Ruslan a nleñ loñ Ukren gwét

I maye ma kel ma hilo 24 hi sôñ Matjel, nwii 2022, loñ Ruslan i bi leñ loñ Ukren gwét, tolakii baane ba nkoñ ’isi ba bi boñ biliya bi ngui inyu keñgle gwét bi. Ikepam limbe likala i gwét bi bi yé tihba nkoñ ’isi? Ndék dilo ilole i gwét bini bi mbôô, sañgô António Guterres, nkena mam nu Adna i biloñ (ONU), a bi kal le: “Di nla bé hégda ndutu ni bikuu gwét bi bi ga lona i Éurôpa ni i nkoñ ’isi wonsôna.”

Inoñnaga ni Bibel, kii i nya mam ini i nkobla?

• Yésu Kristô a bi bôk pot le, ngim ngéda i ga ba le “loñ y’a telep ikolba loñ, yak ane i kolba ane.” (Matéô 24:7) Inyu nok inyuki Bibel i nkal le gwét bi ngéda yés bi nyônôs mbañ i Yésu, béñge nkwel unu ni hop Pulasi le “Quel est le signe des ‘derniers jours’, ou ‘temps de la fin’ ?”

• Inyu pôdôl gwét, kaat Masoola i ngwélél titii i nkilhosi a yii i ngii hosi, “i kôibak kiki hié,” a ban-ga kunde “i héya nsañ hana ’isi.” (Masoola 6:4) Inyu yi lelaa gwét bi ngéda yés bi nyônôs ini mbañ i Bibel, béñge nkwel unu le, “Les cavaliers de l’Apocalypse : qui sont-ils ?”

• Kaat Daniel i bi pôdôl pémsan i ga ba i pôla “kiñe ñombok” ni “kine nwelbok.” (Daniel 11:25-45) Inyu nok inyuki di nkal le Ruslan ni biloñ bi nit nye, ba yé kiñe ñombok,a béñge vidéô ini le, Mbañ yada i i bi yon​—Daniel Pes 11.

• Yak kaat Masoola i mpôdôl “gwét bi hilo hikeñi hi Nyambe Nu ngui yosôna.” (Masoola 16:14, 16) Gwét bi, bi ga ba bé kiki gwét bi yé bi ba ipôla biloñ, kiki bi bi yé tagbe hanano. Inyu yi mam mape mu gwét bi, béñge nkwel unu le, “Qu’est-ce que la bataille d’Armaguédon ?”

Inyuki di nla tééda botñem inyu dilo di nlo?

• Bibel i nkal le Djob a ga “mélés gwét i nkoñ ’isi wonsôna.” (Tjémbi 46:9) Inyu yi mam mape mu mam Djob a mbôn i dilo di nlo, béñge nkwel unu le, “Bañga botñem inyu dilo di nlo.”

• Yésu a bi niiga banigil bé i soohe le Ane i Djob i lo. (Matéô 6:9, 10) I Ane i, i yé ngim énél i i ntééba nyoo ngii, yon i ga boñ le sômbôl Djob i bôña hana ’isi, le nsañ u ba ikété nkoñ ’isi wonsôna. Inyu yi bisai u nla kôhna ni njel Ane i Djob, béñge ini vidéô le, Kii i yé Ane Djob?

I loñ Ukren, Mbôgi Yéhôva i nlel 129 000 bôt. Nlélém kiki Mbôgi Yéhôva i biloñ bipe, ba nkôna Yésu, inyu hala nyen ba nyén haa ni mam ma mb’ô, mam ma pôlitik, ba nke bé to i gwét gwo ki gwo. (Yôhanes 18:36) I nkoñ ’isi wonsôna, Mbôgi Yéhôva i nke ni bisu i añal “ñañ nlam u Ane,” ba niigaga bôt le ndik i ane i yoñ i ga mélés mandutu momasôna ma bôt ba binam, hala wee yak gwét (Matéô 24:14). Ibale u neebe, di ga ba maséé i toñle we nwin u botñem u Bibel.