Bana minlélém mi mahoñol kiki Yéhôva bo Yésu

1-2. I gwés Yéhôva i nkobla le kii, ni lelaa Yésu a bi unda le a ngwés Yéhôva?

YÉSU a bi unda mbén i i nloo mambén momasôna ikété mbén Môsi, a bi kal le: “U nlama gwés Yéhôva Nyambe woñ ni ñem woñ wonsôna, ni niñ yoñ yosôna, ni ngui yoñ yosôna, yak ni mahoñol moñ momasôna.” (Lukas 10:27) Hala a nkobla le, di nlama ti Yéhôva i mam momasôna di gwé. Di nlama gwés nye ni mahoñol més momasôna, yak ni ngui yés yosôna. Di nla bé pam i nok mahoñol ma Yéhôva i nya i yôni. Ndi ibale “di gwé mahoñol ma Kristô,” di ga kônde nigle Isañ, inyule Yésu a nyi Isañ loñge loñge, a niglege ki nye i nya i yôni.—1 Korintô 2:16

² Yésu a bi gwés Yéhôva ni mahoñol mé momasôna. A bé yi sômbôl Yéhôva, a boñok ki yo tolakii hala a bé boñ le a nok ndutu. Yésu a bi nwas bé le jam jo ki jo li kéñ nye i boñ sômbôl Isañ.

3. Kii ndémbél i Yésu i bi niiga ñôma Pétrô, kii Pétrô a bi kal bikristen le bi boñ? (1 Pétrô 4:1)

³ Pétrô ni bana baôma bape ba bi bana bisai i niñ ni Yésu, ni i tehe mahoñol a bééna. I ngéda Pétrô a bi tila kaat yé bisu, a bi kal bikristen le ba amb manyuu ni minlélém mi mahoñol kiki Kristô. (Añ 1 Pétrô 4:1.) I bibuk Pétrô a bi gwélél hana le “amb manyuu,” bi ngwéélana inyu pôdôl bisônda bi bi yé i gwét. Jon ibale bikristen bi gwé minlélém mi mahoñol Kristô a bééna, hala a ga bane bo jôl gwét i i ga hôla bo i jôs bilem gwap bibe, ni i jôs nkoñ ’isi u Satan.—2 Korintô 10:3-5; Éfésô 6:12.

4. Lelaa i yigil ini i nla hôla bés i noñ maéba ma Pétrô?

⁴ Di ga nigil lelaa Yésu a nhoñol, di tehe ki lelaa di nla nigle nye. Ndémbél yé i ga hôla bés i yi lelaa (1) di nla hoñol kiki Yéhôva inyu boñ le di nôgla ni lôk kéé, (2) i bana suhulnyuu, (3) ni i yi hek pék, di soohege Yéhôva.

HOÑOL KIKI YEHÔVA

5. Lelaa Pétrô a bi unda le a bi bana bé mahoñol ma Yéhôva?

⁵ Lisañ jada, Pétrô a bi bana bé mahoñol ma Yéhôva. Yésu a bi kal baôma bé le a nlama ke i Yérusalem, ni le baéga base ba ga gwel nye, ba kép nye mbai, ba nol ki nye. (Matéô 16:21) Pétrô a bé yi le Yésu nyen a ga tohol bon ba Israel, jon i bé nye ndutu i neebe le Yéhôva a nwas le Yésu a wo. (Matéô 16:16) Jon Pétrô a bi kena Yésu ipañ, a kal nye le: “Kônôl wemede ngoo, a Nwet; i mam mana ma yé mbén i pémél we.” (Matéô 16:22) Pétrô a bi bana bé mahoñol ma Yéhôva, inyu hala nyen a bi tehe bé mam kiki Yésu.

6. Lelaa Yésu a bi unda le a bé hoñol kiki Yéhôva?

⁶ Yésu a bééna mahoñol mada ni Isañ wé nu ngii. Inyu hala nyen a bi kal Pétrô le: “Témb me i mbus, a Satan! U yéne me ngok baagene, inyule u nhoñol bé mahoñol ma Nyambe, ndi ma bôt ba binam.” (Matéô 16:23) Pétrô a bééna mahoñol malam, ndi Yésu a bi emble bé maéba mé. Kii hala a niiga bés? Yésu a bé yi le sômbôl i Yéhôva i yé le a nok ndutu, a wo ki. Jon Yésu a bi tjél maéba ma Pétrô to hala kiki Pétrô a bééna ngôñ i hôla nye. Pétrô a bi nok yokel le a nlama hoñol kiki Yéhôva.

7. Lelaa Pétrô a bi unda le a gwé ngôñ i hoñol kiki Yéhôva? (Béñge i lipep li bisu.)

⁷ Pétrô a bi unda le a gwé ngôñ i hoñol kiki Yéhôva. Bôt ba matén mape, ba ba bé ngi kweeba, ba bi bana kunde i jôp i ntôñ u Yéhôva. Kornéliô a bé wada ikété bôt ba. Yéhôva a bi om Pétrô i añle nye ñañ nlam. Lôk Yuda i bé nôgla bé ni bôt ba matén mape, jon i bé béda Pétrô ngéda inyu neebe i nson u. I ngéda Pétrô a bi yi sômbôl i Yéhôva mu jam li, a héñha mahoñol. Inyu hala nyen a bi ke, a sal i nson u “ngi pééna yo ki yo.” (Minson mi baôma 10:28, 29) A bi añle Kornéliô ni bôt bé ñañ nlam, ba sôblana ki.—Minson mi baôma 10:21-23, 34, 35, 44-48.

8. Lelaa di nla unda le di nhoñol kiki Yéhôva? (1 Pétrô 3:8; béñge yak buk isi lipep)

⁸ I mbus ngandak nwii, Pétrô a bi ti lôk kéé makénd le ba bana “adna i mahoñol.” (Añ 1 Pétrô 3:8 ni buk isi lipep.) Inyu bana adna i mahoñol, di nlama bana mahoñol ma Yéhôva, ma a nyeelene bés mu Bañga yé. Kiki hihéga, Yésu a bi kal banigil bé le ba nlama ndugi yéñ Ane. (Matéô 6:33) Inyu hala nyen lôk kéé ihogi i yé i yoñ makidik i yila basañal, jon di tômbôs bañ bo ndi di ti bo makénd i sal nson u, di hôla ki bo.

BANA SUHULNYUU

9-10. Lelaa Yésu a bi unda suhulnyuu i nya i mbuma ñañ?

⁹ Ilole Yésu a nwo, a bi niiga Pétrô ni bana baôma bape suhulnyuu. Yésu a bi bôk a ep Pétrô bo Yôhanes i kôôba bijek bi nsôk a bi jéla ni bo. Kiki ba bé kôôba, bebek jam lipe li bé le ba kôôba yak ébél ni wédé inyu jôwa makôô ilole ba nje. Ndi njee a bé le a unda i suhulnyuu i, le a jôwa bo makôô?

¹⁰ Ibabé i lep ngéda, Yésu a bi unda bo suhulnyuu i mbuma ñañ, a jôwa bo makôô. Hala a bi hélés baôma bé ngandak inyule minkol nwon mi bé sal i bôlô i. Yésu a bi bii mambot mé ma ngii ipañ, a yoñ wédé, a téñba yo i bôbôk. I mbus, a ha malép i séya, a bôdôl jôwa makôô map. (Yôhanes 13:4, 5) Hala a bi lama yoñ nye ngéda i jôwa makôô ma 12 baôma. A bi jôwa yak makôô ma Yuda nu a bé lama liibana nye. Yésu a bi sal i bôlô i ni suhulnyuu yosôna letee a mal. Ha nyen Yésu a bi kal bo le: “Baa ni nok jam me mboñ bé? Ni nsébél me le ‘Malét’ ni ‘Nwet,’ ni kôli ki sébél me hala inyule maliga ma. Jon ibale me nu me yé Nwet ni Malét me njôwa bé makôô, yak bé ni nlama jôôna makôô bé ni bé.”—Yôhanes 13:12-14.

11. Kii i ñunda le Pétrô a bi yik bana suhulnyuu? (1 Pétrô 5:5) (Béñge yak titii.)

¹¹ Pétrô a bi nigle suhulnyuu i Yésu. I ngéda Yésu a bi ke i ngii, Pétrô a bi boñ hélha jam, a mbuubaha mut wada nu a bi gwéé bôk. (Minson mi baôma 1:8, 9; 3:2, 6-8) Hala a bi boñ le limut li bôt li kodba. (Minson mi baôma 3:11) Ndi Pétrô a bi yéñ bé nene, to hala kiki a bi néñél i het bôt ba bé gwés le ba ti bo lipém ngandak. Ilole a bép woo i tôl le nyen a mboñ i jam li, a bi tinde bôt i ti Yéhôva bo Yésu lipém, a kal le: “I jôl li [Yésu,] lôñni njel hémle yés inyu jôl jé nyen i mut nunu a mbana ngui, nu ni ntehe, ni yik ki.” (Minson mi baôma 3:12-16) I bibuk Pétrô a ngwélél i kaat a bi tilna bikristen inyu suhulnyuu, bi nhôñlaha bés i ngéda Yésu a bi téñ wédé i bôbôk inyu jôwa makôô ma baôma bé.—Añ 1 Pétrô 5:5.

12. Lelaa di yé le di kônde bana suhulnyuu kiki Pétrô?

¹² Yak bés di nla bana suhulnyuu kiki Pétrô. Mut suhulnyuu a mpot ndik bé ni nyo le a gwé suhulnyuu. I buk Pétrô a ngwélél hana le “suhulnyuu” i mpôdôl mahoñol di gwé inyu yés ni inyu bôt bape. Di mboñ bé mam inyu nene ndi inyule di ngwés bôt, di gwéhék Yéhôva. Ibale di mboñ kii yosôna di nla inyu gwélél Yéhôva ni lôk kéé yés, ibabé i béñge too ba ntehe bés, too ba ntehe bé bés, wee di gwé toi suhulnyuu.—Matéô 6:1-4.

YI “HEK PÉK”

13. Toñol kii i yé i ‘yi hek pék?’

¹³ Kii i ‘yi hek pék’ i nkobla? (1 Pétrô 4:7) Kristen i i nyi hek pék i mboñ kii yosôna i nla inyu yoñ makidik ma ma nkiha ni mahoñol ma Yéhôva. I nya kristen i, i nyi le jam li bisu i niñ yé li yé maada mé ni Yéhôva. A nhoñol bé le a nyi mam momasôna. A mbôdôl Yéhôva ñem, inyu hala nyen a mbéna soohe.a

14. Lelaa Pétrô a bi unda le a bi bôdôl bé Yéhôva ñem?

¹⁴ I u u nsôk ilole Yésu a nwo, a bi kal banigil bé le: “I u unu, bébobasôna n’a baage inyu jam l’a pémél me.” Pétrô a bi timbhe ni makénd momasôna le: “To ibale bana bape bobasôna ba mbaage inyu jam l’a pémél we, me me yé mbén i baage!” I u u, Yésu a bi kal banigil bé bahogi le: “Yéna péé ibabé waa, ni waa bañ to soohe.” (Matéô 26:31, 33, 41) Ibale Pétrô a nôgôl i maéba ma, bebek ki a bi kon bé woñi i kal le a nyi Yésu. Ndi Pétrô a bi boñ bé hala, jon a bi tañba Yésu; i mbus ngéda, a tam i jam li ngandak.—Matéô 26:69-75.

15. I u u nsôk ilole Yésu a nwo, lelaa a bi unda le a nyi hek pék?

¹⁵ Yésu a bé bôdôl toi Yéhôva ñem. To hala kiki Yésu a bé peles, a bé soohe hiki ngéda. I masoohe ma mon ma bé ti nye ngui i boñ sômbôl i Yéhôva. (Matéô 26:39, 42, 44; Yôhanes 18:4, 5) I ngéda Pétrô a bi tehe le Yésu a mbéna soohe, hala a bi lama tihba nye ngandak.

16. Kii i ñunda le Pétrô a bi bana lem i yi hek pék? (1 Pétrô 4:7)

¹⁶ I mbus ngéda, Pétrô a bi yila mut masoohe. I ngéda Yésu a bi tuge, a bi kal Pétrô ni bana baôma bape le ba ga kôs mbuu mpubi, inyu boñ le ba pam i añal ñañ lam. Ndi a bi kal bo le ba yén nyoo i Yérusalem inyu boñ le ba kôs mbuu mpubi. (Lukas 24:49; Minson mi baôma 1:4, 5) Kii Pétrô a bé boñ ha ngéda i? Pétrô ni ini lôk kéé ipe “ba bé téñbe ikété masoohe.” (Minson mi baôma 1:13, 14) I mbus ngéda, Pétrô a bi kal lôk kéé i kaat bisu a bi tilna bo le ba yi hek pék, ba soohege. (Añ 1 Pétrô 4:7.) Pétrô a bi nigil i bôdôl Yéhôva ñem, a yila ki mbiñ mut ikété likoda.—Galatia 2:9.

17. To di nyi jam lelaa, kii di nlama boñ? (Béñge yak titii.)

¹⁷ I mut a nyi hek pék a nsoohe Yéhôva hiki ngéda. To di nyi jam lelaa, di nlama bôdôl Yéhôva ñem, di soohege nye. Inyu hala nyen i ngéda di nsômbôl yoñ makidik ma ngui i niñ yés, di nsoohe Yéhôva le a éga bés, inyule nyen a nyi i yom i yé loñge inyu yés.

18. Kii i nla hôla bés i hoñol kiki Yéhôva?

¹⁸ Di yé maséé hala kiki Yéhôva a bi hek bés le di laa nigle bilem gwé. (Bibôdle 1:26) I yé maliga le di nla bé nigle Yéhôva i nya i yôni. (Yésaya 55:9) Ndi kiki Pétrô, di nla boñ kii yosôna di nla inyu hoñol kiki Yéhôva. Inyu pam i boñ hala, di kee ni bisu i hoñol kiki Yéhôva, i bana suhulnyuu, ni i yi hek pék.