Unda le u ndiihe i ‘bôt Yéhôva a nti kiki makébla’

1. Mambe makébla Yésu a bi ti bés?

MUT binam nye ki nye a mah unda bé lem i likap kiki Yésu. I ngéda a bé hana ’isi, a bi boñ manyaga inyu hôla ngandak bôt. (Lukas 9:​12-17) Likébla li nlôôha likeñi a bi ti bés li yé niñ yé. (Yôhanes 15:13) I mbus bitugne gwé, a bi ke ni bisu i hôla bés. Ndik kiki a bi bôn, a bi bat Yéhôva le a ti bés mbuu mpubi wé inyu niiga bés ni inyu hôgbaha bés. (Yôhanes 14:​16, 17, buk isi lipep.; 16:13) Ni njel makoda més, Yésu a nke ni bisu i ti bés kii yosôna i mbéda bés inyu yilha bôt ba nkoñ ’isi wonsôna banigil.​—Matéô 28:​18-20.

2. Bonjee ba yé “bôt kiki makébla” kaat Éfésô 4:​7, 8 i mpôdôl?

² Di pôdôl likébla lipe Yésu a bi ti bés. Ñôma Paul a tila le, i ngéda a bi bet i ngii, “a bi ti bôt kiki makébla.” (Añ Éfésô 4:​7, 8.) Paul a bi toñol le Yésu a bi ti i makébla mana inyu hôla likoda ikété ngandak manjel. (Éfésô 1:​22, 23; 4:​11-13) I len ini, i bôt bana ntinak kiki makébla, ba nla ba bahôla nson, mimañ, bagwélél ba makiiña.a I yé maliga le i lôk kéé ini i yé bikwéha bi bôt, jon i mboñ dihôha. (Yakôbô 3:2) Ndi Nwet wés Yésu Kristô a ngwélél bo inyu hôla bés; ba yé toi makébla inyu yés.

3. Toñol lelaa bésbobasôna di nla nit bôlô i bôt Djob a nti “kiki makébla”?

³ Yésu a bi ti “bôt kiki makébla” inyu lédés likoda. (Éfésô 4:12) Ndi bésbobasôna di nla hôla bo i gwel i nson nkeñi unu. Di yoñ hihéga: Bahogi ikété yés ba yé i nson maoñ u mandap ma Ane. Bape ba nit i lôk kéé i nsal maoñ, ba nti bo bijek ni ngim gwom, ba bôñlak bo mam mape ki. Nlélém, bésbobasôna di nla nit bôlô bahôla nson, mimañ ni bagwélél ba makiiña ba ngwel ni njel bipôdôl gwés ni maboñok més. Di tehe lelaa di nla ôt nseñ ni bôlô yap i ngui, ni lelaa di nla unda bo lôñni Yésu nu a bi ti bés ‘i bôt bana kiki makébla,’ le di ndiihe nson wap.

BAHÔLA NSON BA “NHÔLA BÔT BAPE”

4. Mimbe minson bahôla nson ba bé gwel i hiai hi bisu?

⁴ I hiai hi bisu, lôk kéé ihogi i bé bahôla nson. (1 Timôtéô 3:8) I nene le bon ba bé bôt “ba nhôla bôt bape” Paul a mpôdôl i kaat 1 Korintô 12:28. Bahôla nson ba bé gwel minson mi mahee inyu boñ le mimañ mi yoñ ngéda i niiga ni i yuuga lôk kéé inyu lédés bo. Kiki hihéga, bahôla nson ba bi lama tiimba tila Bitilna Bipubi tole ba bé somb bisélél bi bé béda inyu i bôlô i.

5. Mimbe minson bahôla nson ba ngwel i len ini?

⁵ Di tehe lelaa bahôla nson ba nhôla bôt i likoda joñ. (1 Pétrô 4:10) Ba nla bat bo le ba tjek mam ma moni, mam ma mabôga ma likalô tole ba bat ntôñ bikaat inyu lôk kéé, ba nla sal i audiô vidéô, i maleege tole i pubus ndap Ane. Minson mini nwominsôna mi yé nseñ inyu boñ le mam ma kee loñge i likoda. (1 Korintô 14:40) Jam lipe ki, ngim bahôla nson i nyoñ ngaba i likoda li ñem sonde, i nti ki minkwel mi mbamba. Nhôla nson a nla ki hôla mañ i éga juu li likalô. Ngim mangéda, bahôla nson ba ba yé minhôôlak ba nla éga mimañ i yuuga lôk kéé inyu ti bo makénd.

6. Inyuki di ndiihe bôlô i ngui i bahôla nson?

⁶ Inyuki bôlô bahôla nson ba nsal i yé nseñ inyu likoda? Sita yada i loñ Bôliwai le Beberlyb a nkal le “Me nlôôha gwés makoda inyu bôlô ilam bahôla nson ba nsal. Bon ba mboñ le me nla tôp tjémbi, me ti mandimbhe, me emble minkwel, me nigil ngandak mam mu bividéô ni bititii. Ba ntat lôk kéé i makoda, ba hôlga yak i bet ba nla bé lo i emble makoda ni njel internet. I mbus likoda, bon ba yé bôt ba bisu i yoñ ngaba i pubus ndap Ane, ba nhôla i tjek mam ma moni, ba nyoñ bitelbene le lôk kéé i bana bikaat bi mbéda bo. Me nti bo mayéga!” Mankéé Leslie, nu a nyééne i Kolombia, ni nu nlôm a yé mañ a nkal le: “Bahôla nson ba nhôla nlô wem i sal ngandak bibôlô. Ibale bo bé, ki a pégi ngandak, jon me nti bo mayéga inyule ba nhôla nye ni makénd.” Ibabé pééna hala nyen yak we u nôgda.​—1 Timôtéô 3:13.

7. Lelaa di nla unda le di ndiihe bahôla nson? (Béñge yak titii.)

⁷ Tolakii ñem wés u nla ba nyonok ni mayéga inyu bôlô bahôla nson ba nsal, Bibel i nkônde ti bés makénd ni bini bibuk le: “Ni yi ki ti mayéga.” (Kôlôsé 3:15) Krzysztof, nu a yé mañ i loñ Finland, a nkal le “Me bi tilna nhôla nson wada kaat i het me bi sima nlôñ Bibel wada, me kal nye ngim jam a bi boñ inyu lédés me, me unda ki nye inyuki me ndiihe nson wé.” Pascal bo Jael, ba ba nyééne i Kalédônia Yondo, ba mbéna soohe inyu bahôla nson. Pascal a ntoñol le: “Masañga mana, di nlôôha soohe Yéhôva inyu bahôla nson, di yemhege nye le a hôla bo mu nson wap.” Yéhôva a ñemble i nya masoohe ini, yak likoda jolisôna li ñôt nseñ ni mo.​—2 Korintô 1:11.

MIMAÑ MI LIKODA MI “NTUMBBA NI NSON IKÉTÉ NAN”

8. I hiai hi bisu, inyuki Paul a bi tila le mimañ mi “ntumbba ni nson”? (1 Tésalônika 5:​12, 13)

⁸ Mimañ mi hiai hi bisu mi bé sal ni ngui inyu likoda. (Añ 1 Tésalônika 5:​12, 13; 1 Timôtéô 5:17) Mimañ mi bé “éga” likoda, mi niigaga i makoda, mi yoñok makidik i juu li mimañ. Mi bé “ti” lôk kéé i bôda ni i bôlôm maéba ni gwéha inyu hôla bo i keñgle dipa di Satan. (1 Tésalônika 2:​11, 12; 2 Timôtéô 4:2) I yé maliga le, i lôk kéé ini i bé sal ki ni ngui inyu yoñ ndun ni mahaa map ni inyu tééda hémle i ngui.​—1 Timôtéô 3:​2, 4; Titô 1:​6-9.

9. Mimbe minson mimañ mi ngwel i len ini?

⁹ I len ini, mimañ mi ngwel ngandak minson. Mi yé baañal ñañ nlam. (2 Timôtéô 4:5) Mi ñañal ñañ nlam ni makénd, mi ntjek nson u likalô mu mabôga map, mi niiga ki bés i añal ñañ nlam ni i niiga loñge. Mi nkéés lôk kéé yap ni konangoo, ngi ndodla. I ngéda kristen i mboñ béba ikeñi, mimañ mi nhôla nye i témbna maada malam ni Yéhôva. Mi mboñ ki biliya le likoda li ba mapubi i pes mbuu. (1 Korintô 5:​12, 13; Galatia 6:1) Nson u bisu u mimañ u yé i tééda bémba. (1 Pétrô 5:​1-3) Mi nkôôba loñge inyu ti minkwel mi mi nlédhana, mi mboñ biliya i yi lôk kéé yosôna i likoda, mi nyuuga ki lôk kéé inyu lédés bo. Mimañ mihogi mi nyoñ ngéda i oñ ni i bôñgôl mandap ma Ane, i tjek makoda ma ndôn, i sal i Comité de liaison hospitalier, i yuuga bakokon, i gwel ngandak minson mimpe. Mimañ mi nsal toi ni ngui inyu hôla bés!

10. Mambe manjom ma ntinde bés i diihe bôlô i ngui mimañ mi nsal?

¹⁰ Yéhôva a bi bôk a legel i bisu bi ngéda le batééda bémba ba ga yoñ ndun ni bés ni le di “ga kon ha bé woñi to sehla.” (Yérémia 23:4) Johanna, sita yada i loñ Finland a bi nôgda i jam li i ngéda nyañ a bé kon béba ngandak. A nkal le: “Tolakii i bééne me nledek jam i toñle bôt bape i yom me bé nôgda, mañ wada u me bé yi bé loñge, u bi emble me ni wongut i ngéda me bé toñle nye mandutu mem. U bi soohe ni me, u kônde kwés me nkaa le Yéhôva a ngwés me. Me mbigda ha bé kii mañ unu u bi kal me, ndi i jam me mbigda li yé le a bi hôgbaha me. Me yé nkwoog nkaa le Yéhôva nyen a bi om nye i hôla me i loñge ngéda.” Lelaa mimañ mi likoda joñ mi bi hôla we?

11. Lelaa di nla unda le di ndiihe mimañ? (Béñge yak titii.)

¹¹ Yéhôva a nsômbôl le di unda le di nlôôha ndiihe mimañ “inyu nson wap.” (1 Tésalônika 5:​12, 13) Henrietta, nu a niñ i loñ Finland, a nkal le: “Mimañ mi yé bebee i hôla bôt bape, ndi hala a nkobla bé le mi nlôôha bana ngéda ni ngui tole nwomede mi mboma bé map mandutu. Ngim mangéda me bé me kal mañ wada le: ‘Baa u nyi? U yé toi loñge mañ. Me nhoñol le wemede u nyi hala.’” Sita yada i loñ Turkai le Sera a nkal le: “Mimañ mi gwé ngôñ ni makénd inyu kena nson wap ni bisu. Jon di nla tilna bo man kaat, di naña bo i je i mbai yés tole di éga bo i likalô.” Baa mañ wada u yé mu likoda joñ le u nsômbôl ti mayéga inyu bôlô a nsal? Yéñ manjel inyu unda nye le u nti nye mayéga inyu bôlô yé.​—1 Korintô 16:18.

BAGWÉLÉL BA MAKIIÑA BA NLÉDÉS MAKODA

12. I hiai hi bisu, bimbe bitelbene bi bi yôña inyu lédés makoda? (1 Tésalônika 2:​7, 8)

¹² Kristô Yésu a bi ti “bôt kiki makébla” inyu hôla likoda nya ipe. A bi gwélél mimañ mi mi bé i Yérusalem inyu téé Paul, Barnabas, ni mimañ mimpe kiki bagwélél ba makiiña. (Minson mi baôma 11:22) Inyuki? Inyu nlélém njom ba ntéé bahôla nson ni mimañ, hala wee inyu lédés makoda. (Minson mi baôma 15:​40, 41) I lôk kéé ini i mboñ ngandak bisesema inyu yônôs nson wap, ngim mangéda, i yé yak bebee i nimis niñ yap inyu niiga ni inyu lédés bôt bape.​—Añ 1 Tésalônika 2:​7, 8.

13. Mimbe minson bagwélél ba makiiña ba ngwel?

¹³ Bagwélél ba makiiña ba nhiôm ngandak. Bahogi ba nke ngandak kilôméta inyu yuuga makoda. Hiki sonde, ngwélél makiiña a nti ngandak minkwel, a nyuuga lôk kéé inyu lédés bo, a ñéga likoda li basañal, likoda lôñni mimañ ni makoda inyu likalô. A nkôôba minkwel, a ntjek ki makoda ma makiiña ni makoda ma ndôn. A ñéga suklu basañal, a ntjek boma ni basañal ba likiiña jé, u héya i mam mana momasôna, hikuu hi loñ hi yé hi ti ki nye minson mimpe.

14. Inyu mambe manjom di ndiihe bôlô i ngui i bagwélél ba makiiña?

¹⁴ Lelaa makoda ma ñôt nseñ ni bôlô i ngui i bagwélél ba makiiña? Mankéé wada i loñ i Turkai a nkal inyu mayuuga ma bagwélél ba makiiña le: “Hiki ngéda ba nyuuga bés, hala a nti me makénd i tégbaha ngandak ngéda i hôla lôk kéé i bôda ni i bôlôm. Me ma boma ngandak bagwélél ba makiiña; ndi to wada wap a mah bé boñ wengoñle a pégi ngandak tole a nsômbôl bé kwel ni me.” Johanna, nu di mbôk di pôdôl, a bi pam ni ngwélél makiiña wada i likalô, ndi ba bi koba bé mapeple mé. A nkal le: “Kekikel, me ga hôya bé i kel i. Bilôk bikéé bi bôda biba bi bi bôô, bi ke homa numpe, bi bé héñél me ngandak. Ngwélél makiiña a bi ti me makénd, a hôla me i nok le, i nson u Yéhôva, i nla pam le di laa bé tégbaha ngandak ngéda ni mahaa més tole ni mawanda més, ndi i mbok yondo mam ma ga ba bé hala, di ga bana i pôla i.” Ngandak ikété yés i mbigda mangéda malam i bi tégbaha ni bagwélél ba makiiña.​—Minson mi baôma 20:37–21:1.

15. (a) Inoñnaga ni 3 Yôhanes 5-8, lelaa di nla unda le di ndiihe bagwélél ba makiiña? (Béñge yak titii.) (b) Inyuki di nlama diihe baa ba lôk kéé i i ngwel minson ikété likoda, lelaa di nla unda hala? (Béñge minkéñék mi matila le “Bigdana baa bap.”)

¹⁵ Ñôma Yôhanes a bi ti Gayô makénd i leege lôk kéé i i nlo i lédés makoda, ni i “huuha bo mu njel yap i nya i lémél Nyambe.” (Añ 3 Yôhanes 5-8.) Njel yada di ngwélél inyu boñ hala i yé i ngéda di nleege ngwélél makiiña i je ni bés. Njel ipe i yé le di tjek ngéda yés i ba i biboma bi likalô i sonde i mayuuga. Leslie, nu di mbôk di pôdôl a ngwélél manjel mape inyu ti bo mayéga. A nkal le: “Me nsoohe Yéhôva le a ti bo mam ma mbéda bo. Me ni nlô wem di yé di tilna bo bikaat inyu kal bo lelaa mayuuga map ma bi hôla bés.” Bigda le bagwélél ba makiiña ba yé bôt ba binam kiki bés. I nla pam le ba kwoo kon, ba bana nduña tole ba nimis makénd map. Bebek le bibuk bilam u yé le u kal ngwélél woñ makiiña tole man jomb u nla ti nye, bi yé le bi ba ndimbhe i masoohe mé!​—Bingéngén 12:25.

DI GWÉ NGÔÑ NI “BÔT KIKI MAKÉBLA”

16. Inoñnaga ni Bingéngén 3:​27, mambe mambadga lôk kéé i bôlôm i nlama badba?

¹⁶ I nkoñ ’isi wonsôna, di gwé ngôñ ni ngandak lôk kéé i bôlôm i i nla ba “bôt kiki makébla.” Ibale u yé nsôblege mankéé nu munlôm, baa yak we u nla ba wada mu? (Añ Bingéngén 3:27.) Baa u gwé ngôñ i yônôs matode ma mbéda inyu ba nhôla nson? Baa u yé le u hôlôs bilem bi mbéda inyu yila mañ u likoda?c Baa u nla tjek mam moñ inyu yônôs lipep inyu ke i suklu baañal ñañ nlam? I suklu i i ga ôô we kayéle Yésu a gwélél we i nya i yôni. Ibale u nôgda wengoñle u gwé bé i ngap i, soohe Yéhôva. Bat nye le a ti we mbuu mpubi wé, le u hôla we i yônôs minson nwominsôna ba nla ti we.​—Lukas 11:13; Minson mi baôma 20:28.

17. I ngéda di ntehe bôt Nyambe a nti bés “kiki makébla,” kii hala a niiga bés inyu Kiñe yés, Kristô Yésu?

¹⁷ Lôk kéé i bôlôm i Yésu a nti bés “kiki makébla,” i ñéba toi le nyen a ñéga bés munu dilo di nsôk dini. (Matéô 28:20) Di nlama ti Kiñe yés mayéga inyule a ngwés bés, a ñunda bés loñgeñem, a ntôñ ki bés mu kiki a ntéé lôk kéé i bôlôm inyu yoñ ndun ni bés. Jon yéñ manjel i unda le u ndiihe i lôk kéé i bôlôm ini i i nsal ni ngui. U hôya bañ ti Yéhôva mayéga inyule nyen a yé bañga lingen li “hiki likébla lilam ni hiki likébla li yé peles.”​—Yakôbô 1:17.