Lelaa u nla nwéhél bôt bape kiki Yéhôva?

1-2. (a) Imbe ngéda i nla ba bés ndutu i nwéhél i mut a mboñ bés béba? (b) Lelaa Denise a bi nwéhél?

BAA hala a nlédél we i nwéhél bôt bape? Ngandak ikété yés i mboma i ndutu i, téntén i ngéda mut a mpot tole a mboñ ngim jam i i nlôôha babaa bés. Ndi, di nla yémbél hiun hiés, di pam ki i nwéhél bôt bape. Kiki hihéga, di pôdôl le ndémbél i mankéé Denisea nu a bi unda nwéhél i nya i mbuma ñañ. I nwii 2017, Denise ni lihaa jé ba bi tip yuuga Hikuu hikeñi hi Mbôgi Yéhôva. Kiki ba bé huu i mbai yap, litôa lipe li bi lo li bômôl litôa jap. Denise a bi nimis yi. I ngéda a bi tôde, a nok le bon bé ba mbabaa ngandak ni le nlô wé Brian a nwo. I ngéda Denise a nhoñol i jam li, a nkal le: “Ñem u bé le u pédi me, me bé yi ha bé to kii me boñ.” I mbus ngéda, a bi nok le i mut a bé luk litôa li, a bééna bé njom yo ki yo i i bi tinde nye i bômôl bo. Jon a bi soohe Yéhôva le a ti nye nsañ.

² Ba bi gwel i mut a bi kumul bo, ba kena nye i bikééhene inyule a bi nol mut. Ibale hikuu hi bikééhene hi kit le i mut nu a gwé njom, ki i mut nu a bi ke i mok. Ndi hikuu hi bikééhene hi bi kal Denise le, i jam a ga kal jon li ga yis bo too i mut nu a ga ke i mok tole heni! Denise a nkal le: “Me bi nôgda wengoñle mut a mbabaa me, ndi a kôp hilôba mu mbabaa yem. Inyule me bé lama ki pôdôl mangéda mabe ma niñ yem. Ndék sonde i mbus, Denise a bi ke i bisu bi hikuu hi bikééhene inyu ti mbôgi yé i bisu bi mut nu a bi nôgha lihaa jé njôghe. Kii a bi kal? Denise a bi kal nkéés le a kônôl i mut nu ngoo.b Kiki a bi mal ndik hop, nkéés a bôô maéya, a kal le: “Hala a yé 25 ma nwii len le me yé nkéés, ndi me mah nok bé i nya jam ini i bikééhene. Me mah nok bé ngim lihaa i nsoohe le ba kônôl i mut a mboñ bo béba ngoo. Me mah nok bé bibañga bi gwéha ni bi nwéhél kiki bini.”

3. Kii i bi tinde Denise i nwéhél?

³ Kii i bi tinde Denise i nwéhél i mut nu? A bi ôt pék mu nwéhél i Yéhôva. (Mika 7:18) I ngéda di nlôôha ti Yéhôva mayéga inyule a bi nwéhél bés, hala a ntinde bés i boñ nlélém.

4. Kii Yéhôva a nsômbôl le di boñ? (Éfésô 4:32)

⁴ Yéhôva a nsômbôl le di nwéhél bôt bape ni ñem wés wonsôna kiki yak nye a bi nwéhél bés. (Añ Éfésô 4:32.) A ngwés le di ba bebee i nwéhél i bet ba mbabaa bés. (Tjémbi 86:5; Lukas 17:4) Munu yigil ini, di ga tehe mam maa ma ma ga hôla bés i ba bebee i nwéhél.

U BOÑ BAÑ WEE I JAM LI LI NTÉÉÑGA BÉ WE

5. Inoñnaga ni Bingéngén 12:​18, kii di nla nôgda i ngéda mut a mbabaa bés?

⁵ Di nla nok ndutu ngandak inyu ngim jam mut a mpot tole a mboñ bés, téntén ibale i mut nu a yé liwanda jés li ñem nyuu tole mut nwés lihaa. (Tjémbi 55:​12-14) Ngim mangéda, i njôghe di nôgda i nla ba wengoñle mut a ñôm bés hikéñ. (Añ Bingéngén 12:18.) Di nla noode luhul mahoñol més mabe tole di boñ wengoñle hala a ntééñga bé bés. Ibale di mboñ hala, di mba kiki mut nu le ba ñôm hikéñ ndi ba nwas hio ikété mbabaa. Nlélém, di nla bé ba nwee ibale di mboñ ndik wengoñle yom i ta bé.

6. Kii di nla boñ i ngéda mut a mbabaa bés?

⁶ I ngéda mut a mbabaa bés, kiki jam li bisu di yé di unup. Bibel i nkal le di nla unup, ndi i mbéhe ki bés le di nwas bañ le hiun hi yémbél bés. (Tjémbi 4:4; Éfésô 4:26) Inyuki? Inyule i yom di nôgda yon ñem wés u ntinde bés i boñ, ni ki le hiun hi mbéna tinde bés i boñ béba. (Yakôbô 1:20) Bigda le di nla bé yi kii hiun hi nla tinde bés i boñ, ndi bésbomede bon di nkit too di nke ni bisu i unup tole heni!

7. Kii ipe di nla nôgda i ngéda mut a mbabaa bés?

⁷ I ngéda mut a mbabaa bés, di nla ki nôgda ntén njôghe ipe. Kiki hihéga, mankéé nu muda wada le Ann a nkal le: “I ngéda me bé mañge, pua yem a bi tjôô mama yem, a bii i muda lihaa jem li bé saa inyu tééda me. Me bi nôgda wee ba nyôi me. I ngéda ba bi gwal bon iba, me nôgda wengoñle i boñge ba, ba nkadal gwéha pua a bééna inyu yem. Me bi nañ ni mahoñol le me nhee bé to yom.” Mankéé nu muda wada le Georgette a ntoñol i yom a bi nôgda i ngéda nlôm a bi ke i ndéñg. A nkal le: “Di bé mawanda ibôdôl bés boñge, bés bo iba di bé yak basañal! Hala a bi pat me ñem.” Yak sita yada le Naomi a nkal le: “Me bé bé le me hégda kekikel le nlô wem a ga babaa me. I ngéda a bi yeelene me le a bé béñge bititii bi malal bisôsôli, me bi nôgda wee a nlôk me, a nliibana ki me.”

8. (a) Inyuki di nlama nwéhél bôt bape? (b) Bimbe bisai di ga kôs ibale di nwéhél? (Béñge minkéñék mi matila le “Kii di ga boñ ibale mut a bi boñ bés ngim jam i i bi lôôha tééñga bés?”)

⁸ Di nla bé sôña mut le a boñ tole a kal bés ngim jam, ndi di nla yi lelaa di yé le di timbhe nye. Libim li ngéda, jam li nlôôha lilam li yé le di nwéhél. Inyuki? Inyule di ngwés Yéhôva nu a gwé ngôñ le di nwéhél. Ibale di ntééda hiun, di nwéhél bé, di nla boñ jam ibabé i ôt pék, bebek hala a tééñga yak mbôô wés. (Bingéngén 14:​17, 29, 30) Di béñge le hihéga hi mankéé nu muda wada le Christine. A nkal le: “I ngéda me yé ñunbak, me nol ha bé ngandak. Me nje ha bé loñge, me nke ha bé to ’ilo ngandak. Me ngwel ha bé memede, hala a yé a sôk a ôbôs maada mem ni nlô wem, yak ni bôt bape.”

9. Inyuki di nlama bé téédana mut hiun?

⁹ To ibale i mut a mboñ bés béba a mbat bé nwéhél, bés di nla boñ le njôghe yés i sôs. Lelaa? Georgette nu di mbôk di pôdôl a nkal le: “I jam li li bi nom, ndi me bi sôk me waa unbene i mut a bé nlô wem. Hala a bi boñ le me nôgda nsañ.” I ngéda di nwaa unbene i mut a mboñ bés béba, di nwas bé le lôlha ñem i kônôs bés. Jam lipe li yé ki le, di mboñ bésbomede loñge mu kiki di mbok ha bé mahoñol més mu jam li. (Bingéngén 11:17) Ndi kii u ga boñ ibale u ta bé bebee i nwéhél?

LELAA DI NLA WAA UNUP

10. Inyuki di nlama nwas le ngéda i tagbe inyu boñ le hiun hiés hi sôs? (Béñge yak bititii.)

¹⁰ Kii i nla hôla bés i yémbél hiun? Njel yada i yé le di nwas le ngéda i tagbe. I mbéda ngim ngéda inyu boñ le i mut a mbabaa a témbna mbôô wé. Nlélém, i ga béda bés ngim ngéda inyu boñ le di mbôôp i pes mahoñol, di ba ki bebee i nwéhél i mut a mboñ bés béba ni ñem wés wonsôna.​—Ñañal 3:3; 1 Pétrô 1:22.

11. Lelaa masoohe ma nhôla we i nwéhél?

¹¹ Soohe Yéhôva le a hôla we i nwéhél.c Ann nu di mbôk di pôdôl a ntoñol lelaa masoohe ma bi hôla nye. A nkal le: “Me bi bat Yéhôva le a nwéhél hiki wada mu lihaa jem inyu mam mabe a bi pot tole a bi boñ. I mbus, me tilna pua yem ni nwaa wé, me kal bo le me nwéhél bo.” Ann a neebe le hala a bé bé jam li ntomb. Ndi a nkal le: “Me bééna botñem le kiki me nkôna nwéhél i Yéhôva, hala a ga tinde pua bo nwaa i nigil i yi Yéhôva.”

12. Inyuki di nlama bôdôl Yéhôva ñem, he i yom di nôgda bé? (Bingéngén 3:​5, 6)

¹² Bôdôl Yéhôva ñem, he i jam u nôgda bé. (Añ Bingéngén 3:​5, 6.) Yéhôva a nyi i jam li nlôôha lilam inyu yés. (Yésaya 55:​8, 9) Jon kekikel, a ga bat bé bés le di boñ jam li li ga tééñga bés. Inyu hala nyen, i ngéda a nti bés makénd i nwéhél i bôt ba mboñ bés béba, di nla bot ñem le hala a yé inyu loñge yés. (Tjémbi 40:4; Yésaya 48:​17, 18) Ndi ibale di mbôdôl mahoñol més ñem, kekikel di ga la bé nwéhél bôt bape. (Bingéngén 14:12; Yérémia 17:9) Naomi nu di mbôk di pôdôl a nkal le: “I bibôdle, me bé nkwoog nkaa le nlô wem a bé bé a kôli le me nwéhél nye inyule a bé béñge bititii bi malal. Me bé kon woñi le a ga ke ni bisu i babaa me, tole a ga pala hôya i njôghe a bi nôgha me. Me bé hoñol le Yéhôva a nok i yom me nôgda. Ndi me bi sôk nok le to ibale Yéhôva a nok i yom me nôgda, hala a nkobla bé le a neebe hala. A nyi i yom me nôgda, a nyi ki le i mbat ngéda inyu yémbél hiun. Ndi a nsômbôl ki le me nwéhél.”d

BANA MAHOÑOL MALAM

13. Inoñnaga ni Rôma 12:​18-21, kii di nlama boñ?

¹³ I nwéhél mut nu a mbabaa bés i ta ndik bé i yoñ makidik le di ga pôdôl ha bé i jam a bi boñ bés. Ibale i mut a mbabaa bés a yé kristen, njômbi yés i yé le di kôp nsañ ni nye. (Matéô 5:​23, 24) Iloole di unbene nye, di kônôl nye ngoo, di nwéhél ki nye. (Añ Rôma 12:​18-21; 1 Pétrô 3:9) Kii i nla hôla bés i boñ hala?

14. Bimbe biliya di nlama boñ, inyuki?

¹⁴ Di nlama boñ biliya i tehe i mut a mbabaa bés kiki Yéhôva a ntehe nye. Bilem bilam bi bôt gwon Yéhôva a mbéñge. (2 Miñañ 16:9; Tjémbi 130:3) Ibale yom di nyéñ bilem bibe bi bôt, di ga tehe gwo. Ndi ibale yom di nyéñ bilem gwap bilam, gwon di ga tehe. I ngéda di nyéñ bilem bilam bi bôt bape, i ga ba bés jam li ntomb i nwéhél bo. Kiki hihéga, mankéé nu munlôm wada le Jarrod a nkal le: “Hala a yéne me jam li ntomb i nwéhél mankéé i ngéda me nhoñol i mam malam a mboñ, iloole me hoñol dihôha tjé.”

15. I ngéda di nwéhél mut, inyuki i yé nseñ i kal nye hala?

¹⁵ Jam li mahee lipe di nlama boñ li yé le, di kal i mut a ñunbaha bés le di nwéhél nye. Inyuki? Naomi nu di mbôk di pôdôl, a nkal le: “Nlô wem a bi bat me le, ‘Baa u nwéhél me?’ I ngéda me bi yibil nyo inyu kal nye le, ‘Me nwéhél we,’ me bi la bé pahal bibuk bi. Ha nyen me bi nôgda le me bé ngi nwéhél nye ni ñem wem wonsôna. Sôk i nsôk, me bi la kal nye le ‘Me nwéhél we.’ I ngéda me bi pahal bibuk bi, gwiiha bi bi yon nlô wem i mis. Hala a bi lôôha hélés me i tehe kinje hogbe a bi nôgda. Yak memede hala a bi boñ me loñge kiyaga. Ibôdôl ha ngéda i, me bi témb me kahal bôdôl nye ñem, di yé ki bañga mawanda nano.”

16. Kii di nigil inyu nwéhél?

¹⁶ Yéhôva a nsômbôl le di nwéhél bôt bape. (Kôlôsé 3:13) Ndi to hala, i nla ba bés ndutu i nwéhél bôt bape. Di nla boñ hala ibale di mboñ bé wengoñle hala a ntééñga bé bés, ndi di mboñ biliya i waa unup. Ha ngéda i nyen di nla bana mahoñol malam.​—Béñge minkéñék mi matila le “Mam maa di nla boñ inyu nwéhél bôt bape.”

HOÑOL BISAI DI NKÔHNA I NGÉDA DI NWÉHÉL

17. Bimbe bisai di nkôs i ngéda di nwéhél bôt bape?

¹⁷ Di gwé ngandak manjom i nwéhél bôt bape. Di wan le ndék mu. Pog, di nkôna ndémbél i Tata wés nu konangoo le Yéhôva, di nlémél ki nye. (Lukas 6:36) Iba, di ñunda Yéhôva le di nti nye mayéga inyu nwéhél a bi nwéhél bés. (Matéô 6:12) Iaa, di yé mbôô i pes minsôn, di ntééda ki maada malam ni bôt bape.

18-19. Kii i nla bôña i ngéda di nwéhél?

¹⁸ I ngéda di nwéhél bôt bape, di nla kôs bisai di bemek bé. Kiki hihéga, béñge i jam li bi pémél Denise nu di mbôk di pôdôl. To hala kiki a bé yi bé hala ha ngéda i, minsoñgi mi i mut a bi kumul bo mi bé le a ga nidba i mbus nkaa wé. Ndi kiki Denise a bi nwéhél nye, hala a bi lôôha tihba nye kayéle a bôdôl nigil Bibel ni Mbôgi Yéhôva.

¹⁹ Di nla nôgda le i ta bé jam li ntomb i nwéhél mut a mboñ bés béba, ndi i boñ hala i nla lona ngandak bisai. (Matéô 5:7) Jon, di nlama boñ kii yosôna di nla inyu kôna nwéhél i Yéhôva.