Njee a ga tohol hisi?

Ngandak bôt i nkon woñi i ngéda i ntehe lelaa bôt ba binam ba ñôbôs hisi ni bihégél bi yé mukété. Ngim bayimam i nkal le maboñok ma bôt ba binam ma yé i tjé bihégél, ni le ngim binuga ni ngim bie bi bi bé behee, mut a nla ha bé tehe gwo i len ini.

Baa bôt ba binam ba ga ôbôs hisi? Tole ba ga nigil i niñ i nya i i ñôbôs bé mbok to hisi?

Baa bôt ba binam ba ga pam i sôñ hisi?

Ngim bayimam i yé nkwoog nkaa le mut binam a nla sôñ hisi, a niñ ki ibabé i tjé binuga to ôbôs mbok. Ndi bôt ba nyiña bape ba nkal le, inyu boñ le i nya jam i i bôña, bôt bobasôna hana nkoñ ’isi ba nlama héñha bilem, ba bana bilem kiki bo:

• I yi bôñgôl minkoñ ni mapan ni mambok ma malép ni batuye.

• I héñha makeñge di ngwélél inyu sal ’isi ni inyu bana courant.

• I héñha je wés kayéle di bôdôl je bikai ngandak ,di jek ndik nuga ni tjobi ndék, di waa ki ôbôs bijek.

• Di nlama ki nok le niñ ilam i ta bé ndik le di bana ngandak nkus.

We u ntehe lelaa? Baa u nhoñol baane ni bôt ba nyuñga ni bôt bobasôna yaga ba ga nôgla inyu sôñ hisi, ki le ba mpam bé i boñ hala ipam nano? Tole u nhoñol bôt ba ga pam bé i sôñ hisi inyule ngandak bôt i gwé huluk ñem, i nima, i ntôñ bé to lelaa mam ma ga ba yani?​—2 Timôtéô 3:1-5.

Botñem i yé

Bibel i nkal bés le hisi hi ga tjiba bé, i ntoñle bés inyuki biliya bi mut binam bi kôli bé inyu sôñ hisi, i nkal ki bés i mahéñha ma nlama bôña ni lelaa ma ga bôña.

Inyuki biliya bi bi mut binam nyetama bi nla bé sôñ hisi? Yéhôvaa nyen a bi hek hisi, a ti hio mut binam le a bôñgôl hio. (Bibôdle 1:28; 2:15) Mut binam a bé le a yônôs nson wé ibale a nôgôl Nhék wé, a noñ ki maéba mé ni biniigana gwé. (Bingéngén 20:24) Ndi iloole ba boñ hala, bôt ba binam ba bi ndogbene Yéhôva, ba noñ manjel mabe. (Ñañal 7:29) Inyu hala nyen bôt ba binam botama ba nla bé bôñgôl hisi, to ba mboñ biliya lelaa, ba ga pam bé i boñ hala.​—Bingéngén 21:30; Yérémia 10:23.

I mahéñha ma nlama bôña. Nyambe a ga nwas bé le bôt ba binam ba tjé hisi. (Masoola 11:18) A lémés bé to biane, to bôt ba binam ba ñôbôs hisi, ndi a ga héñha bo. (Masoola 21:1) Inyu hala nyen Yéhôva a nkal le: “Nuna-ki! Me mboñ mam momasôna yondo.”​—Masoola 21:5.

Lelaa mam ma ga héñha. Yéhôva a ga héya biane bi bôt ba binam, a téé ane i i nlôl i ngii, yon ba nsébél le ane Nyambe. Yésu nyen a ga ba kiñe mu ane i, nyen a ga kena mam hana ’isi.​—Daniel 2:44; Matéô 6:10.

Ane Djob i ga niiga bôt i niñ inoñnaga ni mambén ma telepsép ma Nyambe. I ngéda bôt ba binam ba ga emble Nhek wap, ba noñok ki maéba mé, ba ga niñ ibabé le ba ôbôs mbok, to hisi. (Yésaya 11:9) Bibel i ntoñle bés le ane Djob i ga hôla bôt ba binam i bana niñ ilam, i hôla ki bo i niñ ibabé i ôbôs hisi. I mam mana mon ane Djob i ga boñ:

• I ga ti bôt bobasôna bijek.​—Tjémbi 72:16.

• I ga bôñgôl minkoñ nwominsôna le mi ba minlam.​—Yésaya 35:1, 2, 6, 7.

• I ga boñ le bôt ba binam ba tééda binuga, yak binuga bi boñ bañ mut binam béba.​—Yésaya 11:6-8; Hôséa 2:18.

• I ga gwel bikuu bikeñi kiki bo nyeñg disi, le bi kwél bañ bôt ba binam.​—Markô 4:37-41.

Di nla ba nkwoog nkaa le ane Djob i ga lona mahéñha mana. Ibale u gwé ngôñ i kônde nigil mam, añ i yigil ini le “Imbe ngéda Ane Djob i ga énél hisi?”