Baa m’a ba nyégsaga i yila Mbôgi Yéhôva ibale me nigil Bibel lôñni bo?

To, u ta bé nyégsaga. Didun di bôt di ñôt nseñ kiki ba nigil Bibel ni bés, ndi di ba nyila bé Mbôgi Yéhôva.a Njômbi yés i yé le u yi i yom Bibel i niiga. We nyen u nkit i yom u ga boñ ni biniigana bi. Di nyi le hémle i yé jam li li mbéñge hiki mut nyemede.​​—Yôsua 24:15.

Baa me nla gwélél Bibel yem i ngéda di nigil Bibel?

Ñ. Tolakii bés di ngwés di ngwélél Les Saintes Écritures​—Traduction du Monde Nouveau, di nla ki ti we yada ibale u ngwés. Ndi di yé maséé ngandak ibale u ngwélél Bibel yoñ wemede. U nla kôhna ngandak biniigana bi botñem ni bi tohi i Bibel to ibale u ngwélél to imbe Bibel.

Inyuki ni nigil lôñni bôt ba ba njôp bé i base nan?

• Yom i bisu i i ntinde bés i boñ hala i yé i gwéha di ngwés Yéhôva Djob jés, nu a nsômbôl le bikristen bi niiga bôt bape i yom ba bi nigil. (Matéô 22:37, 38; 28:19, 20) Di nhégda le nsima umpe u ta bé le u nla lel i ba “bagwelnson lôñ yada ni Nyambe” inyu hôla bôt i nok yom Bañga yé i niiga.​​—1 Korintô 3:​6-9.

• Jam li nyônôs iba li yé gwéha di ngwés mut wés libôk. (Matéô 22:39) Hala a nkônha bés maséé i kabna loñni bôt bape i mam malam ma mbuma ñañ le yak bés, di bi nigil.​​—Minson mi baôma 20:35.