Di hôla i bet ba nigil Bibel i gwélél Yéhôva

1-2. (a) Inyuki bôt bahogi ba nkon woñi i yoñ makidik i gwélél Yéhôva? (b) Kii d’a tehe munu yigil ini?

I NGÉDA u bé nigil Bibel, baa u bé kon woñi i yila Mbôgi Yéhôva? Bebek u bé kon woñi le bôt we ni bo ni nsal, mawanda moñ, tole bôt boñ ba lihaa ba ga unbene we. Tole u bé hoñol le u ta bé le u pam i nôgôl mambén ma Nyambe. Ibale u bi boma i ndutu i, u nla tibil nok i bet ba nkon woñi i yoñ makidik i gwélél Yéhôva.

² Yésu a bi kal le i ngéda mut a nkon woñi, hala a nla sôña nye i hol. (Matéô 13:​20-22) Ndi a bi waa bé hôla i bet ba bé kon woñi i yila banigil bé. A bi unda banigil bé lelaa ba bé le ba hôla i nya bôt i, (1) i yi mam ma nsôña bo i hol, (2) i kônde gwés Yéhôva, (3) i yi mam ma yé toi nseñ inyu yap (4) i yémbél mandutu map. Lelaa di nla boñ i mam Yésu a bi niiga banigil bé i ngéda di ngwélél i kaat ini le Niñ ilam i boga ni boga! inyu hôla bôt i yoñ makidik i gwélél Yéhôva?

HÔLA I MUT U NIIGA BIBEL I YI MAM MA NKÉÑ NYE I HOL

3. Inyuki Nikôdémô a bé kon woñi i yila nnigil Yésu?

³ Nikôdémô, nu a bé ñane wada i Lôk Yuda, a bi boma ngim ndutu i ngéda i bi béda le a yila nnigil Yésu. Yom kiki bo sôñ isamal ndigi, i mbus le Yésu a bi bôdôl nson wé, Nikôdémô a bi yi le Yésu nyen a yé Mésia. (Yôhanes 3:​1, 2) Ndi a bi ke i tehe Yésu bisôsôli inyule a bé “kon Lôk Yuda woñi.” (Yôhanes 7:13; 12:42) Bebek, a bé hoñol le ibale a nyila nnigil Yésu, a ga nimis ngandak mam.a

4. Lelaa Yésu a bi hôla Nikôdémô i yi sômbôl i Nyambe?

⁴ Nikôdémô a bé yi Mbén, ndi i bé béda le a yi sômbôl i Yéhôva. Lelaa Yésu a bi hôla nye? Yésu a bi ti ngéda yé inyu kwel ni Nikôdémô juu. Yésu a bi sôô bé Nikôdémô i mam a bé lama boñ inyu yila nnigil: a bé lama tam bibéba gwé, a sôblana, a hémle ki Man Nyambe.​—Yôhanes 3:​5, 14-21.

5. Lelaa u nla hôla i mut u niiga Bibel i yi mam ma nkéñ nye i hol?

⁵ To ibale i mut di niiga Bibel a nyi Bitilna, bebek i ga béda le di hôla nye i yi kii i kéñ nye i hol. Bôlô yé tole bôt bé ba lihaa ba nla sôña nye i yila Mbôgi Yéhôva. Inyu hala nyen u nlama ti ngéda yoñ inyu hôla nye. U nla naña nye i nyo kofi tole i ke i minhiômôk ni we. I ngéda u mboñ i mam ma, a nla yible we ñem, a kal we i mam ma ntééñga nye. Tinde nye i héñha bilem gwé, he bé inyule a nsômbôl lémél we, ndi inyule a nsômbôl lémél Yéhôva.

6. Lelaa u nla hôla i mut u niiga Bibel i yoñ makidik i gwélél Yéhôva? (1 Korintô 16:13)

⁶ I ngéda mut a nyi le Yéhôva a ga hôla nye i nôgôl mambén mé, hala a nkônde ti nye makénd i boñ i mam a nigil. (Añ 1 Korintô 16:13.) I ngéda u niiga mut Bibel, u yé kiki malét suklu. Baa u ngi bigdaga i ngéda u bé i suklu? Numbe malét u bé gwés ngandak? Bebek u bé gwés i nwet a bé hôla we, a kalak we le a nyi le u nla net makégse. Hala nyen u nlama boñ i ngéda u niiga mut Bibel. U nkal ndik bé nye le a nôgôl mambén ma Yéhôva, ndi u nkal yak nye le u nyi le a nla nôgôl mo. Kii i nla hôla we i boñ hala?

HÔLA I MUT U NIIGA BIBEL I KÔNDE GWÉS YÉHÔVA

7. Lelaa Yésu a bi hôla banigil bé i kônde gwés Yéhôva?

⁷ Yésu a bé yi le kiki banigil ba bé gwés Yéhôva, ba bé le ba boñ i mam ba bé nigil. A bé béna niiga banigil bé mam ma bé hôla bo i kônde gwés Yéhôva. Kiki hihéga, a bi kal le Yéhôva a yé kiki Isañ nu a nti bon bé mam malam. (Matéô 7:​9-11) Bebek bahogi ipôla bôt Yésu a bé pôdôs ba bééna bé i nya basañ i. Ni nhoñol le ba bi nôgda lelaa i ngéda Yésu a bi ti hihéga hi isañ nu a nleege man wé nu a mboñ bipôm? Ba bi tehe toi le Yéhôva a nkônôl bagwélél bé ngoo.​—Lukas 15:​20-24.

8. Lelaa di nla hôla i mut di niiga Bibel i kônde gwés Yéhôva?

⁸ Yak we, u nla hôla i mut u niiga Bibel i ngéda u nhôla nye i tehe bilem bi Yéhôva. I ngéda ni nigil, hôla nye i tehe bilem bi Yéhôva mu mam ni nigil. Ibale ni mpôdôl binoñ, unda nye le Yésu a bi wo inyu yé. (Rôma 5:8; 1 Yôhanes 4:10) Ibale nnigil Bibel a nyimbe le Yéhôva a ngwés nye, hala a nla tinde nye i kônde gwés Yéhôva.​—Galatia 2:20.

9. Kii i bi hôla Michael i yila Mbôgi Yéhôva?

⁹ Di béñge le ndémbél i Michael nu a yé i Indônésia. A bi néñél i lihaa li Mbôgi Yéhôva ndi a bi sôblana bé. I ngéda a bi bana 18 nwii, a ke i mbeñge, a kahal luk mé matôa. I mbus, a bi témb i loñ yé, a biiba, a yék nwaa ni man, a témb a ke i mbeñge inyu sal i bôlô a bé sal nyoo. I mbus ngéda, nwaa ni ngond yé ba bi bôdôl nigil Bibel, ba holok. I ngéda nyañ a bi wo, a bi témb i loñ yé inyu tééda isañ, a bôdôl nigil Bibel, i ngéda a bi bol i homa nunu le “Kônde tém” i yigil 27 munu kaat ini le Niñ ilam i boga ni boga!, i homa nu a tihba nye ngandak. A bi yoñ ngéda, a ôt pék, a hoñol lelaa Yéhôva a bi lama nok ndutu i tehe lelaa ba ntééñga Man wé, a bôô maéya. Hala a bi hôla nye i nok le Yéhôva bo Yésu ba ngwés nye ngandak. Jon inyu ti bo mayéga, a bi héñha, a sôblana.

HÔLA I MUT U NIIGA BIBEL I YI MAM MA YÉ NSEÑ

10. Lelaa Yésu a bi hôla banigil bé ba bisu i ti ngéda yap yosôna i nson u ñañ nlam? (Lukas 5:​5-11) (Béñge yak titii.)

¹⁰ Banigil ba Yésu ba bisu ba bé yi le Yésu a yé Mésia, ndi ba bééna ngôñ ni mahôla inyu boñ le ñañ nlam u yila jam li bisu i niñ yap. Hala a bé ndék ngéda le Pétrô bo Andréa ba bi yila banigil ba Yésu i ngéda Yésu a bi kal le ba ti ngéda yap yosôna i nson u ñañ nlam. (Matéô 4:​18, 19) Ba bé balop tjobi, bôlô yap i bé ti bo moni ngandak. I nene le ba bé sal ni Yakôbô bo Yôhanes. (Markô 1:​16-20) I ngéda Pétrô bo Andréa ba bi “tjôô mbunja yap,” i nene le ba bé ba ma yoñ makidik le b’a sal, ba téédaga lihaa jap, ba noñok Yésu i nlélém ngéda. Ndi inyuki ba bi ti ngéda yap yosôna i nson u ñañ nlam? Kaat Lukas i ñéba le i hélha jam Yésu a bi boñ yon i bi kwés bo nkaa le Yéhôva a ga yoñ ndun ni bo.​—Añ Lukas 5:​5-11.

11. Kii u nla añle i mut u niiga Bibel inyu hôla nye i lédés hémle yé?

¹¹ Di nla bé boñ manyaga kiki Yésu, ndi di nla toñle i bet di niiga Bibel lelaa Yéhôva a nhôla i bet ba mbôdôl nye ñem. Baa u ngi bigdaga lelaa Yéhôva a bi hôla we i ngéda u bi bôdôl ke i makoda? Bebek u bi kwel ni nwet woñ bôlô, u kal nye le u nla ha bé sal i ngéda ngeñ yoñ likoda i nkola. I ngéda u nkwel ni mut u niiga Bibel, toñle nye lelaa hémle yoñ i bi kônde let i ngéda u bi tehe lelaa Yéhôva a nsayap we inyule u nti ngéda yoñ yosôna i nson wé.

12. (a) Inyuki di nlama héñha lôk kéé di nkena yak nnigil Bibel? (b) Lelaa di nla gwélél bividéô inyu niiga bôt? Ti hihéga.

¹² Yak lôk kéé ipe i i nti ngéda yap yosôna i nson u Yéhôva i nla hôla i mut u niiga Bibel, jon i yé loñge i héñha bôt di nkena yak nnigil Bibel. Ba nla añle nye lelaa ba bi yila Mbôgi Yéhôva, ni lelaa ba nti ngéda yap yosôna i nson wé. Ni nla ki yoñ ndék ngéda inyu béñge bividéô bi bi yé i homa nunu le “Kônde tém” tole “Kônde yéñ” munu kaat yigil yés le Niñ ilam i boga ni boga!. Kiki hihéga, i ngéda ni mpam i yigil 37, ni nla kwélél i mam ma yé mu vidéô ini le Yéhôva a ga ti bés i mam ma yéne bés nseñ.

HÔLA I MUT U NIIGA BIBEL I YÉMBÉL MANDUTU

13. Kii Yésu a bi kal banigil bé le ba boñ i ngéda ba ga boma ngolba?

¹³ Yésu a bi kal banigil bé ngandak ngélé le bôt ba ga kolba bo, yak bôt bap ba lihaa. (Matéô 5:11; 10:​22, 36) I ngéda nson wé u bé bebee ni mal hana ’isi, Yésu a bi kal bo le ba yé le ba nol bo inyule ba ngwélél Yéhôva. (Matéô 24:9; Yôhanes 15:20; 16:2) A bi kal bo le i ngéda ba nke i likalô, ba nlama yoñ yihe. A kal yak bo le ba lek bañ joo i ngéda bôt ba nkahal kolba bo. Ndi ba yoñ yihe inyu boñ le ba kena nson wap u ñañ nlam ni bisu.

14. Lelaa di nla hôla i bet di niiga Bibel i ba nkôôbaga i boma manoodana? (2 Timôtéô 3:12)

¹⁴ Di nla toñle i mut di niiga Bibel i mam a nla nok i bôlô, ma a nla nok yak mawanda mé, tole yak bôt bé ba lihaa inyu boñ le a ba nkôôbaga i ngéda a ga boma manoodana. (Añ 2 Timôtéô 3:12.) Bôt bahogi ba nla nol nye hiol nyoo i bôlô inyule a mboñ biliya nano i niñ inoñnaga ni matiñ ma Bibel. Bôt bape, yak bôt bé ba lihaa ba yé le ba pééna i mam a nhémle. Ibale di mpala kal i bôt di niiga Bibel mandutu ba yé le ba boma, ba ga ba nkôôbaga i ngéda ma ga lo.

15. Kii i nla hôla nnigil Bibel i ba nkôôbaga i boma ngolba i lihaa jé?

¹⁵ Toñle i mut u niiga Bibel le bôt bé ba lihaa ba nla unbene nye inyule a nigil ni Mbôgi Yéhôva. Ba nla hoñol le ba nlôk nye tole ba nla hoñol le Mbôgi Yéhôva i yé bibéba bi bôt. Ngo yak Yésu, bôt bé ba lihaa ba bi ndegle nye. (Markô 3:21; Yôhanes 7:5) Niiga nye le a hônba i bôt ba ñunbene nye, a bep bañ pôdôs bôt bé ba lihaa, to bôt bape.

16. Lelaa u nla hôla i mut u niiga Bibel i añal ñañ nlam ibabé le a babaa bôt?

¹⁶ To ibale bôt bé ba lihaa ba ñemble nye, i mbéda bé le a kahal toñle bo mam momasôna. He la bé, bôt bé ba lihaa ba nwaa nye, ba mbana ha bé to ngôñ i kwel ni nye. Kal nnigil Bibel le i ngéda a ñañal ñañ nlam, a nlama néhne bôt njel le ba bana ngôñ i emble nye lisañ lipe. (Kôlôsé 4:6) A nla kal bo le ba kee i jw.org. Hala a nla boñ le bomede ba yi Mbôgi Yéhôva.

17. Lelaa u nla hôla i mut u niiga Bibel i timbhe i bet ba nyi bé Mbôgi Yéhôva? (Béñge yak titii.)

¹⁷ U nla ke i jw.org, i homa nunu le “Mambadga bôt ba mbéna bat” inyu hôla i mut u niiga Bibel i ba nkôôbaga i timbhe mambadga ba nla bat nye i bôlô, tole i lihaa jé. (2 Timôtéô 2:​24, 25) Hiki ngéda ni mal yigil yada munu kaat yés ini le Niñ ilam i boga ni boga!, ni kwélél i homa nunu le “Bôt bape ba nkal le.” Ti nnigil Bibel makénd le a timbhe ni bibuk gwé nyemede. Ibale a ntimbhe bé loñge, hôla nye i lémés ndimbhe yé. Hala a ga ti nye makénd i añal ñañ nlam.

18. Lelaa u nla hôla i mut u niiga Bibel i bôdôl añal ñañ nlam? (Matéô 10:27)

¹⁸ Yésu a bi kal banigil bé le ba nlama añle bôt ñañ nlam. (Añ Matéô 10:27.) Ibale nnigil Bibel a nhoo añal ñañ nlam, a ga hoo yak bôdôl Yéhôva ñem. Lelaa di nla hôla nye i boñ hala? Ibale u nok ndik le hônd i yé, u nla bat nye le: ‘Baa u nla bôdôl añal ñañ nlam?’ Toñle nye le ngandak bôt i yé i ba maséé i bôdôl añal ñañ nlam i ngéda hônd i yé. Yak minkwel lôk kéé i mbéna bana i likoda li ñem sonde mi nla hôla nye i kôôba inyu añal ñañ nlam. Ibale yak nye a mbôdôl ti minkwel, hala a ga hôla nye i bôdôl añal ñañ nlam ni makénd.

UNDA I MUT U NIIGA BIBEL LE U NYI LE A NLA BA NGWÉLÉL YÉHÔVA

19. Lelaa Yésu a bi unda le a mbôdôl banigil bé ñem, lelaa di nla nigle nye?

¹⁹ Ilole Yésu a mbet i ngii, a bi kal banigil bé le ba ga koba nye nyoo. Ba bé nok bé kii Yésu a nsômbôl kal. Ndi Yésu a bi ke bé i béñge hala, a bé yi le ba ngwés Yéhôva. (Yôhanes 14:​1-5, 8) A bé yi le kel yada, ba ga nok i mam ba bé nok bé ha ngéda i, kiki bo lini le ba ga ke i ngii. (Yôhanes 16:12) Yak bés di nlama unda i bet di niiga Bibel le di nyi le ba ngwés Yéhôva.

20. Lelaa mankéé nu muda wada i Malawi a bi unda le a bé bôdôl i mut a bé niiga Bibel ñem?

²⁰ Di pééna bañ le i bôt di niiga Bibel ba gwé ngôñ i lémél Yéhôva. Di béñge i jam li bi pémél mankéé nu muda wada i Malawi le Chifundo, a bi bôdôl nigil Bibel ni hingonda hiada le Alinafe munu kaat yés ini le Niñ ilam i boga ni boga! Alinafe a bé i base Lôk Pada. I ngéda ba bi mal nigil pes 14, Chifundo a bi bat Alinafe le: “Baa u nhoñol le di nlama gwélél bititii inyu bégés Nyambe?” Alinafe a bi unup, a timbhe nye le: “Makidik mem ma, hala a mbéñge bé we!” Chifundo a bi hoñol le Alinafe a’ nigil ha bé. Ndi a bi téé bé yigil, a bé yi le kel yada, Alinafe a ga nok. I mbus ngéda, ba bi pam i pes 34, Chifondo a bat Alinafe le: “Ibôdôl nu u nigil mam inyu Yéhôva ikété Bibel, umbe nseñ u ma ôt?” Chifundo a ntoñle bés lelaa Alinafe a bi timbhe nye, a nkal le: “A bi sima ngandak mam, jada mu li yé le Mbôgi Yéhôva i mboñ bé i mam Bibel i nkal le ma yé mabe.” I mbus, Alinafe a bé gwélél ha bé bititii, a sôblana.

21. Lelaa di nla hôla nnigil Bibel i yoñ makidik i gwélél Yéhôva?

²¹ Yéhôva nyen “a mboñ le mbôô i nañ,” ndi yak bés di nla hôla i bet ba nigil Bibel i hol. (1 Korintô 3:7) Di nlama ndik bé niiga bôt mambén ma Yéhôva. Ndi di nlama yak hôla bo i kônde gwés Yéhôva, di hôlga bo i ti ngéda yap i nson u Yéhôva. Di nlama ki hôla bo i bôdôl Yéhôva ñem i ngéda ba mboma mandutu. Ibale di ñunda bo le di mbôdôl bo ñem, hala a nla hôla bo i yi le ba nla nôgôl mambén ma Yéhôva, ba yila ki bagwélél bé.