Neebe le u nla bé yi mam momasôna

1. Lelaa Yéhôva a bi hek bés, inyuki?

YÉHÔVA a bi hek bés i nya i yé hélha: di nla ôt pék, di nla nigil ngandak mam, di nla ki boñ i mam di nigil. Inyuki a bi hek bés hala? A nsômbôl le di bana “yi i Nyambe,” di gwélél ki ngap yés i hek pék inyu boñ sômbôl yé.​—Bingéngén 2:​1-5; Rôma 12:1.

2. (a) Kii di nlama neebe? (Hiôb 37:​23, 24) (Béñge yak titii.) (b) Ibale di neebe le di nyi bé mam momasôna, lelaa hala a nla hôla bés?

² Di nla nigil ngandak mam, ndi di nla bé yi mam momasôna. (Añ Hiôb 37:​23, 24.) Di pôdôl le ndémbél i Hiôb. Yéhôva a bi bat Hiôb ngandak mambadga ma ma bi unda le Hiôb a bé yep yi. I mambadga ma, ma bi boñ le nyuu i yi nye jam kayéle a héñha mahoñol. (Hiôb 42:​3-6) Yak bés di nlama ba suhulnyuu, di neebege le di nla bé pam i yi mam momasôna. Hala a nhôla bés i yi le Yéhôva a nyi mam ma mbéda toi bés ni le a ga hôla bés i yoñ makidik malam.​—Bingéngén 2:6.

3. Kii di ga tehe munu yigil ini?

³ I yigil ini i ga pôdôl ngim mam di nyi bé, ni mandutu di mboma inyule di nyi bé i mam ma. Di ga tehe ki inyuki hala a yé loñge i ngéda di nyi bé ngim mam. Hala a nhôla bés i yi le Yéhôva “nu a nyi mam momasôna,” a ga kal bés mam di gwé toi ngôñ i yi.​—Hiôb 37:16.

DI NYI BÉ I NGÉDA LISUK LI NLO

4. Inoñnaga ni kaat Matéô 24:​36, kii di nyi bé?

⁴ Añ Matéô 24:36. Di nyi bé kekii lisuk li nkoñ ’isi li nlo. Ngo to Yésu a bé yi bé ‘kel, to ngeñ’a i ngéda a bé hana ’isi. I mbus ngéda, a bi kal baôma bé le Yéhôva nyen a nkit i ngéda hiki jam li nlama bôña. (Minson mi baôma 1:​6, 7) Yéhôva a bi mal téé ngéda a ga tjé i béba nkoñ ’isi ini, di nlama bé lôôs ngéda yés i yéñ yi i ngéda i.

5. Kiki di nyi bé i ngéda lisuk li nkoñ ’isi li ga lo, kii i nla tééñga bés?

⁵ I ngéda di mbéñge i mam Yésu a bi kal, di nla bé pam i yi imbe ngéda lisuk li ga lo. Hala a nla boñ le di waa, téntén ibale hala a yé ngandak nwii le di mbem lisuk li nkoñ ’isi, tole di nwaa mandegle ma bôt bés ba lihaa ni bôt bape. (2 Pétrô 3:​3, 4) Di yé le di hoñol le ibale di yik ngéda lisuk li nkoñ ’isi li nlo, ki di mbem, di hônbaga mandegle ibabé ndutu yo ki yo.

6. Inyuki hala a yé loñge le di yi bañ i ngéda lisuk li nkoñ ’isi li ga lo?

⁶ Yéhôva a bi kal bé bés i ngéda lisuk li nlo, a gwé ngôñ le di unda le di ngwélél nye inyule di ngwés nye, di bôdlak nye ñem. Di nlama bé gwélél Yéhôva di hoñlak le ibale lisuk li nlo bé i ngéda di ngwés, di ntéé. Di héléé bañ i badba le lisuk li ga lo kekii ndi di hoñol i mam Yéhôva a ga boñ i ngéda lisuk li ga lo. Ibale di mboñ hala, di ga kônde téñbe ni Yéhôva, di boñok kii yosôna i mbéda inyu lémél nye.​—2 Pétrô 3:​11, 12.

7. Kii di nyi?

⁷ I mam di nyi mon ma yé nseñ. Kii hihéga, di nyi le dilo di nsôk di bi bôdôl i nwii 1914. Mbañ i Bibel i mpôdôl i ngéda i, i ñunda ki mam ma mbôña i nkoñ ’isi ibôdôl ha ngéda i. Hala a ñunda bés le “hilo hikeñi hi Yéhôva hi yé bebee.” (Sôfônia 1:14) Di nyi ki le Yéhôva a bi ti bés bôlô le di añle ngandak bôt “ñañ nlam u Ane.” (Matéô 24:14) I ñañ nlam u, u ñañlana bebee le ikété 240 biloñ, ikété iloo 1000 dilémb. Baa di gwé ngôñ le Yéhôva a kal bés kel ni ngeñ inyu boñ le di kee i añal ñañ nlam?

DI NYI BÉ KII YÉHÔVA A GA BOÑ

8. Minson mi bañga Nyambe wee kii? (Ñañal 11:5)

⁸ Di nyi bé ‘minson mi bañga Nyambe nwominsôna.’ (Añ Ñañal 11:5.) I bibuk bini le ‘minson mi bañga Nyambe’ bi ngwéélana inyu pôdôl mam Yéhôva a nwas le ma bôña inyu boñ le sômbôl yé i yon. Di ta di yi bé inyuki Yéhôva a nwas ngim mam, di nyi bé to mam momasôna a ga boñ inyu yés. (Tjémbi 37:5) Kiki bayimam ba yé ngi tibil nok lelaa mañge a nhol ikété libum li nyañ, hala nyen to bés di nla bé pam i nok mam momasôna Yéhôva a mboñ.

9. Kiki di nyi bé i ngéda lisuk li ga lo, mambe mandutu di nla boma?

⁹ Di nla kahal ngeñee i nson u Yéhôva inyule di nyi bé kekii lisuk li ga lo. Di nla tjél ti ngéda yés i nson u Yéhôva, di hôya le di nlama kon maséé ni ndék mam di gwé, tole di nla tjél ke i hôla i het ngôñ i yé. Ibale di nla bé boñ mam di gwé ngôñ i boñ i ntôñ u Yéhôva, tole di nhoñol le nson wés u num bé matam malam, tole i ngéda di mboma mandutu mu nson wés, di nla kahal hoñol le di nlémél ha bé Yéhôva.

10. Kiki di nyi bé i ngéda lisuk li ga lo, hala a nhôla bés i bana bimbe bilem?

¹⁰ Kiki di nyi bé i ngéda lisuk li ga lo, hala a nhôla bés i bana bilem bilam kii bo suhulnyuu ni ñem nsôhga. Hala a nhôla bés i nok le mahoñol ma Yéhôva ma nloo mahoñol més huum. (Yésaya 55:​8, 9) Hala a nhôla ki bés i kônde bôdôl Yéhôva ñem. Ibale mam més ma nke loñge i nson likalô, tole i minson mimpe mi ntôñ, Yéhôva nyen a kôli ni bibégés. (Tjémbi 127:1; 1 Korintô 3:7) Ndi to mam ma nke bé loñge, di bigda le Yéhôva nyen a nkena mam. (Yésaya 26:12) Bés di nsal bôlô Yéhôva a nti bés, di nwas le yak nye a sal bôlô yé. Di nyi le a ga éga bés to ibale a mboñ bé manyaga kiki a bé boñ i ngéda kôba.​—Minson mi baôma 16:​6-10

11. Kii di nyi?

¹¹ Di nyi le Yéhôva a ngwés bés, a téé sép, a ban-ga pék. A yé maséé ngandak inyu nson di ngwel inyu yé ni inyu lôk kéé. Di nyi ki le Yéhôva a nsayap i bôt ba ntéñbe ni nye.​—Lôk Héber 11:6.

DI NYI BÉ LELAA KEL I GA YE

12. Inoñnaga ni Yakôbô 4:​13, 14, kii di nyi bé?

¹² Añ Yakôbô 4:​13, 14. Nlôm jam a yé le di nyi bé lelaa kel i ga ba yani, to nomaa. Munu nkoñ ’isi unu, “mangéda mabe ni mimpuhge mi mam mi nkwél bôt bobasôna.” (Ñañal 9:11) Inyu hala nyen di nyi bé too minsoñgi nwés mi ga yon, too di ga ba ha yani ni nomaa inyu tehe lelaa i mam di mbem ma ga yon.

13. I ngéda di nyi bé lelaa yani a ga ba, mambe mandutu di nla boma?

¹³ Ñiñ i nla lédél bés i ngéda di nyi bé kii i mbem bés i dilo di nlo. Inyuki? Di nla héléé i badba le: ‘Yani a ga ba lelaa?’ Hala a boñ le di ba ha bé maséé. Ibale ngandak mandutu i mpuhe bés ngélé yada, hala a nla boñ le di kahal kônha ngoo. I ngéda i jam di bemek li nlo bé, di nla lehel ñem, di somol.​—Bingéngén 13:12.

14. Kii i mboñ le di ba toi maséé? (Béñge yak bititii.)

¹⁴ I ngéda di nhônba mandutu, di ñunda le to kii i mpémél bés, di ga gwélél Yéhôva inyule di ngwés nye, he bé inyu yéñe yés. Bibel i ñunda le Yéhôva a nkéñ bé hiki ngéda le mandutu ma kwél bés, ni le a bi kit bé i bisu bi ngéda lelaa niñ yés i ga ba. A nyi le di nla ba maséé to ibale di nyi bé lelaa mam ma ga ba yani. I mbéda ndik le di nwas le a éga bés, di nôglak nye. (Yérémia 10:23) I ngéda di nwas le nyen a éga bés i ngéda di nyoñ makidik, a yé ndik wee di yé i kal le: “Ibale Yéhôva a ngwés, d’a niñ, di boñ hisém tole hikaa.”​—Yakôbô 4:15.

15. Di nyi le kii i ga bôña i dilo di nlo?

¹⁵ Di nyi bé lelaa yani a ga ba, ndi di nyi le Yéhôva a mbôn bés niñ boga i ngii tole hana ’isi. Di nyi le a ntembee bé, ni le jam jo ki jo li ta bé le li sôña nye i boñ mam a mbôn bés. (Titô 1:2) Nyetama nyen ‘a ñañal lisuk, ibôdôl i ngéda kôba, a ñañal mam ma yé ngi bôña.’ A bi pot mam i ngéda kôba, ma yon. Yak ma a mpot nano, ma ga yon i dilo di nlo. (Yésaya 46:10) Di nyi le yom yo ki yo i nla bé sôña le Yéhôva a gwés bés. (Rôma 8:​35-39) A nti bés pék, hogbe ni ngui di gwé ngôñ inyu boñ le di laa hônba mandutu di mboma. Ibabé pééna, Yéhôva a ga hôla bés, a sayap ki bés.​—Yérémia 17:​7, 8.

DI NLA BÉ HÉGDA LELAA YÉHÔVA A NYI BÉS

16. Inoñnaga ni kaat Tjémbi 139:​1-6, kii Yéhôva a nyi?

¹⁶ Añ Tjémbi 139:​1-6. Yéhôva nyen a bi hek bés, a nyi bés, a nok bés, a nok yak mahoñol més. A nwaa bé tôñ bés. A nyi i mam di mpot ni inyuki di mpot mo, a nyi ki i mam di mboñ ni inyuki di mboñ mo. Kiki Kiñe David a bi pot, Yéhôva a ntat bés; to hee di yé, a ntehe bés. Nwet ngiinda yosôna, Nhek ngii ni ’isi a yé liwanda jés, kinje bisai! David a bi kal le: ‘[Yéhôva] a nyi bés i nya i nhélhana kiyaga. I nya yi i, i nloo mam di nla nok.’​—Tjémbi 139:​6, buk isi lipep.

17. Inyuki i nla bane bés ndutu i neebe le Yéhôva a nyi bés loñge?

¹⁷ I mam di bi boma i niñ yés, bilem bi loñ yés, ni nlômbi wés base bi nla boñ le di tehe bé Yéhôva kiki Tata wés nu a ngwés bés. Tole di nla hoñol le kiki di bi boñ mam mabe ngandak, Yéhôva a ta bé le a ba liwanda jés, a ta bé to le a tiige bés bebee. Yak David a bé hoñol hala ngim mangéda. (Tjémbi 38:​18, 21) I mut a njo sañ inyu nwas bilem bibe i nôgôl mambén ma Yéhôva a yé le a badba le: ‘Nyambe a nyi le i nwas i mam mana i nlédél me, inyuki a nkal me le me nwas mo ibale a ngwés toi me?’

18. Ibale di neebe le Yéhôva a nyi bés iloo bésbomede, hala a nlona kii bés? (Béñge yak bititii.)

¹⁸ Di nlama bigda le Yéhôva a nyi bés iloo bésbomede ni le a ntehe bilem gwés bilam, bi bésbomede di ntehe bé. To hala kiki a ntehe bilem gwés bibe, a nyi bés, a nyi ki mahoñol més, jon a ngwés bés. (Rôma 7:15) I ngéda di mbigda le Yéhôva a ntehe bilem gwés bilam, hala a nkônde ti bés makénd i gwélél nye ni ñem wés wonsôna, yak ni maséé momasôna.

19. Kii di nyi?

¹⁹ Di nyi le Yéhôva a yé gwéha. Pééna yo ki yo i ta bé. (1 Yôhanes 4:8) Di nyi le a nti bés mambén inyule a ngwés bés, ni le a niiga bés inyu loñge yés. Di nyi le Yéhôva a gwé ngôñ le di niñ i boga ni boga. Inyu hala nyen a bi neebe le Man wé a wo inyu yés. Sesema i Yésu i yé ha inyu hôla bés i gwélél Yéhôva to hala kiki di yé baboñbéba. (Rôma 7:​24, 25) Di nyi le “Nyambe a nloo miñem nwés, a nyi ki mam momasôna.” (1 Yôhanes 3:​19, 20) Yéhôva a ntehe mam momasôna di mboñ, a nyi le di nla toi boñ sômbôl yé.

20. Kii i nla hôla bés le di héléé bañ i njelel?

²⁰ Yéhôva a nsôô bé bés jam jo ki jo li di nlama yi. Ibale di nok hala, d’a héléé bé i tjelel inyu mam di nla bé héñha ndi di ga boñ ndik mam di nlama boñ. Ibale di mboñ hala, wee di mbôdôl toi Yéhôva ñem “Nu a nyi mam momasôna.” (Hiôb 36:4) Nano, ngandak mam i yé le di nla bé nok ndi i ngéda di ga niñ i boga ni boga, d’a pam i yi ngandak mam inyu Tata wés Yéhôva.​—Ñañal 3:11.