Yéhôva a nti bés ‘bañga maséé’

1-2. (a) Imbe ndutu ngandak bôt i mboma i len ini? (b) Kii d’a tehe munu yigil ini?

MUNU nkoñ ’isi unu, bôt ba yé bebee i boñ to kii inyu ba maséé. Ndi to ba mboñ lelaa, ba ta bé maséé. Ngandak bôt i nok ndutu, ba nhoñol yak le ba ta bé le ba ba maséé kekikel. Yak bés bagwélél ba Yéhôva, di nla bana i ndutu i. Di yé i “dilo di nsôk,” jon di nyi le ‘mangéda ma nla ba nledek kiyaga,’ hala a boñ le di nimis maséé.​—2 Timôtéô 3:1.

² Munu yigil ini, di ga tehe kii i nla boñ le di ba ha bañ maséé, ni kii i nla boñ le di témb di ba maséé. Ndi di béñge ndugi hee bañga maséé i nlôl.

NJEE A NLA TI BÉS BAÑGA MASÉÉ

3. I gwom Yéhôva a bi hek bi niiga kii bés? (Béñge yak bititii.)

³ Yéhôva a yé maséé hiki ngéda. A nsômbôl le yak bés di ba maséé. Inyu hala nyen a bi hek gwom kiki bo hisi hilam, ngandak minsonol, binuga bi bi ntuk, ni ngandak bijek bilam. Yéhôva a ngwés toi bés, a nsômbôl ki le di bana niñ ilam!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Tolakii Yéhôva a ntehe mandutu momasôna ma yé munu nkoñ ’isi unu, kii i mboñ le a ba maséé? (b) Limbe likébla Yéhôva a nti bés? (Tjémbi 16:11)

⁴ Yéhôva a yé “Nyambe nu maséé,” ndi a ntehe mandutu momasôna ma yé munu nkoñ ’isi. (1 Timôtéô 1:11) To hala, mandutu a ntehe ma mboñ bé le a nimis maséé mé. A nyi le i mandutu ma m’a mal ndék ngéda, a bi mal téé hilo inyu mélés mo. A nhônba letee a mélés mandutu momasôna. Ndi inyu nano, Yéhôva a ntehe mandutu més, a gwé ki ngôñ i hôla bés. Lelaa a nhôla bés? Jam li bisu, a nti bés bañga maséé. (Añ Tjémbi 16:11.) Di béñge lelaa a bi ti Yésu likébla li.

5-6. Inyuki Yésu a yé maséé?

⁵ Yésu a yé maséé iloo bôt bobasôna Yéhôva a bi hek. Inyuki? Di béñge mam ima. (1) “A yé pôna i Nyambe nu a nene bé,” a yé kiki Isañ, jon yak nye a yé maséé. (Kôlôsé 1:15) (2) Yésu a bi niñ ngandak ni Isañ nu a yé lingen li bañga maséé.

⁶ Yésu a yé maséé inyule hiki ngéda, a mboñ i mam Isañ a mbat nye le a boñ. (Bingéngén 8:​30, 31; Yôhanes 8:29) Kiki a ngwélél Yéhôva ni ñem wé wonsôna, jon a nlémél nye.​—Matéô 3:17.

7. Kii i nla toi kônha bés maséé?

⁷ Yak bés di nla toi ba maséé ibale di nkôôge bebee ni Yéhôva, lingen li maséé. Kiki di nkôôge bebee ni Yéhôva, di niglege nye, hala nyen di nkônde ba maséé. Ni ki le i ngéda di mboñ sômbôl i Djob di yik le di nlémél nye, hala a nkônha bés maséé.a (Tjémbi 33:12) Ndi kii i nla hôla bés ibale ngim mangéda, di nôgda le di ta bé maséé? Ibale hala a mpémél bés, wee di nlémél ha bé Yéhôva? To! Kiki di bi gwééne ikété béba, jon di nok ndutu. Di nla bana nduña tole kon u mahoñol ngim mangéda. Yéhôva a nyi hala. (Tjémbi 103:14) Di béñge mam ma nla boñ le di ba ha bañ maséé, ni kii i nla hôla bés le di témb di kahal kon maséé.

U NWAS BAÑ LE JAM JO KI JO LI SÔÑA WE I BA MASÉÉ

8. I ngéda di mboma mandutu, kii di yé le di nôgda?

⁸ Jam li bisu: Mandutu. Bebek, bôt ba ntééñga we inyule u ngwélél Yéhôva. U nla ki kôs ndutu inyule bikuu bi nkwél we, liyep li ntééñga we, kon tole biuni. I ngéda di mboma i nya mandutu i, bun bé le di ba maséé, téntén i ngéda di nla bé héñha jam jo ki jo. Bibel i ñunda yaga le “njôghe ñem i nlona kon u mahoñol.” (Bingéngén 15:13) Hala a bi pémél mañ wada le Babis. I mbus ndék ngéda ndigi, mpom wé manyañ nu munlôm nu mañ ni bagwal bé ba bi wo, a nkal le: “Me bé nôgda binyuu, me hoñlak le mut a ta bé le a hôla me. Ngim mangéda nduña i bé i nai me inyule ilole bagwal bem ni mankéé ba nwo, me bééna ngôñ i ba ni bo hiki ngéda, ndi me bé la bé.” Yak bés, ngim mangéda, mandutu ma nla wéés bés, ma tômbôs ki bés.

9. Kii i nla boñ le di témb di kahal kon maséé? (Yérémia 29:​4-7, 10)

⁹ Kii i nla boñ le di témb di ba maséé? Ibale di ntôñ bé inyu mam di nla bé héñha, di tinak Yéhôva mayéga inyu mam di gwé, di ntémb di ba maséé. Munu nkoñ ’isi unu, bôt ba nhoñol le mut a nlama bana mam momasôna inyu boñ le a ba maséé. Ndi hala a ta bé maliga. Kiki hihéga, Yéhôva a bi kal bon ba Israel ba ba bé i minkôm i Babilôn le ba kon maséé ni mam ba bééna nyoo, a bi kal ki bo le ba boñ kii yosôna ba nla inyu ba maséé to hala kiki ba bé ikété ndutu. (Añ Yérémia 29:​4-7, 10.) Hala a niiga kii bés? Di kon maséé ni mam di gwé, di tinak Yéhôva mayéga. Di hôya bañ le Yéhôva a yé bebee i hôla bés. (Tjémbi 63:7; 146:5) Effie nu a bi boñ accident, a kwo bôk, a nkal le: “Yéhôva a bi hôla me ngandak, yak bôt bem ba lihaa, ni lôk kéé. Inyu hala nyen me bi kal le ibale me nsomol, wee me nyi bé ti mayéga. Me gwé ngôñ i ti Yéhôva mayéga ni lôk kéé inyu ngandak yap mahôla.”

10. Inyuki di yé le di ba maséé to ibale di mboma mandutu?

¹⁰ To niñ i nlet lelaa, to mandutu ma nai, di nla ba maséé.b (Tjémbi 126:5) Inyuki? Inyule to kii di mboma mu niñ yés, Yéhôva a nla hôla bés i ba maséé. Nsañal wada le Maria a nkal le: “I ngéda u yé maséé, to u mboma mandutu, hala a nkobla bé le u ñee bé tole hala a ntééñga bé we. Ndi hala a nkobla le u nhoñol mam momasôna Yéhôva a mbôn bés. Tata wés le Yéhôva a yé bebee i hôla bés i ba maséé to ibale di nok ndutu.” Di hôya bañ le to niñ i nlet lelaa, mandutu més ma yé ndik inyu nano. Ndék ngéda, Yéhôva a ga mélés mam momasôna ma mboñ le di nok ndutu.

11. Lelaa ndémbél i ñôma Paul i nla hôla bés?

¹¹ Ibale di nhoñol le kiki di nok ndutu, wee di nlémél ha bé Yéhôva, kii i nla hôla bés? Di hoñol bagwélél ba Yéhôva bahogi ba ba bi boma ngandak mandutu. Di pôdôl le ñôma Paul. Yésu nyemede nyen a bi ep nye i añal ñañ nlam “i biloñ bipe, i bisu bi bikiñe lôñni bon ba Israel.” (Minson mi baôma 9:15) Kinje bisai! Ndi Paul a bi boma ngandak mandutu. (2 Korintô 11:​23-27) Baa a bi boma mandutu inyule a bé lémél bé Yéhôva? To jam! Ngo kiki a bi hônba mandutu ma, hala a bi unda le a bé lémél Yéhôva. (Rôma 5:​3-5) Baa yak we u mboma mandutu? Kii i nhôla we i hônba mandutu ma momasôna? U nhônba mo inyule u nlémél Yéhôva.

12. Kii di yé le di nôgda ibale di nsômbôl boñ jam ndi di la bé?

¹² Jam li yônôs iba: I ngéda di mbem jam ndi li lo bé. (Bingéngén 13:12) Di gwé ngôñ i boñ mam i ntôñ u Yéhôva inyule di ngwés Yéhôva, di gwéhék ti nye mayéga. Ndi ibale di nai ndik le di mboñ jam, bésbomede di yik le di nla bé boñ jo, hala a nla tômbôs bés. (Bingéngén 17:22) Nsañal wada le Holly a nkal le: “Me bé sômbôl ke i Suklu baañal ñañ nlam, me kee i hôla i loñ ipe, tole me kee i sal i maoñ ma Ramapô. A bé a yii, mam ma héñha i niñ yem, me bé ha bé le me boñ i mam ma momasôna. Hala a bi tééñga me ngandak. I ngéda u nsômbôl boñ mam i ntôñ u Yéhôva, ndi u la bé, hala a yé ndutu ngandak!” Hala a yé le a pémél bésbobasôna,.

13. Ibale mam ma nhéñha i niñ yés, kii di yé le di boñ?

¹³ Kii i nla boñ le di témb di ba maséé? Di hôya bañ le Yéhôva a nla bé bat bés le di boñ jam li li nloo bés. I mam di mboñ i ntôñ wé, mo bé mon ma ñunda nseñ wés. Yéhôva a nsômbôl ndik le di gwélél nye ni ñem wés wonsôna, yak ni suhulnyuu. (Mika 6:8; 1 Korintô 4:2) Ñem wés won a mbéñge, he ngandak yés minson bé. Baa di nlama yéñ begee mbegee Yéhôva nyemede a ta bé le a bééga bés?c Di boñok bañ hala. Jon ibale mam ma nhéñha i niñ yoñ, boñ mam u nla boñ i nson u Yéhôva. Baa u nla hôla boñge ba wanda i hol tole u nla lédés mimañ mi bôt? Baa u yé le u yoñ makidik le u nke i yuuga mut i mbai yé, u sébél nye i téléfôn tole u tilna nye inyu lédés nye? Ibale u mboñ i mam ma, Yéhôva a ga boñ le u bana bañga maséé! Bigda ki le ndék ngéda i mbok yondo, di ga bana ngandak minson, minson di ta bé le di hégda nano. I jam li jon li bi hôla Holly, nu di mbôk di pôdôl, a nkal le: “I ngéda me nyén, me nhoñol le ngo me ga niñ i boga ni boga. Ni mahôla ma Yéhôva, me ga boñ i mam me nla bé boñ nano i mbok yondo.”

14. Kii ipe i nla boñ le di ba bañ maséé?

¹⁴ Jam li yônôs 3: I ngéda di ngwés di ntuk niñ. Bôt bape ba ntôô mu internet le inyu boñ le mut a ba toi maséé, a nlama ndik tôñ nyemede. Ba nla tinde bés i hoñol le i mam ma yé toi nseñ ma yé mintuk, i somb ngandak gwom, ni i ke i bahoma bape. Jam libe to jada li ta bé mu. Yéhôva a bi hek bés le di kon maséé ni mam malam. Ndi ngandak bôt i bi yimbe le i mam ba bé hoñol le ma ga lona bo maséé ma mboñ le ba ba bañ maséé. Nsañal wada le Eva a nkal le: “I ngéda u ntôñ ndik wemede, u ta bé le u ba maséé.” I ngéda di ntôñ ndik inyu yés, hala a nlona bés nduña ni wonyuu.

15. Kii ñañ u Kiñe Salômô u niiga bés?

¹⁵ Ñañ u Kiñe Salômô u niiga bés le i ngéda mut a ntôñ ndik nyemede, lisuk jé li yé libe. A bi yéñ ba maséé ni gwom kiki bo bijek bilam, tjémbi dilam, ni i gwom gwobisôna mut a gwé moni a bé le a kôhna ha ngéda i. Ndi to hala, a bé bé maséé. A bi kal le: “Jis li nwaa bé tehe; to ôô u nwaa bé nok.” (Ñañal 1:8; 2:​1-11) Bôt bape ba nhoñol le ibale ba gwé moni, ba boñok kii yosôna ba ngwés ni i moni mi, ha nyen ba ga ba maséé ndi maliga bé ma. I nya niñ i, i nlona toi bé bañga maséé.

16. Inyuki di yé maséé i ngéda di nhôla bôt bape? (Béñge yak bititii.)

¹⁶ Kii i nla boñ le di témb di ba maséé? Yésu a bi kal le “Ti i nlona maséé iloo kôhna.” (Minson mi baôma 20:35) Mañ wada le Alekos a nkal le: “Me mbéna bôñôl bôt disii di mam. I ngéda me nhôla bo, me nhôya mandutu mem, me yé toi maséé.” Kii u yé le u bôñôl bôt bape? I ngéda u ntehe mut a nok ndutu, kôôge nye bebee, u lédés nye. Bebek u nla bé mélés ndutu yé, ndi ibale u ñemble nye, u kônôl nye ngoo, u unda le u nok nye, u kal ki nye le a bééga Yéhôva mbegee yé, hala a ga lédés nye. (Tjémbi 55:22; 68:19) U nla ki hôla nye i nok le Yéhôva a nhôya bé nye. (Tjémbi 37:28; Yésaya 59:1) U nla yak hôla nye i boñ mam mape. Kiki hihéga, u nla lémbél nye bijek, tole u nla ke i minhiômôk ni nye. Pam ni nye i likalô, hala a ga kônha nye maséé ngandak. Nwas le Yéhôva a gwélél we inyu hôla bôt bape. Ibale di nhôla bôt bape iloole di tôñ ndik bésbomede, ha nyen d’a ba toi maséé!​—Bingéngén 11:25.

17. Ibale di nsômbôl toi ba maséé, kii di nlama boñ? (Tjémbi 43:4)

¹⁷ Ibale di nke ni bisu i tiige bebee ni Yéhôva, ha nyen di ga ba toi maséé. Bibel i ñunda yaga le Yéhôva a yé “maséé [més] ma mbuma ñañ.” (Añ Tjémbi 43:4.) To imbe ndutu di mboma, di nla ba maséé. Jon di kee ni bisu i gwélél Yéhôva inyule nyetama ndik nyen a nla ti bés bañga maséé!​—Tjémbi 144:15.