Lelaa Yéhôva a nhôla bés i hônba?

1. Inyuki i mbéda le di hônba, njee a nla hôla bés? (1 Pétrô 5:10)

NIÑ i nlet ngandak munu dilo di nsôk, jon i mbéda le di hônba. Lôk kéé ihogi i nkon ngandak. Bape, mut wap nu ba bé gwés ngandak a bi wo. Bape ki, bôt bap ba lihaa tole baane ba nkolba bo. (Matéô 10:​18, 36, 37) To imbe ndutu u mboma, u hôya bañ le Yéhôva a nla hôla we i hônba.​—Añ 1 Pétrô 5:10.

2. Kii i nhôla bikristen i hônba?

² Ba nkal le mut a nhônba i ngéda a nsomol bé to ibale a mboma mandutu, ndééñga tole manoodana. Di nla bé hônba ni ngui yés bésbomede; Yéhôva nyen a nti bés ngui i hônba, a nti bés “lipémba li li nloo li mut binam.” (2 Korintô 4:7) Munu yigil ini, d’a tehe makébla ma-na Yéhôva a nti bés inyu hôla bés i hônba. D’a tehe ki lelaa di nla gwélél makébla ma.

MASOOHE

3. Inyuki di nla kal le masoohe ma toi hélha jam?

³ Yéhôva a bi boñ hélha jam i i nhôla bés i hônba. A bi yible bés njel i kwel ni nye to hala kiki di yé bikwéha bi bôt. (Lôk Héber 4:16) Hoñol ki, di nla soohe Yéhôva to imbe ngéda, di nla ki kal nye mam momasôna, to umbe hop di mpot, to numbe homa di yé, to di yé bésbotama, to di yé i ndap mok. (Yôna 2:​1, 2; Minson mi baôma 16:​25, 26) Ibale nduña i nai kayéle di nyi bé lelaa di pot, Yéhôva a nyi i jam di nsômbôl kal. (Rôma 8:​26, 27) Masoohe ma yé toi hélha jam!

4. Kii i nyis bés le sômbôl i Yéhôva i yé le di soohe nye le a hôla bés i hônba?

⁴ Yéhôva a nkal bés mu Bañga yé le “to kinje jam di mbat inoñnaga ni sômbôl yé, a ñemble bés.” (1 Yôhanes 5:14) Baa di nla soohe Yéhôva le a hôla bés i hônba? Ñ! Sômbôl yé i. Kii i nyis bé hala? I ngéda di nhônba, hala a mboñ le Yéhôva a timbhe ñoo wé, Satan Nsohop. (Bingéngén 27:11) Handugi hala, Bibel i ñéba le Yéhôva a yé bebee i “unda ngui yé inyu hôla bôt ba ngwélél nye ni ñem u yôni.” (2 Miñañ 16:9) Jon di nyi le Yéhôva a gwé ngui, a ban-ga ngôñ i hôla bés i hônba.​—Yésaya 30:18; 41:10; Lukas 11:13.

5. Lelaa masoohe ma nla ti bés nsañ? (Yésaya 26:3)

⁵ Bibel i nkal le ibale di nyemhe Yéhôva, ha nyen ‘nsañ u Nyambe, u u nloo mam momasôna mut binam a nla nok, w’a tééda miñem nwés ni mahoñol més.’ (Filipi 4:7) Hala a nkobla le kii? I bôt ba ngwélél bé Yéhôva ba mboma mandutu, ba nla ki boñ ngandak mam inyu bana nsañ. Kiki hihéga, bahogi ba noode héya mahoñol map momasôna inyu boñ le ba bana ñem nwee. Ndi i ngéda mut a mboñ hala, hala a yé béba inyu yé inyule mimbuu mimbe mi nla kahal tééñga nye. (Hégha ni Matéô 12:​43-45.) Ni ki le, nsañ Yéhôva a nti bés i ngéda di nsoohe nye u nloo nsañ mut a nla bana i ngéda a mboñ i mam ma. I ngéda di nsoohe Yéhôva, di ñéba le di mbôdôl nye ñem, ha nyen a nti bés “nsañ ngéda yosôna.” (Añ Yésaya 26:3.) Yéhôva a mboñ hala i ngéda a nhôla bés i bigda i mam di nigil mu Bañga yé. I mam ma, ma nhôla bés i ba nwee, di yik le Yéhôva a ntôñ bés, ni ki le a nsômbôl le di ba maséé.​—Tjémbi 62:​1, 2. 

6. Lelaa u nla tibil gwélél likébla lini le masoohe? (Béñge yak titii.)

⁶ Kii u nla boñ? I ngéda u yé i bisu bi manoodana, “bééga Yéhôva mbegee yoñ,” yemhe nye le a ti we nsañ. (Tjémbi 55:22) Bat yak nye pék inyu boñ le u laa nihbe ndutu yoñ. (Bingéngén 2:​10, 11) I ngéda u nsoohe Yéhôva le a hôla we i hônba, u hôya bañ ti nye mayéga. (Filipi 4:6) Béñge i mam ma ñunda le Yéhôva a yé ti we mahôla, ti nye mayéga inyu mahôla mé. U boñ bañ le ndutu yoñ i sôña we i tehe bisai Yéhôva a nkôp we.​—Tjémbi 16:​5, 6.

BAÑGA I NYAMBE

7. Lelaa yigil Bibel i nla hôla bés i hônba?

⁷ Yéhôva a bi ti bés Bañga yé inyu hôla bés i hônba. Ngandak minlôñ mi Bibel i ñunda bés le Yéhôva a nit bés. Hihéga hiada hini: Matéô 6:8 a nkal le: “Isoñ nan a nyi mam ma yé bé nseñ ilole ni mbat nye mo.” Yésu nyen a bi pot bibañga bi, a nyi Yéhôva iloo bôt bobasôna. Jon, di pééna bañ le Yéhôva a nla hôla bés i ngéda di mboma mandutu. Ngandak minlôñ mi Bibel ipe i nla hôla bés i hônba.​—Tjémbi 94:19.

8. (a) Limbe litiñ li Bibel li nla hôla bés i hônba. (b) Kii nla hôla bés i bigda matiñ ma Bibel?

⁸ Matiñ ma Bibel ma nla hôla bés i hônba. Ma nla hôla bés i bana pék inyu boñ le di yoñ makidik malam. (Bingéngén 2:​6, 7) Kiki hihéga, Bibel i nkal le di yoñ hiki kel kiki i nlo, le di lôôha bañ tôñ inyu yani tole noma. (Matéô 6:34) Ibale di meya di ñañ Bibel, di ôdôk pék mu, ha nyen d’a pala bigda matiñ ma ma nla hôla bés i niñ yés.

9. Lelaa bipes bi Bibel bi bi mpôdôl bagwélél ba Yéhôva ba behee bi ñunda bés le Yéhôva a yé bebee i hôla bés?

⁹ Bibel i mpôdôl yak bôt ba binam kiki bés ba ba bi bôdôl Yéhôva ñem, Yéhôva a hôla bo. (Lôk Héber 11:​32-34; Yakôbô 5:17) I ngéda di ñañ bipes bi Bibel bi bi mbéñge niñ yap, hala a nhôla bés i bigda le Yéhôva a yé “lisolbene jés ni ngui yés, di nla hoo kôhna mahôla mé i ngéda bikuu.” (Tjémbi 46:1) I ngéda di mbéñge niñ i bagwélél ba Yéhôva ba behee, hala a ntinde bés i nigle hémle yap ni hônba yap.​—Yakôbô 5:​10, 11.

10. Lelaa u nla tibil gwélél Bañga i Djob?

¹⁰ Kii u nla boñ? Añ Bibel hiki kel, u tééda ki minlôñ u ntehe le mi nla hôla we. Ngandak lôk kéé i yé i bôdôl kel yap ni buk kel, inyu boñ le ba bana pes kaat i i nti bo makénd kel yosôna. Sita yada le Mariea a bi tehe i jam li i ngéda ba bi léba le bagwal bé bo iba ba bééna kon u pos (cancer). Kii i bi hôla nye i tééda bo ilole ba bé wo? A nkal le: “Hiki kegla, me bé añ buk kel munu man kaat nunu le Di wan Bitilna hiki kel, me ôdôk pék mu. Hala a bé a boñ le me bana ndik Bañga i Djob mu mahoñol mem inyu boñ le me hoñol ndik bañ mandutu mem, ndi le me hoñol yak Yéhôva.”​—Tjémbi 61:2.

LÔK KÉÉ YÉS

11. Inyuki di yé maséé i ngéda di nyi le i ndutu di mboma, yak bôt bape ba mboma yo?

¹¹ Yéhôva a bi ti bés lôk kéé i bôlôm ni i bôda i nkoñ ’isi wonsôna, inyu hôla bés i hônba. I ngéda di nyi le “ntôñ wonsôna u lôk kéé [yés] ikété nkoñ ’isi u mboma minlélém mi mandutu,” hala a nhôla bés i yi le di ta bé bésbotama. (1 Pétrô 5:9) To imbe ndutu di mboma, di nyi le lôk kéé i ma boma i ndutu i, i hônba ki. Jon yak bés, di nla hônba!​—Minson mi baôma 14:22.

12. Lelaa lôk kéé i nla hôla bés, lelaa yak bés di nla hôla bo? (2 Korintô 1:​3, 4)

¹² I ngéda di nhônba mandutu, lôk kéé yés i nla lédés bés. Ñôma Paul nyemede a bi tehe i jam li. Lôk kéé i bé hôla nye i ngéda a bé i ndap mok, a bé béna ti bo mayéga, a sim-ga môl map. I lôk kéé i, i bé ti Paul makénd, i tinak nye gwom bi bé béda nye. (Filipi 2:​25, 29, 30; Kôlôsé 4:​10, 11) Yak i len ini, lôk kéé i yé bebee i hôla bés. I ngéda di gwé ngôñ ni mahôla, lôk kéé i bôda ni i bôlôm i yé ha inyu yés. I ngéda yak bo ba gwé ngôñ ni mahôla, di yé bebee i hôla bo.​—Añ 2 Korintô 1:​3, 4.

13. Kii i bi hôla sita yada le Maya i hônba?

¹³ Mankéé nu muda wada le Maya, i loñ Ruslan, a nkal le lôk kéé i bi lédés nye ngandak. I nwii 2020, bisônda bi bi jôp i ndap yé, bi kena nye i bikééhene inyule a bé añal ñañ nlam. A nkal le: “Ngim ngéda i bi pam le nduña i bé me nnayak. Lôk kéé i bôlôm ni i bôda i bé i nsébél me, i tilnaga me inyu kal me le ba ngwés me. Ibôdôl behee, me nyi le ntôñ Yéhôva u yé lihaa jem. Ndi ibôdôl i nwii 2020, me bi kônde tehe i jam li.”

14. Lelaa lôk kéé i nla hôla bés i hônba? (Béñge yak titii.)

¹⁴ Kii u nla boñ? I ngéda u nhônba ngim ndutu, u ke bañ haa ni lôk kéé i bôlôm ni i bôda. U kon bañ woñi i bat mimañ mahôla. Mi yé “lisolbene i ngéda mbuk mbebi a nhôñ, ni homa mut a nsolop ôôm nop.” (Yésaya 32:2) U hôya bañ le yak lôk kéé yoñ i mboma mandutu. Ibale u mbôñôl bo loñge, u ga ba maséé, hala a ga hôla yak we i hônba moñ mandutu.​—Minson mi baôma 20:35.

BOTÑEM YÉS

15. Lelaa botñem i nhôla bagwélél ba Yéhôva, lelaa i bi hôla yak Yésu? (Lôk Héber 12:2)

¹⁵ Yéhôva a bi ti bés botñem inyu boñ le di laa hônba. (Rôma 15:13) Di bigda lelaa botñem i bi hôla Yésu i hônba i ndutu i bé loo mandutu momasôna a bi boma hana ’isi. (Añ Lôk Héber 12:2.) Yésu a bé yi le ibale a ntéñbe, a ga pubus jôl li Yéhôva, a unda ki le Satan a yé mut bitembee. Yésu a bé yi ki le a ga ke a koba Isañ nyoo i ngii, a ane ki ni lôkisañ i mbus ngéda. Yak bés, i ngéda di nhoñol le d’a niñ i boga ni boga i mbok yondo, di nla hônba to imbe ndutu munu nkoñ ’isi u Satan unu.

16. Lelaa botñem i bi hôla sita yada i hônba, bibuk gwé bi niiga kii bés?

¹⁶ Di béñge lelaa botñem i bi hôla sita yada i Ruslan le Alla. Ba bi gwel nlô wé, ba ha nye i mok. Alla a nkal le: “Me bé soohe, me hoñlak i mam Yéhôva a mbôn bés, hala a bi boñ me le me tomb bañ. Me nyi le niñ yés yosôna bé ini. Yéhôva a ga mélés mandutu, d’a nok ha bé ndutu.”

17. Lelaa di nla unda le di yé maséé ni botñem yés? (Béñge yak titii.)

¹⁷ Kii u nla boñ? Yoñ ngéda i hoñol i mam momasôna Yéhôva a mbôn bés. Hégda le u yé i mbok yondo, hoñol bisai d’a kôs nyoo. Ibale u mboñ hala, w’a léba le mandutu di mboma nano ma ‘nom ndik ndék ngéda, ma hoyok ki.’ (2 Korintô 4:17) Boñ kii yosôna u nla inyu añle bôt ñañ nlam. Noode hégda lelaa ba nok ndutu munu nkoñ ’isi u Satan, ba nyi bé to sômbôl i Yéhôva. Kwel ni bo to ndék, inyu yis bo kii i yé Ane Djob.

18. Kii i nyis bés le mimbônga mi Yéhôva mi ga yon?

¹⁸ I ngéda Hiôb a bi mal hônba ngandak mandutu, a bi kal Yéhôva le: “Nano, me nyi le u nla boñ mam momasôna, ni le jam to jada u nsômbôl boñ li nai bé we.” (Hiôb 42:2) Kiki Hiôb, di nyi le jam to jada li nla bé sôña le sômbôl i Yéhôva i yon. I yi hala i nla hôla bés i hônba. Di yoñ le hihéga, ibale ngandak bidokta i nla bé tibil mut, hala a nla tééñga nye ngandak. Ndi ibale dokta nu a nyi bôlô yé loñge loñge a nléba kon wé, a toñle ki nye lelaa a ga tibil nye, i mut nu a mba maséé to hala kii dokta a yé ngi tibil nye. A nhônba, a ban-ga botñem le kon wé u ga mal. Yak bés, i ngéda di nhoñol i mam momasôna ma mbem bés i Paradis, hala a nhôla bés i hônba.

19. Kii Yéhôva a bi ti bés inyu hôla bés i hônba?

¹⁹ Di ntehe le, inyu hôla bés i hônba, Yéhôva a bi ti bés makébla mana le masoohe, Bañga yé, lôk kéé yés ni botñem. Ibale di ntibil gwélél makébla mana momasôna, Yéhôva a ga hôla bés i hônba mandutu més, letee nkoñ ’isi unu u tjiba.​—Filipi 4:13.