Bôt ba yé tjé hisi hiés​—Kii Bibel yo i nkal?

“Maboñok més ma yé boñ le ngéda i yé bep ôbi. Malép ma yé hô bitison gwés bikeñi. Lék i nai i nya di bé ngi tehe. Bambuk mbebi ba nlôôha bana ngui. Malép ma nyo ma yé hañ ni nkoñ ’isi wonsôna. Didun di mintén mi bibelela ni mi binuga, nya ndi nya, di mal tjiba. Njôha bé u. Njoñ yi i ñunda le bikuu bini bi yé ntiik, bi nlôl i makidik ma baéga biloñ, mu ligwéélak jap li malektrik ni belesin.”​—Bipôdôl bi Sañgô Antonio Guterres, ñéga Adna i biloñ (ONU), i mbus le bayiman inyu mahéñha ma ngéda ba bi pémés ñañga wap, i hilo 4 hi sôñ Matôp, nwii 2022.

“Bôt ba njoñ yi ba nkal le mu nwii mi nlo, bebee le i 423 i mapan momasôna ma ngomin, i loñ Amérika, ma nke i ôbi inyu ngandak lék tole ngandak lisuni. Bikuu bi ga pémél mapan ma, bi ga pôna bikuu Bibel i mpôdôl: hié ni banop bakeñi, maaa ma as ma ma ga nyimbi, batuye ba ga hôl, ni ngandak lék.”​—“Ntida malép i tison i Yellowstone, yimbne i bikuu bi yé njel,” The New York Times, 15 Hilônde, 2022.

Baa mut a nla sôñ hisi le hi tjiba bañ? Ibale ñ, njee a nla mélés bikuu bini? Di tehe yom Bibel i nkal.

Bibel i bi kal le bôt ba bé lama ôbôs hisi

Bibel i nkal le Djob a ga “lona tjiba i ngii bôt ba ñôbôs hisi.” (Masoola 11:18) Unu nlôñ Bibel u niiga bés mam maa:

1. 1. Maboñok ma bôt ba binam ma bé lama ôbôs hisi.

2. 2. Bôt ba ga obôs bé hisi mba ni mba.

3. 3. Djob nyen a ga sôñ hisi hiés, he bôt ba binam bé.

Dilo dilam di mbem hisi hiés

Bibel i nkal le “hisi hi nom i boga ni boga.” (Ñañal 1:4) Bôt ba ga niñ mu mba ni mba.

•  “Bôt ba téé sép ba ga kôdôl hisi, ba niñ ki mu i boga ni boga.”​—Tjémbi 37:29.

Hisi hi ga témbna mbôô wé kiki i bibôdlene.

•  “Ñoñ ni nnumuk nkoñ bi ga kon maséé, yak tegep ñoñ i ga kon maséé, i ti ki mbônji bikai.”​—Yésaya 35:1.