Neebe le Yéhôva a nwéhél we

1-2. I ngéda mut a ntam toi bibéba gwé, bimbe bisai a nkôs? (Béñge yak lipep li bisu.)

KIÑE David a bé yi njôghe mut a nok i ngéda kiññem i nlôôha kéés nye inyu bibéba a bi boñ behee. (Tjémbi 40:12; 51:​3, matila i bibôdle bi hiémbi) A bi boñ bibéba bikeñi. Ndi a bi tam toi, yak Yéhôva a nwéhél nye. (2 Samuel 12:13) Ñem u bi mom David nwee i ngéda Yéhôva a bi nwéhél nye.​—Tjémbi 32:1.

² Yak bés, ibale Yéhôva a nwéhél bibéba gwés, ñem u ga mom bés nwee kiki David. Kinje maséé i yi le Yéhôva a yé bebee i nwéhél bés! To ibale di mboñ bibéba bikeñi, i mbat ndik le di tam, di bat nwéhél, di yoñ ki makidik le di mboñ ha bé i bibéba bi. (Bingéngén 28:13; Minson mi baôma 26:20; 1 Yôhanes 1:9) Di yé ki maséé inyule di nyi le i ngéda Yéhôva a nwéhél, a yé ndik wengoñle di ma boñ bé béba kekikel!​—Ézékiel 33:16.

3-4. (a) Kii i bé tééñga sita yada i ngéda a bi sôblana? (b) Kii d’a tehe munu yigil ini?

³ Ndi hala a nlédél bôt bape i neebe le Yéhôva a nwéhél bo. Di pôdôl le Jennifer, nu a bi néñél i lihaa li Mbôgi Yéhôva. I ngéda a bé mañge, a bé boñ mam mabe bisôsôli. I mbus ngandak nwii, a bi témb a bôdôl gwélél Yéhôva, a sôblana ki. A nkal le: “Behee, me bé gwés moni ngandak, me ban-ga niñ i nyega, me nyok ngandak, me nyayak. Me bé yi le kiki me bi yemhe Yéhôva le a nwéhél me, me tam ki bibéba gwem, Yéhôva a bi nwéhél me ni njel sesema i Yésu. Ndi ñem u bé kal ndik me le Yéhôva a nwéhél bé me.”

⁴ Ngim mangéda, ñem woñ u nkal we le Yéhôva a nla bé nwéhél bibéba u bi boñ behee? Kiki David a bééna ñem nwee i ngéda Yéhôva a bi nwéhél nye, hala yak nyen Yéhôva a ngwés le di bana ñem nwee i ngéda a nwéhél bés. I yigil ini i ga unda bés inyuki di nlama neebe le Yéhôva a nwéhél bés, d’a tehe ki kii di nla boñ inyu neebe le a nwéhél bés.

INYUKI DI NLAMA NEEBE LE YÉHÔVA A NWÉHÉL BÉS?

5. Kii Satan a ngwés le di hoñol? Ti hihéga.

⁵ Ibale di neebe le Yéhôva a nwéhél bés, d’a kwo bé i hiandi hi Satan. Di bigda le Satan a yé bebee i boñ to kii inyu boñ le di waa gwélél Yéhôva. Inyu boñ le sômbôl yé i yon, Satan a mboñ kii yosôna a nla inyu tinde bés i hoñol le Yéhôva a nla bé nwéhél bés. Di hoñol i mut ba bi pémés i likoda li Korintô inyule a bi boñ malal ma nyega. (1 Korintô 5:​1, 5, 13) I ngéda a bi tam béba yé i mbus ngéda, Satan a bé gwés le lôk kéé i nwéhél bañ nye. A bé gwés bé to le ba leege nye i likoda. Satan a bé gwés ki le i mut nu ba bi pémés i likoda a hoñol le Yéhôva a nla bé nwéhél nye. A bé sômbôl le i mut nu a bana “ndutu ñem iloo hihéga,” a waa yak gwélél Yéhôva. Dipa di Satan di nhéñha bé, to minsoñgi nwé mimbe. Ndi “di nek bé sômbôl yé.”​—2 Korintô 2:​5-11.

6. Kii i nla hôla bés i ngéda kiññem i nlôôha kéés bés?

⁶ I ngéda di neebe le Yéhôva a nwéhél bés, kiññem y’a lôôha ha bé kéés bés. I ngéda di mboñ béba, kiññem i nkéés bés. (Tjémbi 51:17) Hala a yé loñge. I ngéda kiññem i nkéés bés, di nla boñ kii yosôna i mbéda inyu tam béba yés. (2 Korintô 7:​10, 11) Ndi ibale di nwas le kiññem i lôôha kéés bés, ki le di ntam béba yés, di nla waa gwélél Yéhôva. I ngéda di neebe le Yéhôva a nwéhél bés, di nwas ha bé le kiññem i lôôha kéés bés. Ha nyen d’a gwélél Yéhôva kiki a nsômbôl le di gwélél nye, kiññem yés i mba nwee, di bak maséé. (Kôlôsé 1:​10, 11; 2 Timôtéô 1:3) Kii i nla ni hôla bés i neebe le Yéhôva a nwéhél bés?

KII I NLA HÔLA BÉS I NEEBE LE YÉHÔVA A NWÉHÉL BÉS?

7-8. Bimbe bilem Yéhôva a bi yeelene Môsi, lelaa nkwel u Yéhôva bo Môsi u nla hôla bés? (Manyodi 34:​6, 7)

⁷ Hoñol bilem bi Yéhôva. Kiki hihéga, bigda i yom Yéhôva a bi kal Môsi i hikôa Sinai.a (Añ Manyodi 34:​6, 7.) I ngéda Yéhôva a bé kal Môsi bilem gwé, to hala kiki Yéhôva a gwé ngandak bilem bilam, a bi tehe nseñ i kal Môsi le a yé “Nyambe nu konangoo ni nu ñem ngôô.” Baa ni i bilem bini, Yéhôva a nla tjél nwéhél mut nu a ntam toi bibéba gwé? A nla bé! I mut a mboñ hala a nkona bé ngoo, a gwé yak ñem mbe. Ndi Yéhôva a yé mbén i boñ hala.

⁸ Di nyi le i ngéda Yéhôva a nkal le a yé Nyambe nu konangoo, maliga ma, inyule a ntembee bé. (Tjémbi 31:5) I ngéda a mpot jam, di nlama ndik hémle nye. Ibale kiññem i nlôôha kéés we inyu bibéba u bi boñ behee, badba le: ‘Baa me nhémle le Yéhôva a yé toi Nyambe nu konangoo ni nu ñem ngôô, ni le a ta bé le a tjél nwéhél nu ni nu a ntam béba yé? Inyuki me neebe bé le a nwéhél me?’

9. I ngéda Yéhôva a nkal le a nwéhél bés, hala a nkolba le kii? (Tjémbi 32:5)

⁹ Di hoñol i mam batila Bibel ba bi kal inyu nwéhél i Yéhôva. Di tehe lelaa David, ntila Bibel wada, a bi pôdôl nwéhél i Yéhôva. (Añ Tjémbi 32:5.) David a bi kal le: “U bi nwéhél hihôha hiem ni bibéba gwem.” I buk lôk Héber ini le “nwéhél” i nla kobla le “begee,” “paa,” tole “i kena.” I ngéda Yéhôva a bi nwéhél David, a bé ndik wengoñle a bi paa bibéba gwé, a kena gwo. Kiññem i bé lôôha kéés David, ndi i ngéda Yéhôva a bi nwéhél nye, a bé ndik kii bo le a nsuha soso mbegee. (Tjémbi 32:​2-4) Yak bés di nla bana i ntén hogbe u. I ngéda di ntam toi bibéba gwés, di nwas bañ le kiññem i lôôha kéés bés. Di bigda le Yéhôva a mpa mbegee yés, a kena yo haa.

10-11. I bibuk bini le “a yé bebee i nwéhél” bi niiga kii bés inyu Yéhôva? (Tjémbi 86:5)

¹⁰ Añ Tjémbi 86:5. David a nkal le Yéhôva a yé “bebee i nwéhél.” Kaat yada i i ntoñol Bibel, i ntoñol i nlôñ u le: “[Yéhôva] a yé ‘mut nwéhél’, ‘lem yé i.’” Inyuki Yéhôva a gwé i lem i? Bibuk bi nsôk mu nlôñ u bi nkal le: “Bagwélél boñ ba ba nlôndôl we, u nlôôha unda bo loñgeñem.” Kiki di bi tehe i yigil i ntagbe, Yéhôva a nwaa bé gwés bagwélél bé ba ba ntéñbe ni nye, a ngwés bo ngandak. I gwéha i yon i ntinde nye i nwéhél baboñbéba ba ba ntam bibéba gwap, a ‘nwéhél bo ni ñem wonsôna.’ (Yésaya 55:​7, buk isi lipep.) Ibale hala a nlédél we i neebe le Yéhôva a nwéhél we, u nla badba le: ‘Baa me nhémle toi le Yéhôva a yé bebee i nwéhél baboñbéba bobasôna ba ba ntam toi béba yap? Inyuki me neebe ni bé le a nwéhél me i ngéda me ntam béba yem?’

¹¹ Di yé maséé inyule di nyi le Yéhôva a nok bés, a nyi ki le di yé baboñbéba. (Tjémbi 139:​1, 2) Hiémbi hi David hipe hi ntibil toñol i jam li, hi ñunda yaga bés le Yéhôva a yé bebee i nwéhél bés .

DI HÔYA BAÑ I JAM YÉHÔVA A MBIGDA

12-13. (a) Inoñnaga ni kaat Tjémbi 103:​14, kii Yéhôva a mbigda? (b) Hala a ntinde nye i boñ kii?

¹² Añ Tjémbi 103:14. David a bi kal le Yéhôva a “mbigda le di yé nluñ ték.” I bibuk bi David bi, bi ñéba inyuki Yéhôva a yé bebee i nwéhél baboñbéba ba ba ntam bibéba gwap: A nyi le di bi gwééne ikété béba. Di kônde wan bibuk bi David inyu tibil nok i jam li.

¹³ David a bi kal le, Yéhôva “a nyi lelaa a bi hek bés.” A bi hek Adam “ni nluñ ték.” Jon a nyi le yak bôt ba binam ba ba yé peles ba gwé ngôñ i je, i nañal, ni i hép inyu niñ. (Bibôdle 2:7) Ndi handugi i mam mana, béba i Adam bo Éva i bi lona bôt ba binam mandutu. Kiki di yé mbôda yap, béba i yé bés i nyuu. Yon i ntinde bés i boñ mam ma nlémél bé Yéhôva. Yéhôva a nyi ndik bé le di bi gwééne ikété béba, David a nkal le Yéhôva a “mbigda,” yak hala. I buk lôk Héber ba bi gwélél hana i nkobla le a mbigda, a bôñôl bés jam lilam. Haana nyen di nla nok bibuk bi David: Yéhôva a nyi le ngim mangéda, di mboñ béba. I ngéda di mboñ béba ndi di tam yo, a nkônôl bés ngoo, a nwéhél yak bés.​—Tjémbi 78:​38, 39.

14. (a) Lelaa David a ntoñle bés nwéhél i Yéhôva? (Tjémbi 103:12) (b) Lelaa hihéga David a bi gwélél hi nhôla bés i nok le i ngéda Yéhôva a nwéhél, wee a mal nwéhél? (Béñge minkéñék mi matila mini le: “I ngéda Yéhôva a nwéhél, a nhôya.”)

¹⁴ Lelaa Yéhôva a nwéhél bés? (Añ Tjémbi 103:12.) David a nkal le i ngéda Yéhôva a nwéhél bés, a nkis bibéba gwés haa “kiki pes likôl i yé haa ni pes hiôñg.” Pes likôl i yé haa ngandak ni pes hiôñg, kekikel i bipes bi, bi ga bomna bé. Hala a niiga kii bés inyu nwéhél i Yéhôva? Kaat yada i ntoñol nlôñ unu le: “Ibale hala nyen Yéhôva a nkis bibéba gwés haa, hala a nkobla le a nla ha bé tehe gwo, a nla ha bé nok gwo njiñ, a nla ha bé to bigda gwo.” Njiñ i nla boñ we le u bigda ngim yom. Ndi i ngéda Yéhôva a nwéhél, a yé ndik wengoñle a nla ha bé nok njiñ i i nla boñ le a bigda bibéba di bi boñ.​—Ézékiel 18:​21, 22; Minson mi baôma 3:19.

15. Kii di nla boñ ibale kiññem i nlôôha kéés bés inyu bibéba di bi boñ behee?

¹⁵ Lelaa bibuk bi David bi bi yé i kaat Tjémbi 103 bi nla hôla bés i neebe le Yéhôva a nwéhél bés? Ibale kiññem i nlôôha kéés bés inyu mam di bi boñ behee, di nla badba le: ‘Baa me nkahal hôya i jam Yéhôva a mbigda? Baa me nkahal hôya le Yéhôva a nyi le me bi gwééne ikété béba ni le ibale me ntam béba yem, a ga nwéhél me? Baa me mbigda i jam Yéhôva a bi mal hôya behee? Baa me mbigda bibéba Yéhôva a bi mal nwéhél, a hôya?’ Yéhôva a nhoñol ha bé bibéba di bi boñ behee. To bés di nlama ha bé hoñol gwo. (Tjémbi 130:3) Ibale di neebe le Yéhôva a nwéhél bés, kiññem i ga lôôha ha bé kéés bés, d’a ke ni bisu i gwélél Yéhôva ni maséé.

16. Ti hihéga hi hi ñunda bikuu bi nla kwél bés ibale di nlôôha hoñol i mam mabe di bi boñ behee. (Béñge yak titii.)

¹⁶ Di yoñ le hihéga. Ibale di nwas le kiññem i lôôha kéés bés inyu bibéba di bi boñ behee, a yé ndik wengoñle di nluk matôa di béñgege ndik rétroviseur. I yé loñge i béñge rétroviseur ngim mangéda inyu tehe jam libe li li nla lo ni i keñgle jo. Ndi inyu boñ le u tibil luk matôa, u nlama béñge i bisu gwoñ. Nlélém, hala a yé loñge i ngéda di mbigda bibéba di bi boñ behee inyu boñ le di hoñol bikuu bi bi kwél bés, di yoñ ki makidik le di ga boñ ha bé i bibéba bi. Ndi ibale di nlôôha hoñol i mam mabe di bi boñ, kiññem i nla lôôha kéés bés, i tômbôs bés mu nson wés. Jon di nlama béñge bisai bi yé bés i bisu. Di yé i njel i i nkena i niñ boga, i ngéda d’a pam i mbok yondo, d’a ‘hoñol ha bé i mam mabe di bi boñ behee.’​—Yésaya 65:17; Bingéngén 4:25.

DI KEE NI BISU I MÔMÔS MIÑEM NWÉS

17. Inyuki di nlama bé waa bigda le Yéhôva a ngwés bés ni le a nwéhél bés?

¹⁷ Di kee ni bisu i bigda le Yéhôva a ngwés bés ni le a nwéhél bés. (1 Yôhanes 3:​19, buk isi lipep.) Inyuki? Inyule Satan a nwaa bé tembee le Yéhôva a nla bé gwés bés, ni le a nla bé nwéhél bés. Minsoñgi nwé mi yé ndik le di waa gwélél Yéhôva. Munu dilo di nsôk dini, di nyi le a ga kônde yéñ manjel i tômbôs bés inyule a nyi le a gwé ha bé ngandak ngéda. (Masoola 12:12) Di nwas bañ le a yémbél bés!

18. Kii u nla boñ inyu neebe le Yéhôva a ngwés we ni le a nwéhél we?

¹⁸ Boñ mam momasôna di bi tehe i yigil i bi tagbe inyu kônde hémle le Yéhôva a ngwés we. Hoñol bilem bi Yéhôva inyu kônde hémle le a nwéhél we. Bigda i mam batila Bibel ba bi kal inyu nwéhél i Yéhôva. U hôiga bañ le a nyi le u bi gwééne ikété béba, ni le a nkônôl we ngoo. Bigda ki le i ngéda a nwéhél we, wee a mal nwéhél we. Ibale u mboñ hala, wee u mbôdôl Yéhôva ñem kiki David, u kal ki le, “A Yéhôva me nyéga lakii u nwéhél ‘bibéba gwem’!”​—Tjémbi 32:5.