Babilôn Nunkeñi​—Wee kii?

Ndimbhe i Bibel

Kaat Masoola i nkal le Babilôn Nunkeñi a yé bikwéha bi base gwobisôna hana ’isi, bi le Djob a mal tjôô.a (Masoola 14:8; 17:5; 18:21) To ibale bibase bi, bi yé maselna i ngandak manjel, bi gwé jam jada ntôñ le, gwobisô bi nkena bôt haa ni bibégés bi bañga Nyambe le Yéhôva.​—Ndiimba Mbéñ 4:​35.

Matode ma ma nhôla bés i yimbe Babilôn Nunkeñi

1. Babilôn Nunkeñi a yé yimbne. Bibel i nkal le a yé “muda,” “muda libambe nunkeñi,” ni le jôl jé li yé “jimb, jo lini le: ‘Babilôn Nunkeñi.’” (Masoola17:​1, 3, 5) Kiki kaat i Masoola i ngwélél “biyimbne” ngandak, di nla kal le Babilôn Nunkeñi a yé yimbne, a ta bé muda ntiik. (Masoola 1:1) Bibel i nkal ki le a “yii i ngii ngandak malép,” ni le malép ma, “ma yé mahaa, ni mamut, ni biloñ, ni dilémb.” (Masoola 17:​1, 15) Ibale muda toi nu, ki a nla bé boñ hala.

2. Babilôn Nunkeñi a nyiba ni nkoñ isi wonsôna. Bibel i nkal le a yé “tison ikeñi i i gwé ane i ngii bikiñe bi nkoñ ’isi.” (Masoola 17:18) Hala a ñunda le a yé ntjamak ni hisi hiosôna, ni le a ntinde biane i boñ ngim mam.

3. Babilôn Nunkeñi a yé yimbne i bibase, ha i mintôñ mi m’bô bé, to mi bôt ba nyuñga. Nlômbi tison u Babilôn u bé nyoñok ni bisat, ba boñok “makañ” ni ngandak yap “liemb.” (Yésaya 47:​1, 12, 13; Yérémia 50:​1, 2, 38) Kwéha base yon bôt ba bé noñ, i i bé kolba bibégés bi bañga Nyambe, le Yéhôva. (Bibôdle 10:​8, 9; 11:​2-4, 8) Baane ba nlômbi Babilôn, ni ngandak ngôk, ba bi yéñ bédés bomede i ngii Yéhôva ni i ngii bibégés gwé. (Yésaya 14:​4, 13, 14; Daniel 5:​2-4, 23) Hala nyen yak i len ini, Babilôn Nunkeñi a nyiba ni “makañ” mé. I mam ma, ma ñunda le a yé ntôn u bikwéha bi base.​—Masoola18:23.

   Babilôn Nunkeñi a nla bé ba ntôñ u bôt ba m’bô inyule “bikiñe bi nkoñ ’isi” bi ñee tjiba yé. (Masoola 17:​1, 2; 18:9) A ta bé to ntôñ u bôt ba nyuñga, inyule Bibel i nkal a yé maselna ni “bôt ba nyuñga ba hisi.”​—Masoola 18:11, 15.

4. 

   Babilôn Nunkeñi a nyônôs matode momasôna ma kwéha base. Kwéha base i ntinde bôt i bégés bikwéha bi mop, ilole i niiga bôt lelaa ba nla kôôge Yéhôva, bañga Nyambe, bebee. Bibel i nhégha i nya maboñok ini ni “libambe ni banyambe” bape. (Lôk Lévi 20:6; Manyodi 34:15, 16) Biniigana kiki bo Trinitas, bo le yom ikété mut binam i nkônde niñ i mbus nyemb yé, tole ligwéélak li bisat ni bititii inyu bibégés, bi nlôl i nlômbi tison i Babilôn; di nléba ki gwo len ikété kwéha base. Bibase bi, bi ke ni bisu i pôdna bibégés gwap lôñni gwéha yap inyu nkoñ ’isi. Bibel i nsébél liwanda jap ni nkoñ ’isi le, “ndéñg.”​—Yakôbô 4:4.

   Ligwañ li kwéha base ni libambal li nkus wé, bi nkiha ni titii Bibel i ngwélél inyu pôdôl Babilôn Nunkeñi, nu a “hééba mbot wedewede, i kôibak tjôôm,” a eñgep ki “ni gôl, ni tik ngok, ni perl.” (Masoola 17:4) Babilôn Nunkeñi a yé lingen li “mam ma nyega ma nkoñ ’isi,” hala wee biniigana ni maboñok Djob a ñoo. (Masoola 17:5) I bet ba yé ikété kwéha base ba yé “mahaa, ni mamut, ni biloñ, ni dilémb;” bon ba nit Babilôn Nunkeñi.​—Masoola 17:15.

Babilôn Nunkeñi nyen a bééga pil matjél u “bôt bobasôna ba bi nôla hana ’isi.” (Masoola 18:24) Ñañ u bôt u ñunda le kwéha base i bi suu ni nit gwét, ni manola, i ngandak bahoma; i bi la bé ki to niiga maliga inyu Yéhôva, Nyambe nu gwéha. (1 Yôhanes 4:8) Mam ma, ma bi boñ le matjél ma kuba ngandak. Inyu hala nyen i bet ba ngwés lémél Djob ba nlama ‘pam nyeeni,’ hala wee ba “bagla” ni kwéha base.​—Masoola18:4; 2 Korintô 6:​14-​17.