Bañga botñem inyu dilo di nlo
Baa u nhoñol le dilo di nlo di ga lona mam malam? Ngandak bôt i nhoñol hala, to hala kiki mandutu ma yé nayak i len ini. Ndi baa di kôli toi hoñol le mam ma ga lama hana nkoñ ’isi? Ñ! Bibel i nti bés bañga botñem inyu dilo di nlo.
Mambe mam malam Bibel i mbôn bés?
Bibel i niiga le bôt ba binam ba mboma ngandak mandutu. Ndi i mbôn le i mandutu ma, ma ga tééñga bé bés i boga ni boga. Di yoñ ndék dihéga.
Ndutu: Ngandak bôt i gwé bé mandap
I jam Bibel i mbôn: “B’a oñ mandap, ba yén ki mu; b’a bel nwom mi minkôô mi wai, ba je ki matam map.”—Yésaya 65:21.
Kii hala a nkobla inyu dilo di nlo? Hiki mut a ga bana yé ndap.
Ndutu: Bibôlô bi ta bé, liyep li bak
I jam Bibel i mbôn: “Mintebek nwem mi bôt ki nw’a togbene minson mi moo map ntandaa ngéda.”—Yésaya 65:22.
Kii hala a nkobla inyu dilo di nlo? Bôt bobasôna ba ga bana niñ ilam, ba konok maséé, ba ban-ga bôlô i i nkônha bo maséé.
Ndutu: Ngitelepsép i yé
I jam Bibel i mbôn: “Dikoo di mbok d’a bagal minkaa ni mbagi sép.”—Yésaya 32:1.
Kii hala a nkobla inyu dilo di nlo? Ba ga todol ha bé mut inyu kôgôô yé nyuu, tel yé, tole inyule a yé liyep. Mam momasôna ma ga bôña ni telepsép.
Ndutu: Béba je ni njal
I jam Bibel i mbôn: “Bijek bi ga ba ni hisi hiosôna; bi ga yamb mayoo i ngii dikôa.”—Tjémbi 72:16.
Kii hala a nkobla inyu dilo di nlo? Bôt bobasôna ba ga bana bijek bilam, bi bak ki ngandak. Mut nye ki nye a ga nañal bé njal, to kwo kon inyule a nje bé loñge.
Ndutu: Manola ni bisañ
I jam Bibel i mbôn: “B’a yén ’isi, hi mut isi nkôô wé wai, ni isi e yé faigé. Mut nye ki nye a ga kônha bé bo woñi.”—Mika 4:4.
Kii hala a nkobla inyu dilo di nlo? Hiki mut a ga ba nwee ibabé jam jo ki jo li li nkônha nye woñi, inyule bibéba bi bôt bi ga ba ha bé; ndi “bôt ba téé sép b’a kôdôl hisi.”—Tjémbi 37:10, 29.
Ndutu: Gwét
I jam Bibel i mbôn: “Loñ y’a mañgle ha bé loñ ipe pansoñ, to jôp yigil gwét.”—Yésaya 2:4.
Kii hala a nkobla inyu dilo di nlo? Nsañ u ga ba ni hisi hiosôna. (Tjémbi 72:7) Mut nye ki nye a ga ee ha bé mut nu a ngwés inyule a nôla i gwét, mut nye ki nye a ke ha bé to gwét ngwéé.
Ndutu: Makon ni dimala
I jam Bibel i mbôn: “Mut nye ki nye a nyééne mu nkoñ a’ kal bé le: ‘Me nkon.’”—Yésaya 33:24.
Kii hala a nkobla inyu dilo di nlo? Bôt ba ga nok ha bé ndutu inyule ba nkwo bôk tole ba nkwo kon. (Yésaya 35:5, 6) Bibel i mbôn yak le “nyemb y’a ba ha bé.”—Masoola 21:4.
Ndutu: Bôt ba ñôbôs hisi
I jam Bibel i mbôn: “Ñoñ ni biték binumnga gw’a séé, mbamba mbok w’a hak, u too ki wengoñle lilañ.”—Yésaya 35:1.
Kii hala a nkobla inyu dilo di nlo? Hisi hiosôna hi ga yila paradis, bôt ba binam ba yééne ki mu kiki Nyambe a bi bôn ibôdôl i bibôdle.—Bibôdle 2:15; Yésaya 45:18.
Baa i mam Bibel i mbôn bés ma ga yon?
Di nla kal le ma ga yon, ndi di nti bé makénd i wan i jam Bibel i mpot inyu dilo di nlo. Inyuki? Inyule mimbônga mi yé ikété Bibel mi yé maselna ni mimbônga mi bôt ba binam. Mimbônga mi Bibel mi nlôl yak Nyambe. I mam mana mon ma ñunda maselna ipôla mimbônga mi Bibel ni mimbônga mi bôt ba binam:
Di kôli bôdôl Nyambe ñem. Bibel i nkal le Nyambe “a nla bé tembee.” (Titô 1:2) Ni ki le Nyambe nyetama nyen a nla añle bés i mam ma ga bôña i dilo di nlo. (Yésaya 46:10) Bibel i gwé ngandak dihéga di di ñunda le i mam Nyambe a mpot inyu dilo di nlo ma ga yon ndigi. Inyu kônde nigil i jam li, béñge vidéô le Kii i nyis bés le Bibel i mpot maliga?
Nyambe a gwé ngap i mélés mandutu més. Bibel i nkal le Nyambe a gwé ngui i boñ ‘to kinje jam li nlémél nye.’ (Tjémbi 135:5, 6) Hala a nkobla le jam jo ki jo li nla bé kéñ nye njel i yônôs mimbônga nwé. Jam lipe li yé le, Nyambe a gwé ngôñ i hôla bés inyule a ngwés bés.—Yôhanes 3:16.
Ndi di nla badba le: ‘Ibale Nyambe a nsômbôl hôla bés, a ban-ga ki ngui i hôla bés, inyuki ni di ngi nogok ndutu?’ Inyu timbhe i mbadga i, béñge i vidéô ini le Inyuki Djob a nwas mandutu?
Lelaa i mam Bibel i mbôn bés ma ga yon?
Nyambe a ga gwélél Ane yé i i yé i ngii, inyu yônôs mimbônga nwé. A bi téé Yésu kiñe mu Ane i. A ti ki nye kunde i énél hisi ni i yoñ ngéda ni bôt ba nyééne mu. I ngéda Yésu a bé hana ’isi, a bi tibil bakokon, a ti bôt bijek, a gwel yak mbebi le i nol bañ bôt. A tugul bawoga. (Markô 4:39; 6:41-44; Lukas 4:40; Yôhanes 11:43, 44) A bi boñ i mam mana inyu unda i mam a ga boñ i ngéda a mba kiñe i Ane Nyambe.
Béñge i vidéô ini le Kii i yé Ane Djob? inyu kônde yi kii Ane Djob i ga boñ inyu yoñ.
Imbe ngéda i mam Bibel i mbôn ma ga yon?
Ma ga yon ndék ngéda! Kii i nkwés bés nkaa hala? Bibel i bi ti ngim yimbne i i ga unda le Ane i yé bebee ni bôdôl énél nkoñ ’isi. (Lukas 21:10, 11) I mam ma mbôña len i nkoñ ’isi, ma ñunda le i yimbne i i yé i yon.
Inyu kônde nigil i jam li, añ nkwel unu le “Imbe ngéda Ane Djob i ga énél hisi?”
Lelaa mimbônga mi Bibel mi nhôla bés i len ini?
Ntila Bibel wada a nhégha i botñem Bibel i nti ni “hikoba hi sitima.” (Lôk Héber 6:19) Kiki hikoba hi ngwel sitima le i ndeñg bañ, mimbônga mi Bibel inyu dilo di nlo mi nhôla bés le di nihbe mandutu di mboma i len ini. Mimbônga mi, mi nhôla bés le di bana ñem nwee, di ba ki maséé. Mi nhôla ki bés i ba mbôô.—1 Tésalônika 5:8.