Kii nwéhél i Yéhôva i nkobla inyu yoñ?

1. Inyuki hala a nlet i yi kii mut a mpôdôl i ngéda a nkal we le, a nwéhél we?

“ME NWÉHÉL WE.” Kinje hogbe di nôgda i ngéda bibuk bini bi nlôl ni mut di nkal tole di mboñ jam li li mbabaa nye! Ndi kii bibuk bini le “Me nwéhél we” bi nkobla? Baa i mut u mbabaa a nsômbôl kal le ni nginda yii mawanda? Tole a nsômbôl ndik kal le a gwé ha bé ngôñ i pôdôl i jam li? I ngéda bôt iba ba nkal we le “Me nwéhél we,” i jam ba mpôdôl li nla ba mahéñha.

2. Lelaa Bibel i ntoñol nwéhél i Yéhôva? (Béñge yak matila isi lipep.)

² I nwéhél Yéhôva a nwéhél bés i yé maselna ni nwéhél di nwéhél bôt bape. Mut nye ki nye a nla bé nwéhél kiki Yéhôva. Ntôp tjémbi a kal inyu Yéhôva le: “Bañga nwéhél i nlôl i weeni, inyu boñ le bôt ba kon we woñi.”a (Tjémbi 130:4) Ntiik, nwéhél i Yéhôva i yé “bañga nwéhél.” Nyen a yé nu a ñunda bés kii nwéhél i yé toi. Ngim mangéda, batila Bibel ba bé gwélél buk i Lôk Héber yada i i ngwéélana bé inyu pôdôl nwéhél i bôt ba binam.

3. Mambe maselna ma yé ipôla nwéhél i Yéhôva ni yés? (Yésaya 55:​6, 7)

³ I ngéda Yéhôva a nwéhél mut, a yé a sas béba yé, i mut nu a témb a bana maada malam ni nye. Nwéhél i Yéhôva i mbuma ñañ, a yé ki bebee i nwéhél bés ni ñem wé wonsôna.​—Añ Yésaya 55:​6, 7. 

4. Lelaa Yéhôva a nhôla bés i tibil nok kii i yé bañga nwéhél?

⁴ Ibale nwéhél i Yéhôva i yé maselna ni yés, lelaa bés bikwéha bi bôt di nla tibil nok kii i nkobla? Yéhôva a ngwélél dihéga dilam inyu hôla bés i tibil nok ikepam limbe likala a nwéhél bés. Munu yigil ini, di ga wan ndék dihéga i i ga unda bés le, i ngéda di ntam bibéba gwés, Yéhôva a nhéya gwo, i nlélém ngéda, a nti bés pôla i tiimba bana maada malam ni nye. Mu kiki di ba di nwan dihéga di, di ga kônde gwés Yéhôva, di ti ki nye mayéga inyu loñge yé ñem.

YÉHÔVA A NHÉYA BÉBA YÉS

5. Kii i mbôña i ngéda Yéhôva a nwéhél bibéba gwés?

⁵ Bibel i mbéna hégha béba ni mambegee ma nyét. Kiñe David a bi pôdôl bibéba gwé ni bini bibañga le: “Mahôha mem ma yé i ngii ño wem; kiki mbegee i nyét, me nla bé begee mo.” (Tjémbi 38:4) Ndi Yéhôva a nwéhél i bet ba ntam bibéba gwap. (Tjémbi 25:18; 32:5) Buk i Lôk Héber i i ngwéélana inyu “nwéhél” i yé “pa” tole “begee.” I ngéda Yéhôva a nwéhél bibéba gwés, a yé kiki bo mpémba mut u u nhéya mbegee i nyét i bituu gwés, u kena yo haa.

6. Lelaa Yéhôva a nkena bibéba gwés haa ni bés?

⁶ Hihéga hi ngui hipe hi ñunda bés lelaa Yéhôva a nkena bibéba gwés haa. Tjémbi 103:12 a nkal le: “Kiki pes likôl i yé haa ni pes hiôñg, hala nyen a nkena maboñok més mabe haa ni bés.” Pes likôl i yé haa ngandak ni pes hiôñg. Kekikel, bipes bi gwo biba bi ga bomna bé. Hala a nkobla le Yéhôva a nkena bibéba gwés haa ngandak i nya di nla bé to hégda. Hala a nhôgbaha bés i nok kii bañga nwéhél i nkobla.

7. Lelaa Yéhôva a ntoñol i yom a mboñ ni bibéba gwés? (Mika 7:​18, 19)

⁷ To hala kiki Yéhôva a nkena bibéba gwés haa ni bés, baa a nke ni bisu i tééda gwo? To jam. Kiñe Hézékia a bi tila inyu Yéhôva le: “U bi lep bibéba gwem gwobisôna i mbus yoñ.” Tole buk isi lipep i nkal le: “U bi héya bibéba gwem gwobisôna i mis moñ.” (Yésaya 38:​9, 17; buk isi lipep.) Hala a nkobla le ba bobasôna ba ntam bibéba gwap, Yéhôva a nlep gwo haa kayéle a mbigda ha bé ki gwo. Bibuk bi, bi nla ki kobla le: “A bi boñ ki le bibéba gwem bi ba wengoñle me mah boñ bé béba kekikel.” Inyu tibil nôgha bés i jam li, Bibel i ngwélél hihéga hipe hi hi yé i kaat Mika 7:​18, 19. (Añ.) Bipes bi kaat bi, bi nkal le Yéhôva a nleñ bibéba gwés gwobisôna ikétékété tuye. I ngéda kôba, hala a bé le a ba jam li nlet i bada yom i i bi léña ikétékété tuye.

8. Kii di ma nigil?

⁸ Dihéga di Bibel dini di ñunda le i ngéda Yéhôva a nwéhél bibéba gwés, a nwéhél bés ni ñem wonsôna kayéle kiññem i nkéés ha bé bés. Ndik kiki Kiñe David a bi kal: “Maséé ni i bôt maboñok map mabe ma nwéhlana, yak ba bibéba gwap bi nséha; maséé ni i mut Yéhôva a ga añ bé béba yé kekikel.” (Rôma 4:​7, 8) Kinje bañga nwéhél!

YÉHÔVA A NSAS BÉBA YÉS

9. Himbe hihéga hi ngui Yéhôva a ngwélél inyu unda bés le a nwéhél bés ni ñem wé wonsôna?

⁹ Yéhôva a ngwélél hihéga hi ngui hipe inyu hôla bés i nok lelaa ni njel binoñ a nwéhél i bôt ba ntam bibéba gwap. Ikété Bibel, di ñañ le Yéhôva a njôwa, a mpubus ki bibéba bi. Hala nyen Yéhôva a mpubus mboñbéba. (Tjémbi 51:7; Yésaya 4:4; Yérémia 33:8) Yéhôva nyemede a ntoñol i jam li ni bini bibuk le: “To ibale bibéba binan bi nkôyôp kiki matjél; bi ga pôp kiki libu li lisuni; to ibale bi nkôyôp tjôôm, bi ga pôp kiki mahuu ma ntômba.” (Yésaya 1:18) Hala a yé jam li nlôôha let i pubus yom i i nkôyôp tjôôm, tole i héya matjél ma ma yé i mbot. Ni hihéga hini, Yéhôva a nkwés bés nkaa le bibéba gwés bi nla pôp kayéle di tehe ha bé gwo.

10. Himbe hihéga hi ngui hipe Yéhôva a ngwélél inyu unda ikepam limbe likala a nwéhél bés?

¹⁰ Kiki di ntehe i yigil i ntagbe, Bibel i nhégha bibéba gwés ni mapil. (Matéô 6:12; Lukas 11:4) Jon hiki ngéda di mboñ béba, a yé ndik wengoñle di nyoñ mapil, yoñ ni yoñ. Yéhôva a mbat bés soso pil! Ndi i ngéda a nwéhél bés, a yé wengoñle a nsas pil a mbat bés. A mbat bé bés le di tiimba saa inyu bibéba a bi nwéhél bés. Kinje hihéga hi ñunda hogbe di nôgda i ngéda Yéhôva a nwéhél bés!

11. I ngéda Bibel i nkal le bibéba gwés bi nséha, kii hala a nkobla? (Minson mi baôma 3:19)

¹¹ Yéhôva a mélés ndik bé mapil més, tole bibéba gwés, ndi a nsas yak gwo. (Añ Minson mi baôma 3:19.) Inyu tibil nok i jam li, hégda le mut a ntila pil wés i ngim kôñtô, inyu mélés wo, a ntand mu ngii, ndi i yom a ntila i ngi nen-ge. Ndi, i sas matila i yé jam lipe. Inyu tibil nok hihéga hi, di hégda tinti ba bé gwélél i ngéda kôba, mut a bé le a hoo sas yo ni éponge i i bééna malép. Jon i ngéda pil u bé u “séha,” yak matila ma bé ma nyoi ngélé yada inyu ngélé yosôna, mut a bé ha bé ki le a tehe i yom i bak ntilga. A bé ndik wengoñle di mah bé bana pil kekikel. Hala a nhôgbaha bés i yi le Yéhôva a mélés ndik bé bibéba gwés, ndi a nsas yak gwo ngélé yada inyu ngélé yosôna!​—Tjémbi 51:9.

12. Kii hihéga hi ond i i gwé mbibi hi niiga bés?

¹² Yéhôva a ngwélél hihéga hipe inyu toñol lelaa a nsas bibéba gwés. A nkal le: “M’a sas maboñok moñ mabe, ma ga nene ha bé kiki yom le ond i nhô, me hô yak bibéba gwoñ kiki yom le ond i i gwé mbibi i nhô.” (Yésaya 44:22) I ngéda Yéhôva a nwéhél bés, a yé wengoñle a nhô bibéba gwés ni ond i i gwé mbibi, letee bi nyoi, kayéle mut nye ki nye a nla ha bé tehe gwo.

13. Kii di nôgda i ngéda Yéhôva a nwéhél bibéba gwés?

¹³ Kii dihéga dini di niiga bés? I ngéda Yéhôva a nwéhél bibéba gwés, di nlama bé nwas le kiññem i kee ni bisu i kéés bés. Ni njel matjél ma Yésu Kristô, bibéba gwés bi nséha ngélé yada inyu ngélé yosôna. Ba nla ha bé ki to tehe ñañga u bibéba gwés. I ngéda di ntam bibéba gwés, ha nyen di nkôhna bañga nwéhél i i nlôl yak Yéhôva.

YÉHÔVA A NEEBE LE DI TÉMB DI YILA MAWANDA MÉ

14. Inyuki di nla bôdôl nwéhél i Yéhôva ñem? (Béñge yak .)

¹⁴ Bañga nwéhél i nlôl ni Yéhôva, i nhôla bés i bana maada malam ni nye. I nhôla bés i bana kiññem i mpôp. Di nkon bé woñi le Yéhôva a nginda unbenege bés, to le a nyéñ manjel i kogse bés, a ga boñ bé hala kekikel. Inyuki di nla bôdôl Yéhôva ñem i ngéda a nkal le a nwéhél bés? Yéhôva a nkal ni njel mpôdôl Yérémia le: “Inyule me ga nwéhél bo maboñok map mabe, me ga bigda ha bé bibéba gwap.” (Yérémia 31:34) Ñôma Paul a bi pôdôl bibuk bini i ngéda a kal le: “M’a hoñol ha bé ki to bibéba gwap.” (Lôk Héber 8:12) Ndi kii hala a nkobla toi?

15. I ngéda Bibel i nkal le Yéhôva a mbigda ha bé bibéba gwés, hala a nkobla le kii?

¹⁵ Ikété Bibel, i buk ini le “bigda” i nkobla bé hiki ngéda le mut a nhoñol jam li bi tagbe tole li li bi bôña. Ngim mangéda, i nla pôdôl mut a yé i boñ ngim jam. I ntonba u bé u péni i kék i njiiha ipañ Yésu, u bi kal le: “A Yésu, hoñol [bigda] me i ngéda w’a lo i Ane yoñ.” (Lukas 23:​42, 43) Ha ngéda i, i mut nu a bé kal ndigi bé Yésu le a bigda nye. Ndimbhe i Yésu i bé unda le a’ boñ jam inyu lona i ntonba u i bitugne. Jon, i ngéda Yéhôva a nkal le a ga bigda ha bé bibéba gwés, a nsômbôl kal le a ga kogse ha bé bés. A ga kogse ha bé bés i dilo di nlo inyu bibéba a nwéhél.

16. Lelaa Bibel i ntoñol kunde i nlôl ni bañga nwéhél?

¹⁶ Bibel i ngwélél hihéga hipe hi ngui inyu hôla bés i nok i kunde di nkôhna i ngéda Yéhôva a nwéhél bés. Libak jés li kwéha li mboñ le di ba “minkol mi béba.” Ndi i ngéda Yéhôva a nwéhél bés, di nyila minkol mi mi “nyodi i mok mi béba.” (Rôma 6:​17, 18; Masoola 1:5) Ñ, i ngéda di nyi le Yéhôva a nwéhél bés, di nla ba maséé kiki nkol u u nkôhna kunde.

17. Lelaa nwéhél i mbuubaha bés? (Yésaya 53:5)

¹⁷ Añ Yésaya 53:5. Bibel i nkal le inyule di yé bikwéha bi bôt, di yé kiki bôt ba ba nkon ngim kon i i nkena i nyemb. A yé wengoñle Yéhôva a bi mbuubaha bés i ngéda a bi ti Man wé kiki binoñ. (1 Pétrô 2:24) Binoñ bi mboñ le di tiimba bana maada malam ni Yéhôva. Maada ma, béba yon i bi ôbôs mo. I ngéda mut a konok ngandak ndi ba mbuubaha nye, a nlôôha ba maséé. Nlélém ni bés, di yé maséé ngandak i ngéda maada més ni Yéhôva ma ntémb ma ba malam, di bôdôl ki lémél nye inyule a nwéhél bés.

KII NWÉHÉL I YÉHÔVA I NKOBLA INYU YÉS?

18. Bimbe biniigana di ñôt mu dihéga di mpôdôl nwéhél i Yéhôva? (Béñge yak minkéñék mi matila le “Lelaa Yéhôva a nwéhél bés.”)

¹⁸ Bimbe biniigana di ñôt i dihéga di Bibel di di mpôdôl nwéhél i Yéhôva? I ngéda Yéhôva a nwéhél bés, a nwéhél bés ni ñem wé wonsôna inyu ngélé yosôna. Hala a nti bés pôla i bana maada malam ni Tata wés nu ngii. I nlélém ngéda, di mbigda le bañga nwéhél i yé likébla. Yéhôva a nti bés likébla di kôli bé bana, inyule a ngwés bés, a nkônôl ki bés ngoo. I ta bé yom bikwéha bi bôt kiki bés bi nla kaa.​—Rôma 3:24.

19. (a) Inyu limbe jam di nlama ti Yéhôva mayéga? (Rôma 4:8) (b) Kii di ga tehe i yigil i noñ?

¹⁹ Añ Rôma 4:8. Di nlôôha ba maséé i yi le Yéhôva a nwéhél bés! (Tjémbi 130:4) Ndi inyu boñ le Yéhôva a nwéhél bés, di nlama boñ jam li mahee. Yésu a bi toñol le: “Ibale ni nwéhél bé bôt mahôha map, to Isoñ nan a’ nwéhél bé bé mahôha manan.” (Matéô 6:​14, 15) Jon, di nlama kôna Yéhôva, di nwéhél bôt bape. Ndi lelaa di nla kôna nye? I yigil i noñ ha i ga unda bés lelaa di nla boñ hala.