 15:​11-32) I ngéda Yésu a bé i ngii ilole a nlo hana ’isi, a bi lama tehe Isañ a nwéhél baboñbéba ba ba bi tam bibéba gwap, inyule a bé kônôl bo ngoo. Kinje loñge hihéga Yésu a bi gwélél inyu unda konangoo ni nwéhél i Yéhôva!

13-14. Kii ñôma Pétrô a bi nigil inyu i hiel ñem, kii nyemede a bi niiga mu i jam li? (Béñge yak titii.)

¹³ Ndémbél i Yésu i bi hôla ñôma Pétrô i ôt biniigana bi ngui inyu jam li i hiel ñem ni nwéhél. Pétrô a bi boñ ngandak dihôha, Yésu a nwéhél nye. Kiki hihéga, i ngéda a bi tañba Nwet wé ngélé iaa, Pétrô a bééna nduña ikeñi. (Matéô 26:​34, 35, 69-75) Ndi i ngéda Yésu a bi tuge, a bi lo i boma Pétrô, i nene le ba bé ndigi bo iba. (Lukas 24:​33, 34; 1 Korintô 15:​3-5) Yésu a bi lama lédés nye yokel, a yis yak nye le a nwéhél nye.

¹⁴ Pétrô a bi tibil nok lelaa mut a nlama tam béba yé ni lelaa Yéhôva a nwéhél, jon a bé le a niiga bôt bape i mam ma. Ndék ngéda i mbus ngand i Pentékôt, Pétrô a bi ti nkwel u mbamba, a kal i Lôk Yuda i bé i kôdi ha le, yon i bi nol Mésia. Jon, a bi ti bo makénd ni bini bibuk le: “Tama bibéba binan, ni hiel ki miñem le ndi bibéba binan bi séha, inyu boñ le mangéda ma hogbe ma lôl yak Yéhôva nyemede.” (Minson mi baôma 3:​14, 15, 17, 19) Pétrô a bé sômbôl unda le i tam bibéba, hala a nkobla le, i hielba, hala wee i nwas mahoñol mabe ni maboñok mabe, inyu boñ mam ma nlémél Nyambe. Ñôma Pétrô a bi unda le Yéhôva a nsas bibéba gwap, a hôya gwo. I mbus ngandak nwii, Pétrô a kal lôk kéé le: ‘Yéhôva . . . a ñunda bo wongut inyule a nsômbôl bé le mut nye ki nye a tjiba, ndi a nsômbôl le bôt bobasôna ba pam i hiel miñem.’ (2 Pétrô 3:9) Hala a nlôôha lédés bagwélél ba Yéhôva to ibale ba nkwo i béba ikeñi!

15-16. (a) Kii ñôma Paul a bi nigil inyu nwéhél? (1 Timôtéô 1:​12-15) (b) Kii di ga tehe i yigil i noñ?

¹⁵ Bôt ba ba bi boñ béba kiki Paul ba ntôl bé. A bi tééñga banigil ba Kristô ngandak. I nene le ngandak bikristen i bé tehe le, botñem yo ki yo i ta ha bé inyu yé. Ndi, hala bé nyen Yésu a bé tehe nye. Yésu bo Isañ ba bé tehe bilem bilam bi Paul. Yésu a kal le: “I mut nunu a yé kiki ébél me mal pohol.” (Minson mi baôma 9:15) Yésu a bi boñ yak hélha jam inyu tinde Paul i tam béba yé. (Minson mi baôma 7:58–8:3; 9:​1-9, 17-20) I ngéda a bi yila kristen, Saul nu ba bi sébél le Paul a bé béna ti Yéhôva bo Yésu mayéga, inyu loñgeñem ni konangoo ba bi unda nye. (Añ 1 Timôtéô 1:​12-15.) Paul nyen a kal le: “Nyambe, ikété konangoo yé, a nyéñ tinde we i hiel ñem.”​—Rôma 2:4.

¹⁶ I ngéda Paul a bi nok le, hiloga hiada hi niñ ni nwaa isañ i likoda li Korintô, kii a bi boñ? I jam a boñ yokel li ñunda lelaa Yéhôva a nhôla i bet ba mboñ béba ikeñi, ni lelaa a nwéhél bo i ngéda ba ntam béba yap. Di ga kônde pôdôl i jam li i yigil i noñ.