Maton ma ma nhéñha niñ i bôt

Nkum Ntat nu 1er Juin 1912 a bé kal le: “Ngandak bôt i i ñañ bikaat gwés i gwé bôt ba ndim mu mahaa map.” A bé kônde le: “I bôt ba, ba nla bana bikaat ibabé i saa. . . . Inyu bôt ba ndim, di mpémés bikaat bi bi gwé ngim maton i i nhôla bo i añ.” Nkum Ntat a nkônde le: “Ngandak bôt ba ndim i yé maséé i yi le bôt ba binam ba ga kôhna bisai.”

I ngéda ba bi tila bibuk bini, hiki loñ i bééna gwé bibañga bi braille ni hop Ngisi. Ndi Mbôgi Yéhôva i bé pémés bikaat ni braille. Yak i len ini, di nke ni bisu i boñ hala! Nano di gwé bikaat ni hop braille ikété iloo 50 dilémb. Lelaa ba mpémés bikaat bi?

I kobol ni i pémés matode i ngii mapep

Inyu bôdôl, di nlama kobol bikaat ni hop braille. Michael Millen nu a nsal i service du traitement de texte i Patterson, a nkal le: “Behee, di bé gwélél logiciel yada, ndi i bé kiha bé ni dilémb tjodisôna.” A nkônde le: “Nano di ngwélél Watchtower Translation System, nu a nhôla bés i kobol ni hop braille ikété ngandak dilémb. Me nhoñol bé le sélél ipe i yé kiki i.”

Bikaat ni hop braille bi gwé ndik bé bibuk, ndi bi ntoñol yak bititii. Kiki ’héga, titii i bisu i kaat ini le Niñ ilam i boga ni boga! i gwé ndoñi ini: “Mut wada a yé ke i man njel nu a gwé bôñji ilam, bie, dikôa.” Jamshed, nu a yé ndim, a bak nhôla nson ni nsañal, a nkal le: “I ndoñi i, i nlôôha ba nseñ inyu yem.”

I ngéda ba mal kobol, inyu boñ le ba pémés bikaat ni hop braille, bôlô i nke i dikuu di biloñ. Nyoo, ba mpémés bikaat ikété mapep ma ma nlet, ma ma ga tubi bé i ngéda ba mba ba nha maton mu. I mbus ba ngwélél kei inyu at mapep ma. I mbus, ba ñep bikaat bi i makoda, ni bikaat bipe, tole ba ñep ni njel pôste ibale hala a nla bôña.

I bôlô i yosôna i mbat ngéda ni moni. I imprimerie yés i Wallkill, i ngéda i mbéda inyu pémés Bibel iba ni hop braille, i yé nlélém ngéda ba ngwélél inyu pémés 50 000 ma Bibel. Ni hop Ngisi, hiki Bibel ni hop braillea i gwé 25 pôk. Inyu pémés i Bibel i, i mbéda moni ba ngwélél inyu pémés ini sela Bibel 123 ngélé. Bikôgôô gwotama bi i 25 pôk i, i bi béda bebee le 100 000 FCFA!

Kii i bet ba nhôla i pémés Bibel ni hop braille ba nôgda? Nadia nu a nsal i Afrika Nwelmbok, a nkal le: “Lôk kéé i bôda ni i bôlôm i i yé ndim tole ba ba ntehna bé loñge, ba gwé bé niñ i i ntomb, jon me yé maséé i hôla bo. Ibabé pééna, Yéhôva a ngwés bo ngandak.”

Lelaa u nla nigil i añ Braille

Kii di nla boñ inyu hôla mut nu a yé ndim, ndi a nyi bé añ hop braille? Hala a yé ndék nwii nano le di bi pémés man kaat nu a nhôla i nigil hop braille ni hop Ngisi. Mu mapep ma, di gwé matila ni hop braille, di gwé ki minso mi matila. I man kaat nu a yé ntjegek nya i yé le i mut a ntehna a nla hôla mut ndim i nigil hop braille. U héya hala, di gwé yak ngim tafel i tôbôtôbô i i gwé ngim yom i i mpôôna saô, i i nôla i tila hop braille. I ngéda mut ndim a ngwélél i sélél i, hala a nhôla nye i tééda ikété mahoñol mé hiki bañga a ntila, yak i ngéda a mba a ñañ ni moo mé.

“Me nla kal le me nla bé waa añ bikaat gwés ni hop braille”

Lelaa lôk kéé i i yé ndim tole i i ntehna bé loñge i ñôt nseñ ni bikaat bi? Ernst nu a niñil i Haiti, a bééna lem i ke makoda, ndi a bééna bé kaat yo ki yo ni hop u braille. Hala a bé boñ le inyu tégbaha nkwel wé, tole inyu ti mandimbhe i likoda a bé sélés boña wé ngandak. A nkal le: “Nano, me nla paa woo, inyu nti mandimbhe i likoda i ngeñ me ngwés. Nano me édi ni lôk kéé. Bésbobasôna di nkôhna minlélém mi bijek bi mbuu.”

Jan mañ wada u u ñéga yigil i Nkum Ntat ni yigil i Bibel i likoda i loñ Ôstrik, nu a ntehna bé loñge a nkal le: “Bikaat ntôñ wés u nkobol ni hop braille bi nôôga loñge iloo bikaat me bi bôk me ñañ ni hop u. Kiki hihéga, mu bikaat gwés, mapep ma gwé nomba, matila isi lipep, ba ntoñol ki bititii i nya i nôôga loñge.”

Nsañal wada nu Kôré nwelmbok le Seon-ok a yé ndim a bak ki ndok. Behee a bé tégbaha makoda ni hop moo u bôt ba ntihbana, ndi nano a nla añ nyetama bikaat bi gwigil bi Bibel ni hop braille. A nkal le: “Libim li ngéda, bikaat ni hop braille bi let i añ, inyule ngim maton i ta bé mu, minlôñ mi yé ntén ntén yak pépa i ta bé ilam. Ndi Mbôgi Yéhôva yo i ngwélél loñge pépa, ba ha ki maton mu bikaat gwap. Jon hala a tômbôl me i añ bikaat gwés. A nkônde le: “Behee, me bééna ngôñ ni mahôla ma mut inyu nigil, ndi nano me nigil metama. Me yé maséé le nano me nla kôôba makoda hiki sonde me tinak ki mandimbhe. Me ñañ bikaat gwés gwobisôna ni hop braille. Me nla kal le me nla bé waa añ bikaat gwés ni hop braille.”

Kiki bini bikaat gwés bipe, bikaat ni hop braille bi gwé bibañga bini le: “I kaat ini i ta bé inyu nyuñga. I yé njel yada inyu niiga Bibel ni nkoñ ’isi wonsôna; nson unu u nséla ni njel makébla ma njômbi ñem.” Di nsoohe bé le inyu ti makébla manan, ni kee i site yés donate.jw.org. I makébla ni nti mon ma nhôla le di laa pémés bijek bi mbuu inyu bagwélél ma Djob bobasôna, yak inyu bôt ba ndim ni ba ba ntehna bé loñge.