YÉNA PÉÉ!

Base ni gwét i loñ Ukren—Kii Bibel i nkal?

Ngim bakegikel i ntoñol lelaa baéga bibase bakeñi ba ntehe gwét bi ntagbe i Ukren; di ñañ mu le:

“Ñane base i Orthodox i Ruslan le, Bisop Kirill, a bi pahal bé buk to yada inyu kolba gwét loñ Ruslan i bi leñ loñ Ukren. . . . Base yé i bi pot ngandak mam ibe ikolba loñ Ukren; minsohi mi, mi yé mu nsoñgi u manjom ñane loñ Ruslan le Putin, a bi gwélél inyu leñ loñ Ukren gwét.”—EUobserver, 7 Matumb 2022.
“Bisop Kirill . . . a bi ti yimbne ikeñi i i ñéba le a nit gwét loñ yé i nleñ loñ Ukren, mu kiki a bi kal le i gwét bi, bi yé njel yada inyu jôs béba, le i tjama bañ.”—AP News, 8 Matumb 2022.
“I gwa njañgumba, ñane base i Orthodox i loñ Ukren, Bisop Épifaniô Nu bisu, nyo i tison i Kiev, a bi sayap bôt ba loñ yé, ‘le ba jôs Lôk Ruslan gwét, i i nlo inyu bémbe bo.’ . . . A bi kal ki le i nol bisônda bi Ruslan i ta bé béba.”—Jerusalem Post, 16 Matumb 2022.
“Bés [Likoda li bibase ni minlôñ mi bibase bi loñ Ukren (UCCRO)] di nit mintôñ mi gwét mi Ukren ni babobasôna ba yé i hôla bés, di nsayap bo mu kiki ba nsôñ loñ yés ikolba ñoo wés nu a njôs bés gwét, di nsoohe ki inyu yap.”—Lipôdôl li UCCROa, 24 Matjel 2022.

Lelaa u ntehe jam lini? Baa bibase bi bi nkal le bi noñ Yésu bi nlama ntinde bôt bap i ke jo gwét ? Kii Bibel i nkal?

Ñañ u bibase i ngéda gwét

Ñañ u ñunda le bibase bi gwé lem i nit, ni i tinde bôt i jo gwét, libim li ngéda bi kalak le bi yé sal inyu tééda nsañ. Hala a yé ngandak nwii nano le Mbôgi Yéhôva i nyelel bihéñba bini bi bibase. Wan le ndék dihéga i i nyôña mu bikaat gwés ni hop Pulasi:

Nkwel unu le, “Les croisades : une ‘illusion tragique’” u mbigdaha bés lelaa base i Lôk Pada Rômana i bi nôlha ngandak bôt i jôl li Djob ni li Yésu.
Nkwel unu le, “L’Église catholique en Afrique” u ñunda le base i bi la bé kéñ bôt ba ngim litén i tjé bôt ba litén lipe, ikété ngim biloñ.
Minkwel mini le, “la religion est-elle responsable ?,” “Le rôle de la religion dans les guerres,” ni “La religion prend parti,” mi ntoñol lelaa, ikété ngandak gwét, baéga bibase bi Lôk Pada, bi Orthodox, ni bi Lôk Sañgô ba bi nit bipes gwobiba bi bi bé jo gwét.

Baa bikristen bi nlama nit gwét?

Jam Yésu a bi kal: “U nlama gwés mut woñ libôk kiki wemede.” (Matéô 22:39) “Kena ni bisu i gwés baoo banan.”—Matéô 5:44-47.

Hégda le: Baa ngim base i nla nkadba i noñ ini mbén i Yésu inyu gwéha, ndi i nlélém ngéda i tindge bôt bé i ke nol bôt bape i gwét? Inyu kôhna ndimbhe, añ minkwel mini ni hop Pulasi le “Les vrais chrétiens et la guerre” ni “Est-il possible d’aimer ses ennemis ?”

Jam Yésu a bi kal: “Ane yem i ta bé i nkoñ ’isi unu. Ibale Ane yem i bak i nkoñ ’isi unu, ki bagwélél bem ba njo, le ba ti bañ me i moo ma Lôk Yuda.” (Yôhanes 18:36) “Ba bobasôna ba nyoñ pansoñ, b’a tjiba ni pansoñ.”—Matéô 26:47-52.

Hégda le: Ibale bikristen bi bé lama bé jo gwét to inyu sôñ Yésu, baa njom ipe i kôli le ba begel mañgaa i ke jo gwét? Inyu tehe lelaa bikristen bi hiai hi bisu bi bi téñbe i noñ biniigana ni ndémbél i Yésu, añ ño nkwel unu le “Peut-on concilier guerre et christianisme ?”.

Kii i ga pémél bibase bi bi nit gwét?

Bibel i niiga le Djob a neebe bé bibase bi bi nkadba le bi noñ Yésu ki le bi noñ bé biniigana gwé.—Matéô 7:21-23; Titô 1:16.

Kaat Masoola i ñunda le i mis ma Djob, bibase bi, bi gwé pil matjél inyu “bôt bobasôna ba bi nôla hana ’isi.” (Masoola 18:21, 24) Inyu yi inyuki, añ nkwel unu le “Babilôn Nunkeñi—Wee kii?”
Yésu a bi kal le bibase gwobisôna Djob a bi tjôô, bi ga tjiba inyu minson nwap mimbe, ndik kiki i ngéga e ibe i num matam mabe, “ba nkit yo ba nleñ yo hié.” (Matéô 7:15-20) Inyu tehe lelaa hala a ga bôña, añ nkwel unu le, “Lisuk li base i bitembee li yé bebee.”

Mbôgi Yéhôva i yé maselna

I loñ Ruslan ni i loñ Ukren, ndi yak i nkoñ ’isi wonsôna, Mbôgi Yéhôva i noñ mbén i Yésu, le ba yén haa ni mam ma mb’ô (mam ma pôlitik), ni le ba jo bañ gwét. Inyu hala nyen di nyoñ bé ngaba yo kiki yo i gwét bini bi kwo ipôla biloñ bini, to i gwét bipe gwo ki gwo, di nit bé pes to yada. Kiki di tiñi i nôgôl biniigana bi Bibel, ngim Mbôgi Yéhôva i mboma ngolba inyu hémle yap. (Yôhanes 15:19, 20; 2 Timôtéô 3:12) Kiki hihéga, bangomin ba loñ Ruslan ba ma leñ ngandak Mbôgi Yéhôva i mamok, ba tééñgaga ki bape. Ba bi kadal yak bahoma di bé kodba inyu bégés Djob. Inyu nyi mam mape mu jam li, ke i www.jw-russia.org.

Béñge vidéô i manut ma-na, ni hop Pulasi le, Les Témoins de Jéhovah d’Irkoutsk restent fidèles malgré des perquisitions brutales, inyu tehe ki lelaa ba ntééñga Mbôgi Yéhôva i loñ Ruslan ndik inyu hémle yap.
Mbôgi Yéhôva i nyiba bôdôl behee kiki bôt ba ba nyoñ bé pes to yada i mam ma pôlitik, to i ngéda gwét. Béñge vidéo ni hop Pulasi le, Fermes face à l’opposition, inyu tehe lelaa, ikété ndééñga ikeñi, ba bi tjél yoñ ngaba i gwét, i loñ Jaman, ni i nlômbi Union Sôviétik.

Soho yuuga site yés internet inyu yi mambe mam mape di nhémle, kiki bo mimbônga mi Bibel inyu dilo di nlo, i ngéda gwét bi ga ba ha bé. (Yésaya 2:4; Yérémia 29:11) U nla yak tilna bés inyu kôhna biniigana bipe.

Bet ba bititii, u bôdlak i waé , u kenek i walôm: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a UCCRO, ni hop Pulasi le, Conseil panukrainien des Églises et organisations religieuses (CPUEOR) a yé likoda li 15 bibase ni minlôñ mi bibase bi loñ Ukren, bini le, base i Ortodox, i Lôk Pada i Grikia ni i Rôma, i Lôk Sañgô, base i Lôk Yuda ni base i Bausa.