1925​—Hala a yé mbôgôl nwii len

JAM DI BÉ BEM LI BI LO BÉ

Ngandak banigil Bibel i bé hoñol le hisi hi ntémb hi yila paradis i nwii 1925. Inyuki? Mankéé Albert Schroeder, nu a bi yik sal i Juu li bakena ntôñ, a bi kal le: “Ntôñ u bé niiga le ha ngéda i, minhook mi mi bé mi yii hana ’isi mi bé lama ke i ngii inyu ane ni Yésu, ni le bagwélél ba Yéhôva ba behee kiki bo Abraham, David ni bape ki ba bé lama tuge, ba yila baane hana ’isi.” Nwii u bé u tagbege, ba tehe bé to yom, hala a unbaha lôk kéé ihogi.​—Bingéngén 13:12.

Tolakii i jam banigil Bibel ba bé bem li bi lo bé, ngandak ikété yap i bi ke ni bisu i ba sum sum i nson likalô, ba bi kônde ki nok le ba yé toi Mbôgi Yéhôva. Di béñge lelaa ba bi gwélél radiô inyu añle ngandak bôt ñañ nlam.

DI BI GWÉLÉL RADIÔ NGANDAK

I nwii 1924, ngandak bôt i bi emble i radiô ini le WBBR. Inyu hala nyen i nwii 1925, banigil Bibel ba bi oñ soso ndap ipe inyu radiô, bebee ni Chicago, Illinois. Ba bé sébél i radiô i le WORD. Ralph Leffler, nu a bi sal i maoñ ma radiô i, a nkal le: “Kôkôa, i ngéda lihep li bé, ngandak bôt i bé emble i radiô i, i bak haa.” Kiki hihéga, lihaa jada li bé haa ni i radiô i iloo 5 000 kilôméta i Pilot Station, Alaska, li bi emble minkwel mi bisu. I ngéda ba bi mal emble, ba tilna lôk kéé i i bé sal i radiô inyu ti bo mayéga inyu minkwel minlam mi bé tagbe mu.

Nkum Ntat nu hilo 1 hi sôñ Libuy li nyéé, nwii 1925, a bi toñol inyuki ngandak bôt i bé emble minkwel mu radiô i, a bi kal le: “I radiô i, i yé ikété biradiô bikeñi i Amérika. Bôt ba nla emble yo i pes likôl ni i pes hiôñg i Amérika, i Kuba, ni i ñombok u Alaska. Ngandak bôt i i maa bé nok ñañ nlam i mpam i nok wo ni njel i radiô ini.”

Mu nlélém ngéda, banigil Bibel ba bé boñ kii yosôna ba bé la inyu añal ñañ nlam ni radiô, i Kanada. I nwii 1924 ba bi yibil i radiô ini le CHUC i Saskatoon, Saskatchewan. I bé ikété biradiô bi bisu ba bi yibil i Kanada inyu mam ma base. Ipam i nwii 1925, i bé béda homa radiô nu a bé nkeñi iloo ha. Ha nyen i radiô i, i bi yila radiô i ntôñ, lôk kéé i kena yo i ndap ikeñi i ba bi somb, ba bôñgôl ki.

I radiô i, i bi boñ le ngandak bôt i i bé yééne i bon ba bitison ni i mambai ma Saskatchewan i nok ñañ nlam inyu ngélé yap bisu. Kiki hihéga, i tison yada i i yé haa ni homa radiô i bé, muda wada nu a bé yiba ngandak, jôl jé li bé le Graham, a bi emble nkwel mu radiô i, a tilna lôk kéé le ba éble nye bikaat. Mankéé George Naish a nkal le: “I ngéda a bi bat bés bikaat, di nôgda le a gwé toi ngôñ ni bañga i Nyambe. Jon di bi éble nye mbom u bikaat ba bé sébél le Étude des Écritures.” A bé a yii, a kahal añal ñañ nlam yak i bahoma ba bé haa.

DI BI KÔNDE NOK MALIGA

Nkum Ntat nu hilo 1 hi sôñ Matumb 1925, a bééna loñge yigil, ño wé u bé le “Naissance de la nation.” Inyuki i yigil i, i bé nseñ? Banigil Bibel ba bé yi le Satan a gwé ngim ntôñ i het mimbuu mimbe mi yé, kwéha base, bôt ba nyuñga, ni baane ba nkoñ ’isi. Ndi “nkol maliga ni u pék” u bi gwélél i yigil i inyu hôla lôk kéé i nok le yak Yéhôva a gwé ntôñ u u mpôna bé ntôñ u Satan to ndék sii. (Matéô 24:45) Nkol maliga ni u pék u bi toñol ki le Ane Nyambe i bi gwéé nyoo ngii i nwii 1914, ni le mu nwii u, gwét bi bi bôô nyoo ngii, ba luhul Satan ni mimbuu nwé mimbe, ba leñ bo hana ’isi.​—Masoola 12:​7-9.

Hala a bi lédél ngim lôk kéé i neebe biniigana bi. Inyu hala nyen i yigil i, i bi kal le: “Ibale bôt bahogi ba ba ñañ Nkum Ntat ba neebe bé i biniigana bini, di nti bo maéba le ba bem Nwet ikété nwee nyensôna, ba bôdôl nye ñem, ba kee ni bisu i boñ sômbôl yé.”

Tom Eyre, man loñ Ngisi, nu a bé nsañal ha ngéda i a bi toñol lelaa ngandak banigil Bibel i bi leege i yigil i, a nkal le: “Lôk kéé i bé maséé i ngéda ntôñ u bi toñol kaat Masoola 12. I ngéda di bi nok le Ane i ngwéé nyoo ngii, di bé maséé i añle bôt i nwin u ni makénd momasôna. Hala a bi boñ le di kônde ti ngéda yés i nson u Yéhôva di tehge lelaa Yéhôva a mboñ le mahol ma kônde ba i ntôñ wé.”

DI BI YI LE DI YÉ MBÔGI YÉHÔVA

Len, Mbôgi Yéhôva i mbéna gwélél bibañga bi yé i kaat Yésaya 43:​10, bi bi nkal le: “‘Ni yé mbôgi yem,’ hala nyen Yéhôva a mpot, ‘ñ, ngwélél wem nu me bi pohol.’” Ndi ilole di bé pam i nwii 1925, bikaat bi ntôñ bi bé pôdôl bé i nlôñ u ngandak. I mbus ngéda, mam ma bi héñha. I nwii 1925, Nkum Ntat a bi pôdôl kaat Yésaya 43:10 ni 12 ikété 11 gwigil!

I lisuk li sôñ Hikañ, nwii 1925, banigil Bibel ba bi ke i likoda li ndôn i Indianapolis, Indiana. Mu lipep li minkwel, Joseph F. Rutherford a bi tila le: “Di nlo hana i likoda li ndôn lini inyu boñ le . . . Nwet a lédés bés, le i ngéda di ntémb i mambai més, di kônde bana ngui i bok mbôgi inyu jôl jé.” Mu likoda li li bi nom dilo juem, lôk kéé i bi nok le ba nlama bok mbôgi inyu jôl li Yéhôva hiki ngéda pôla i nene.

I ngwa jôn, i hilo 29 hi sôñ Hikañ, Mankéé Rutherford a bi ti nkwel unu le “Appel à l’action.” Mu nkwel u, a bi unda le nson ñañ nlam u yé nseñ ngandak, a kal le: “Yéhôva a nkal bagwélél bé le . . . : ‘Ni yé mbôgi yem . . . me, me yé Nyambe.’ Ha nyen a bi pot ni makénd momasôna le: ‘Tega njel inyu loñ.’ Ndik i bet Yéhôva a nti mbuu wé bon ba nla toi bok mbôgi inyu yé inyule ba yé bôt bé.”​—Yésaya 43:12; 62:10.

I ngéda Mankéé Rutherford a bi mal ti nkwel u, a bi añ kaat yada, ño wé u bé le “Nwin u u nlona botñem,” i bé unda le ndik Ane Nyambe yotama yon i nla lona “nsañ, maséé, mbôô, niñ ilam, kunde ni niñ boga.” I mbus ngéda, ba bi kobol i kaat i ikété ngandak dilémb ba pémés ki yo inyu gwélél yo i likalô. Ba bi tjam yo bebee le 40 ma million.

Ngéda i bi tagbe jôga ilole banigil Bibel ba mbôdôl séblana le Mbôgi Yéhôva. Ndi ngéda i bé i tagbege, ba kôndge nok le ba nlama bok mbôgi inyu jôl li Yéhôva.

DI BI TÉMB I YUUGA BÔT BA BÉ GWÉS ÑAÑ NLAM

Banigil Bibel ba bé ngandak i nkoñ ’isi wonsôna, jon ntôñ u bi kal bo le ba nlama ndik bé kap bikaat, ndi ba témb yak i yuuga bôt ba bi bôk ba leege bo loñge. I ngéda ba bi mal kap i man lipep nunu le Nwin u u nlona botñem, i man kaat nunu le Bulletina a bi kal le: “Ni témb i yuuga i bôt ni bi bôk ni ti i man lipep nunu le Nwin u u nlona botñem.”

Bulletin i sôñ bisu, nwii 1925, i bé pôdôl jam nnigil Bibel wada i Plano, Texas a bi kal, nye: “Di yé nhelek i ngéda di ntehe le i bahoma di ma sal ngandak ngélé, bôt ba nleege bés loñge nyoo iloo i bahoma di nke inyu ngélé bisu. Di bi sal i man tison wada munu libôga jés letee ni ngélé itan inyu jôm li nwii ndigi. . . . Ndi to kekii, sita Hendrix ni mama yem ba bi témb ba ke nyoo, ba kap bikaat iloo ngéda bisu.”

I Panama, nsañal wada a bi tila le: “Ngandak bôt i i bi luhul me i mambai map lisañ li bisu, i bi leege me loñge i ngéda di bi témb nyoo ngélé yônôs iba tole ngélé yônôs aa. I nwii unu, libim li bôlô me nsal, li yé ndik le me témb i yuuga bôt me bi bôk me yuuga; mam ma mbéna tagbe loñge ngandak.”

DI NHOÑOL BISAI BI MBEM BÉS

I lisuk li nwii 1925, Mankéé Rutherford a bi tilna basañal kaat, a bi pôdôl nson ba bi sal mu nwii u, ni u ba bé lama sal mu nwii u bé noñ ha. A bi kal le: “Munu nwii unu, ni mbana bisai i lédés ngandak bôt i i nok ndutu. I nson u, u nkônha bé maséé . . . Mu nwii u nlo, n’a bana ngandak manjel i bok mbôgi inyu Yéhôva ni Ane yé, n’a éba le ni yé toi bagwélél bé. . . . Bésbobasôna di bédés makiñ inyu tubul Nyambe wés ni Kiñe yés tjémbi di bibégés.”

I lisuk li nwii 1925, lôk kéé i bé ôt minsoñgi inyu yi lelaa ba bé le ba kéñbaha Bétel i Brooklyn. I nwii 1926, ba bi bôdôl maoñ mape i nya ba bé ngi boñ letee ni ha ngéda i.