Kôna makénd ma Yésu i nson u añal ñañ nlam

1. Kii i mboñ le bagwélél ba Yéhôva ba ba maselna ni bôt ba ba nkadba le ba yé bikristen?

JAM jada li li ñéba maselna ipôla bagwélél ba Yéhôva ni bôt ba nkadba le ba yé bikristen li yé le ba ñañal ñañ nlam ni makénd. (Titô 2:14) Ndi ngim mangéda, i nla pam le di nimis makénd més mu nson u añal ñañ nlam. Bebek, i yé i pam le yak bés di hoñol kiki i mankéé nunu a yé mañ. A nkal le: “Ngim mangéda, me yé me bana bé ngôñ i ke i likalô.”

2. Kii i nla boñ le ngim mangéda i bane bés ndutu i anal ñañ nlam ni makénd?

² Di nla bana makénd i boñ mini minson mi mbuu mimpe iloole di ke i likalô. Inyuki? Inyule i ngéda di ñoñ mandap ma Ane tole di mbôñgôl mo, i ngéda di nhôla lôk kéé i ngeñ bikuu bi nkwo tole i ngéda di nlédés bo, di mpala tehe matam malam hala a num. Di nkon maséé i sal ikété nsañ ni gwéha ni lôk kéé yés, di yé ki nkwoog nkaa le ba ndiihe i mam di mbôñôl bo. Ndi bebek, hala a yé ngandak nwii nano le di ntéé likalô i nlélém homa, i het ndék bôt ndik yon i neebe ñañ nlam, bape ki ba kolbaga maliga. Di nyi ki le kiki lisuk li yé bebee, jon bôt ba ngwés bé likalô jés. (Matéô 10:22) Kii i nla hôla bés i tééda makénd més tole i kéñbaha mo?

3. Kii kaat Lukas 13:6-9 i niiga bés inyu Yésu?

³ Ndémbél i Yésu i nla niiga bés lelaa di nla pam i tééda makénd més i likalô. I ngéda a bé hana ’isi, Yésu a bé waa bé añle bôt ñañ nlam ni makénd. Yak i mamélél ma nson wé, a bi ke ni bisu i sal ni makénd. (Añ Lukas 13:6-9.) Nlélém kiki mut a bééna e faigé a bi sal nwii maa ibabé le e yé faigé i num matam, hala nyen yak Yésu a bi tégbaha nwii maa i tééne lôk Yuda likalô ibabé le ngandak bôt i emble nye. Ndi to hala, nlélém kiki mut a bééna e faigé a bi somol bé, yak Yésu a bi ke ni bisu i téé likalô ni makénd. Yésu a bi tomb bé, a bi ke ni bisu i boñ biliya inyu hôla Lôk Yuda i neebe maliga.

4. Mambe mam ma-na di nla nigil mu ndémbél i Yésu?

⁴ Munu yigil ini, d’a tehe lelaa Yésu a bi éba makénd i nson wé likalô, téntén mu sôñ isamal i i bé i yii nye. (Béñge note d’étude i Bibel ni hop Pulasi, i homa nunu le “Après cela” i Lukas 10:1.) Di nla tééda makénd més ibale di nigil i mam Yésu a bi kal, di boñ ki i mam a bi boñ. Di wan le ndémbél i Yésu ikété manjel ma-na: (1) Sômbôl i Yéhôva i bé jam li bisu i niñ yé, (2) a bé tibil nok mbañ i Bibel, a boñok kiki i nkal (3) a bé bôdôl Yéhôva ñem le a ga hôla nye, (4) a bééna yak botñem le ngim bôt i ga emble nye.

SÔMBÔL I YÉHÔVA I BÉ JAM LI BISU I NIÑ YÉ

5. Lelaa Yésu a bi éba le sômbôl i Yéhôva yon i bé jam li bisu i niñ yé?

⁵ Yésu a bé añal “ñañ nlam u Ane” ni makénd inyule a bé yi le i bôlô i yon Nyambe a bééna ngôñ le a boñ. (Lukas 4:43) Inyu Yésu, nson u añal ñañ nlam won u bé jam li bisu i niñ yé. I sôñ i nsôk i ngéda a bé gwel nson wé, a bé ke i “bitison ni bitison, yak i mambai ni mambai,” a niigaga bôt. (Lukas 13:22) A bi niiga yak banigil bé i téé likalô kiki nye.—Lukas 10:1.

6. To hala kiki minson mi yé ngandak i ntôñ u Yéhôva, lelaa Yéhôva a ntehe nson u añal nlam? (Béñge yak titii.)

⁶ I len ini, Yéhôva bo Yésu ba gwé ngôñ le nson u añal ñañ nlam won u ba jam li bisu i niñ yés. (Matéô 24:14; 28:19, 20) Minson nwominsôna di ngwel ikété likoda mi gwé maada ni likalô. Kiki hihéga, di ñoñ mandap ma Ane inyu boñ le i bôt di ntééne likalô ba loo i bégés Yéhôva. Yak i bôlô di nsal i Bétel i nhôla i nson u añal ñañ nlam. I ngéda bikuu bi nkwo, di mboñ kii yosôna di nla inyu boñ le bilôk bikéé bi bana gwom bi mbéda bo inyu tiimba ke i makoda ni i likalô. I ngéda di mbigda le nson u añal ñañ nlam u yé nseñ ni le Yéhôva a gwé ngôñ le won u ba jam li bisu i niñ yés, hala a nti bés makénd i téé likalô hiki ngéda. János, nu a yé mañ i loñ Oñgri, a nkal le: “Nson to wada di ngwel inyu Yéhôva u nla bé héñha nson wés u likalô; likalô jon li yé nson wés u bisu.”

7. Inyuki Yéhôva a gwé ngôñ le di kee ni bisu i téé likalô? (1 Timôtéô 2:3, 4)

⁷ Di nla tééda makénd més i likalô i ngéda di ntehe bôt kiki Yéhôva a ntehe bo. A gwé ngôñ le ngandak bôt i emble ñañ nlam, i neebe ki wo. (Añ 1 Timôtéô 2:3, 4.) Kiki nson wés u nla tohol biniñ bi bôt, Yéhôva a nti bés ngim makeñge. Kiki hihéga, i man kaat nunu le Gwés bôt—U yilha ki bo banigil a nhôla bés i bôdôl minkwel ni njômbi le di bôdôl gwigil bi Bibel ni bôt, ni i yilha bo banigil. To ibale bôt ba ñemble bé bés nano, ba ga bana pôla i boñ hala ilole njiiha ikeñi i mal. I mam di niiga bo nano, ma nla tinde bo i boñ mahéñha i dilo di nlo. Ndi hala a ga bôña ndigi ibale di ntééda makénd més.

A BÉ TIBIL NOK MBAÑ I BIBEL

8. Lelaa mbañ i Bibel i bi hôla Yésu i tibil gwélél ngéda yé?

⁸ Yésu a bé yi lelaa mbañ i Bibel i bé lama yon. A bé yi le a bééna ndik nwii maa ni pes inyu téé likalô. (Daniel 9:26, 27) A bé yi yak mbañ i i bé éba imbe ngéda ni lelaa a ga wo. (Lukas 18:31-34) Kiki a bé yi i mam ma bé lama tagbe, Yésu a bi tibil gwélél ngéda yé i likalô. Jon a bé añal ñañ nlam ni makénd inyu mélés nson a bi bôdôl.

9. Lelaa mbañ i Bibel i nla hôla bés i gwel nson wés ni makénd?

⁹ I ngéda di ntibil nok mbañ i Bibel, hala a nla tinde bés i téé likalô ni makénd. Di nyi le nkoñ ’isi u yé bebee ni tjiba. Di nyi ki le i mam ma mbôña i len ini, ni maboñok ma bôt ma ñéba le di niñ toi i dilo di nsôk. Di nyi le sañ i i yé ipôla loñ Ngisi lôñni loñ Amérika, ni loñ Ruslan lôñni i bet ba nit nye i nyônôs i mbañ i i mpôdôl kiñe ñombok ni kiñe nwelmbok munu “masuk ma ngéda,” mana. (Daniel 11:40) Di nyi ki le adna i loñ Ngisi lôñni loñ Amérika i yé yimbne i makôô ma titii kaat Daniel 2:43-45 i mpôdôl. Di yé nkwoog nkaa le, kiki mbañ i ñunda, ndék ngéda wee Ane Djob i ntjé biane bi bôt ba binam. I mbañ i yosôna i ñéba le di niñ toi i dilo di nsôk. Jon, di nlama tibil gwélél ngéda i yii bés i boñ kii yosôna di nla inyu añal ñañ nlam.

10. Lelaa mbañ i Bibel i nti bés makénd i ke ni bisu i añal ñañ nlam?

¹⁰ Mbañ i Bibel i nhôla ki bés i yi umbe nwin nlam di nlama añal. Carrie, sita yada i i yé i loñ Dômnika, a nkal le: “I ngéda me nhoñol i mam malam Yéhôva a mbôn bés inyu dilo di nlo, me gwé ngôñ i añle bôt bape i mam ma.” A nkônde le: “I ngéda me ntehe mandutu bôt ba gwé, me nok le yak bo ba gwé ngôñ i yi le Yéhôva a mbôn bo mam malam.” Mbañ i Bibel i nti bés makénd le di tomb bañ mu nson u Yéhôva inyule a nit bés. Leila, nu a niñ i loñ Oñgri, a nkal le: “Yésaya 11:6-9 a ñunda me le ni mahôla ma Yéhôva, mut a nla héñha. Hala a nti me makénd i ke ni bisu i añal ñañ nlam to ibale bôt ba mboñ wengoñle ba gwé bé ngôñ i emble.” Christopher, mankéé wada nu a nlôl i loñ Sambia, a nkal le: “Kiki kaat Markô 13:10 i bi bôk i legel, ñañ nlam u nlama añlana ni nkoñ ’isi wonsôna, me yé maséé i hôla le i mbañ i, i yon.” Imbe mbañ i Bibel i nti we makénd i ke ni bisu i añal ñañ nlam?

A BÉ BÔDÔL YÉHÔVA ÑEM

11. Inyuki Yésu a bééna ngôñ i bôdôl Yéhôva ñem i ngéda a bé añal ñañ nlam ni makénd? (Lukas 12:49, 53)

¹¹ Yésu a bé bôdôl Yéhôva ñem le a ga hôla nye i añal ñañ nlam ni makénd. Yésu a bé babaa bé bôt ni bibuk gwé i ngéda a bé tééne bo likalô, ndi a bé yi le ñañ nlam u ga lémél bé bôt bobasôna, ni le u ga lona nye ngolba ikeñi. (Añ Lukas 12:49, 53.) Baéga base ba bé gwés bé ñañ nlam Yésu a bé añal, jon ngandak ngélé, ba bi yéñ le ba nol nye. (Yôhanes 8:59; 10:31, 39) Ndi to hala, Yésu a bi ke ni bisu i añal ñañ nlam inyule a bé yi le Yéhôva a yé ni nye. A bi kal le: “Me ta bé metama, ndi Tata nu a bi ep me a yé lôñni me. . . . A bi tjôô bé me metama inyule me mboñ i mam ma nlémél nye ngéda yosôna.”—Yôhanes 8:16, 29

12. Lelaa Yésu a bi kôôba banigil bé i añal ñañ nlam i bisu bi ngolba?

¹² Yésu a bi hôñlaha banigil bé le ba bôdôl Yéhôva ñem inyule a ga nit bo. A bééna lem i kal bo le Yéhôva a ga hôla bo, to ibale ba mboma ndééñga. (Matéô 10:18-20; Lukas 12:11, 12). Ndi to hala, a bi kal bo le ba yoñok yihe. (Matéô 10:16; Lukas 10:3) A bi kal bo le ibale bôt ba ñemble bé bo, ba nyégsa bañ bo. (Lukas 10:10, 11) A kal ki bo le, ibale ba mboma ngolba, ba ôt ngwéé i tison ipe. (Matéô 10:23) To hala kiki Yésu a bééna makénd, a bôdlak Yéhôva ñem, a bé yoñ matat ngandak.—Yôhanes 11:53, 54.

13. Kii i nkwés we nkaa le Yéhôva a ga hôla we?

¹³ Di gwé ngôñ ni mahôla ma Yéhôva inyu ke ni bisu i téé likalô ni makénd i len ini, i bisu bi ngolba. (Masoola 12:17) Inyuki u yé nkwoog nkaa le Yéhôva a ga nit we? Di wan le masoohe ma Yésu ma ma yé i kaat Yôhanes pes 17. Yésu a bi soohe Yéhôva le a tééda banigil bé. Yéhôva a bi timbhe masoohe mé. Kaat Minson mi baôma i ñéba lelaa Yéhôva a bi hôla banigil i añal ñañ nlam ni makénd to i bisu bi ngolba. Yésu a bi soohe ki Yéhôva le a tééda yak i bôt ba ga neebe ñañ nlam i mbus ngéda. Yak we u yé mukété bôt ba. Yéhôva a ngi kenek ni bisu i timbhe masoohe ma Yésu. A ga hôla we kiki a bi hôla banigil.—Yôhanes 17:11, 15, 20.

14. Inyuki di nla ba nkwoog nkaa le di nla téé likalô ni makénd? (Béñge yak titii.)

¹⁴ Kiki lisuk li nkôôge bebee, hala a ga kônde lédél bés i téé likalô. Ndi Yésu a nkwés bés nkaa le di ga bana mahôla ma ma mbéda inyu tééda makénd més. (Lukas 21:12-15) Nlélém kiki Yésu ni banigil bé, di nwas le bôt ba pohol too ba ga neebe ñañ nlam tole ba ga tjél neebe wo. Di jôp bañ i ngandak pééna ni bo. To ibale ba nsôña nson wés, bilôk bikéé bi nke ni bisu i añal ñañ nlam inyule ba mbôdôl Yéhôva ñem, ha bomede bé. Nlélém kiki Yéhôva a bi ti bagwélél bé ngui i hiai bisu, yak i len ini, a nti bés ngui inyu boñ le “likalô li tééba i nya i yôni.” (2 Timôtéô 4:17) U nla ba nkwoog nkaa le ibale u nke ni bisu i bôdôl Yéhôva ñem, u ga téé likalô ni makénd.

A BÉÉNA BOTÑEM LE NGIM BÔT I GA EMBLE

15. Kii i ñunda le Yésu a bé nkwoog nkaa le likalô jé li ga num matam malam?

¹⁵ Yésu a bé yi le ngim bôt i ga emble ñañ nlam. Hala a bi hôla nye i tééda maséé mé, ni i ke ni bisu i añal ñañ nlam ni makénd. Kiki hihéga, i mamélél ma nwii 30 N.Y., Yésu a bi tehe ngandak bôt i ñemble ñañ nlam, a bé wengoñle nwom mi bé nhôôlak inyu libumbul. (Yôhanes 4:35) Nwii wada i mbus, a bi kal banigil bé le: “Libumbul li yé likeñi.” (Matéô 9:37, 38) I mbus ngéda, a bi yigye le: “Libumbul li yé likeñi . . . Soohana Nwet libumbul le a ep basal bôlô mu libumbul jé.” (Lukas 10:2) Yésu a bé nkwoog nkaa le bôt ba ga bana ngôñ i emble ñañ nlam, a bi ba ki maséé i ngéda ba bi boñ hala.—Lukas 10:21.

16. Lelaa dihéga di Yésu di nhôla bés i bana litehge lilam inyu likalô? (Lukas 13:18-21) (Béñge yak titii.)

¹⁶ Yésu a bi kal banigil bé le ba hoñol bisai ba ga kôs mu nson wap inyu boñ le ba bana makénd. Di wan le dihéga diba mu dihéga a bé gwélél. (Añ Lukas 13:18-21.) Ikété hihéga hiada, Yésu a nhégha ñañ nlam ni hisiina hi mbôô hi hi nyila e. Hala a ñéba le ngandak bôt i bé lama neebe ñañ nlam, ni ki le yom yo ki yo i bé bé le i kéñ mahol ma. A bi gwélél yak séñha inyu éba lelaa nwin u Ane u bé lama tjama ni nkoñ ’isi wonsôna, u tinde ki bôt i lona mahéñha mu biniñ gwap, to ibale mahéñha ma, ma mpala bé nene. Hala a bi hôla banigil bé i nok le ñañ nlam ba ñañal u ga hôla ngandak bôt.

17. Mambe manjom ma ntinde bés i bana litehge lilam inyu nson wés?

¹⁷ I ngéda di nhoñol lelaa ñañ nlam u nhôla ngandak bôt munu nkoñ ’isi unu, hala a ntinde bés i ke ni bisu i téé likalô ni makénd. Hiki nwii, didun di bôt di nlo i Mbigda Nyemb Yésu, ba mbôdôl yak nigil Bibel ni bés. Ngandak bôt i nsôblana, i mbôdôl yak téé likalô ni bés. Di nyi bé bôt bañen ba ga emble ñañ nlam, di nyi ndik le Yéhôva a yé i kot limut likeñi, li li ga pei i njiiha ikeñi i i yé lo. (Masoola 7:9, 14) Yéhôva, Nwet libumbul, a ngi tehge le ngandak bôt ipe i nla neebe ñañ nlam, hala a yé njom i i ntinde bés i ke ni bisu i añal ñañ nlam.

18. Kii di gwé ngôñ le bôt ba yimbe?

¹⁸ Banigil ba Yésu ba nyiba kiki bôt ba ba ntéé likalô ni makénd. I ngéda bôt ba bi yimbe le baôma ba bé téé likalô ni ñem ngui, ni makénd, ha nyen ba bi “sôk nok le bon ba bé lôñni Yésu.” (Minson mi baôma 4:13) Yak bés di gwé ngôñ i téé likalô ni ñem ngui, ni makénd, kayéle bôt ba yimbe le di nkôna ndémbél i Yésu.