Kiññem i nkéés me​—Baa Bibel i nla hôgbaha me?

Ndimbhe i Bibel

Ñ! Bibel i nla ti bés maéba malam inyu boñ le kiññem i nkéés ha bañ bés. (Tjémbi 32:1-5) Ibale di mboñ jam libe ndi di tam jo, Djob a nla nwéhél bés, a hôgbaha ki bés. (Tjémbi 86:5) Bibel i ñunda le, ngim mangéda hala a yé loñge i ngéda kiññem i nkéés bés, hala a nhôla bés i tam béba yés, ni le di kwo ha bañ mu béba i. (Tjémbi 51:17, MN; Bingéngén 14:9) Ndi Bibel i nti ki bés maéba le kiññem i lôôha bañ kéés bés, kayéle di kahal hoñol le di nla ha bé lémél Djob tole di kôli bé ni nwéhél yé. I nya mahoñol i, i nla boñ le di ‘bana ndutu ñem iloo hihéga.’​—2 Korintô 2:7.

• Mambe mam ma nla boñ le kiññem i kéés bés?

• Lelaa me nla boñ le kiññem i kéés ha bañ me iloo hihéga?

• Minlôñ mi Bibel mi mi mpôdôl kiññem ni nwéhél

Mambe mam ma nla boñ le kiññem i kéés bés?

Ngandak mam i nla boñ le kiññem i kéés mut. Kiki hihéga, di nla babaa ngim mut di ngwés, tole di boñ bé ngim jam di lamga boñ. Ngim mangéda, kiññem i nla kéés bés ndi ki le di mboñ bé jam libe. Kiki hihéga, ibale di nkit le di mboñ jam li li nloo bés ntel, kiññem i ga kéés bés yañga hiki ngéda i jam li li nai bés i boñ. Inyu hala nyen Bibel i nti bés makénd le hiki mut a kéi bôt i ntel wé.​—Ñañal 7:16.

Lelaa me nla boñ le kiññem i kéés ha bañ me iloo hihéga?

U nwas bañ le kiññem i lôôha kéés we kayéle u lehel ñem, ndi boñ biliya le u kôhna hogbe. Lelaa?

• Neebe dihôha tjoñ. Soohe Yéhôva,a bat nye le a nwéhél we. (Tjémbi 38:18, MN; Lukas 11:4) U nla ba nkwoog nkaa le Djob a ga emble masoohe moñ ibale u mpahal béba yoñ, u tam yo, u tjôô ki yo. (2 Miñañ 33:13; Tjémbi 34:18, MN.) Maselna ni bôt ba binam, Nyambe nye, a ñañ miñem. Ibale di mboñ biliya i tjôô lem ibe, Djob a ntehe, “a téé ki sép inyu nwéhél bés bibéba gwés ni pubus bés inyu ngitelepsép yosôna.”​—1 Yôhanes 1:9; Bingéngén 28:13.

  I yé maliga le ibale u mboñ mut béba, u nlama neebe hala, u bat ki nye nwéhél. Hala a ntomb bé! I nsômbla ñem ngui ni suhulnyuu. Ndi ibale u mbat nwéhél ni ñem woñ wonsôna, hala a ga lona we mam malam ima: Pog, u nhéya mbegee ikeñi i bituu gwoñ, u kôp ki nsañ ni manyuñ.​—Matéô 3:8; 5:23, 24.

• Soñda minlôñ mi Bibel mi mpôdôl nwéhél i Djob. Kiki hihéga, béñge 1 John 3:19, 20. Bibel i nkal mu nlôñ u le “miñem nwés mi yé le mi ôm bés nsohi,” hala wee kiññem i nla kéés bés iloo hihéga, bebek le di kahal hoñol le di kôli bé ni nwéhél i Djob. Ndi nlôñ u, u nkônde le “Nyambe a nloo miñem nwés.” Hala a nkobla le kii? Hala a nkobla le a nyi bés loñge loñge, a ntibil yak yi mahoñol més ni bibomb gwés.” A nyi le di bi gwéé, di bak kwéha, ni le ñem u ntinde bés i boñ mam mabe.b (Tjémbi 51:5, MN) Inyu hala nyen a ntjôô bé i mut a mboñ béba, ndi a tam yo.​—Tjémbi 32:5.

• Mahoñol ma tééñga ha bañ we mu dihôha u bi boñ kôba. Bibel i mpôdôl bôlôm ni bôda ba ba bi boñ mam mabe, ndi i mbus ngéda ba héñha. Di yoñ hihéga hi Saulô, mut Tarsô, nu a bi sôk a yila ñôma Paul. I ngéda a bé Farisai, a bi tééñga banigil ba Yésu ngandak. (Minson 8:3; 9:1, 2, 11) Ndi i ngéda a bi yi le Djob bo Mésia tole Kristô bon a yé i kolba, a tam béba yé, a héñha, a yila loñge i kristen. I yé maliga le Paul a bé hoñol mam mabe a bi boñ kôba, ndi a bi nwas bé le ma tééñga nye kayéle a la bé gwélél Djob. Paul a bé nkwoog nkaa le Djob a nwéhél nye, jon a bi yila ñañal ñañ nlam, a bi nimis bé to botñem yé i niñ boga.​—Filipi 3:13, 14.

Minlôñ mi Bibel mi mi mpôdôl kiññem ni nwéhél

Yérémia 31:34: “M’a nwéhél biyôgda gwap, m’a bigda ha bé ki to béba yap.”

Ndoñi: I ngéda Djob a mal nwéhél bés, a ntémb ha bé mu dihôha di. A nsas béba ngélé yada inyu ngélé yosôna.